Mataio 7 - Iaai Bible 1901 (New Caledonia)

¹ CA ûnykûme hwalö, mʼ adre me ca ûnykûme hwali öbun bi.

² Anyin a haba tulutiny hnobun hna ûnykûme hwalö, adre me he ka ûnykûme hwali öbun bi: helâe minya adre me he ka tulut köbun hoton hnobun hna tuluto.

³ Ke ieû gam u me wâhmakhmeto atmen hnyin emakan liamekeiny möu, ke u me ca ûnykûme udâ eû hnyin emâkâm bi?

⁴ Ke u me he ka kâmâu ka ha ka liamekeiny möu, ka habe, Hnö nya thö he ka hom but atmen ûnyi hnyin emâkâm; ke wâ bi, wale udâ hnyin emâkâm bi?

⁵ U at thoi hnyok, bâm ka oc udâ ûnyi hnyi emâkâm bi; me u me he ka wâ wia he ka hom atmen ûnyi hnyi hnyin emakan liamekeiny möu.

⁶ Ca ham ûnyi ae kap ka ta je kuli, ke ca khûâ anyibun ta je penina ka hnyi hnyimakan ta je buaka, wâ ödrin nye uto but ge je cadrin, ke hwio me kiʼ öbun.

⁷ Sumâtâ thö, mʼ adre me he ka ham köbun; elâm dö, me öbun e he ka wâ thö; seseto thö, mʼ adre me he ka khong ut köbun:

⁸ anyin ame he ka hu ka tavat hia adre me sumâtâ; kʼ ame wâ hnen at ame elâm; kʼ adre me khong ka at ame seseto.

⁹ Ke ie at gabun ae hu nokon ame sumâtâ areto, me ame be ka ham kâu veto:

¹⁰ ke a ne sumâtâ wâ me ame he ka ham bi kâu on?

¹¹ Anyin a wale, a ne mabun, öbun tavat ae monu, he ka wâhmakhmeto hna he ka ham ta je ûnyi ae so ka lakubun, awe, ame ca ti he bi Kamöbun ethö hnyi drany ka ham ta je ûnyi ae so ka tavat adre me sumâtâ e.

¹² Anyin a wale, haba ta je ûnyi öbun e weny e me he tavat ka ânyâ köbun, ânyâ thö e kodra: anyin a wale hnanyibu me ta je perofeta.

¹³ Didro ka hnyi homagöule ae hnek: anyin ae gan homagöule, me lau but gethen ka hnyi hnaûhango, ke ödra se hia tavat adre me dit hnyin.

¹⁴ Ke hnek homa-göule ke ûhnyûkong gethen ka hnyi möt, ke wakhalet thibi tavat adre me wâ e.

¹⁵ O ʼban âu ge ta je perofeta thoi, adre me o but köbun, kʼ adre me khavâ je ûkhaûiny mamoe, ke eû hnyi hnyidrin je luko ae ûhûlû hmonyin.

¹⁶ Öbun e he ka wâhmakhmeto ödrin ge anyidrin ta je wan. Hawa, adre me tau wan vine hnyi iwadekong, me je wan meta hnyi iwatetaföcö?

¹⁷ Ke helâe, haba ta je ûö ae so, ame wa so; ke haba ta je ûö ae kong ame wa kong.

¹⁸ E ca khana ûö ae so he ka wa kong, ke ca khana ûö ae kong he ka wa so.

¹⁹ Haba ta je ûö hia ame wa kong, me adre me he ka sö degecâ, me khûâ but ka hnyi meic.

²⁰ Wale, me öbun e be ka wâhmakhmeto ödra ge anyidra ta je wan.

²¹ Adre me ca he ka dit hia ka hnyi homagouleny drany hnyat adre me ha könya, ka habe, Taböny Than lö, Tabon Than lö; ke so thibi at ame ânyâ weny Kamök ethö hnyi drany.

²² At se hia adre me he ka ha könya hnyi bong eling, ka habe, Taböny Than lö, Taböny Than lö, hawa, ohmun e ca hnyi perofeta hnyi iâm, me obâ ta je demoni hnyi iâm, ke se hia ta je huliwa ae man ohmun e ânyâ hnyi iâm?

²³ Ke oge me he ka ha kodra, ka habe, E ca khanö nya öbun: ûsâkaûö but mönya, öbun tavat öbun e ânyâ hulö.

²⁴ Anyin a wale haba at ame long hok ta je hofuc ang, me mâdrâ, oge me he ka oûco e me at ae metâ, wale at ame otilâ umen uma hon kic:

²⁵ me ame ta but we, me ame o but di, me hwege but ang, me kot uma e; ke ame ca û bi: anyin a taben kic.

²⁶ Ke haba at ame long hok ta je hofuc ang, ke ame ca mâdrâ bi, me adre me he ka oûco e me at ae monu, wale at ame otilâ umen uma hon öny:

²⁷ ke ame ta but we, me o but di, ke hwege but ang, me kot uma e; me ame û but: ke gan hmâ ûtainy uma e.

²⁸ Ke ame um dö ta je hofuc e ho Iesu, me ame lâiâ gan hmâ tavat ae se hia hnen hna ûne:

²⁹ anyin a e ame nʼ ödra helâ me at ae man, ke ca helâ bi me tavat sihnalimen.