Mataio 4 - Iaai Bible 1901 (New Caledonia)

¹ KE haba Hanu ame hum Iesu ka hnyi hnyebuba, e me he diabolo he ka cubec e.

² Kʼ ame ca han hnyi fâte je lany ke fâte je lit, ke hwaban dö e, me ame mekihnânem.

³ Me ame o but kâu at ame ûcûbic, me ha, ka habe, U je ne Nokon Khong, ha thö, me me areto but je veto ang.

⁴ Me e ame thu me ha, ka habe, Adre hia but sihnalimen, ka habe, Ame ca he ka möt at ge areto thibi, ke hnen bi ta je hofuc hia ame o but ûnyi hnyi hnyimen Khong.

⁵ Haba diabolo ame hom e ka hnyi taun ae kap, me ip e hon ban uma kap,

⁶ ke ha kâu, ka habe, U je ne Nokon Khong, utut: anyin adre sihnalimen, ka habe, E ame he ka hûna anyin ta je angela hnân hobi köu: Kʼ adre me he ka kap tilö u ge je hnyamödra, Wâ e nye thö thö hnyeûcam hnyi veto.

⁷ Haba Iesu ame ha kâu, ka habe, Adre hia but sihnalimen minya, ka habe, U me ca he ka cubec Than a Khongom.

⁸ Ke haba diabolo ame hom hmetu e ka hnyi bucen ae beû hmâ, me omanenâ kâû ta je dökhu hia eang hmeledrany, ke ta je hmanenanginy;

⁹ me e ame ha kâu, ka habe, Oge me he ka ham köu ta je ûnyi e, u je ne he bi ka nom me khudrung ju könya.

¹⁰ Ke haba Iesu ame ha kâu, ka habe, Satana lö, kec dö: anyin adre hia but sihnalimen, ka habe, U ma he ka khudrung ka Than a Khongom, me bi athnyabainy thibi.

¹¹ Me haba diabolo ame hna but e; ke wâ bi, ame o thö ta je angela me bi athnyabainy.

¹² Ke haba hnyi ûen e ame long a gʼ adre hia but cö Ioane, me e ame he but Galilaia ai;

¹³ ke e ame hna but Nazareta, me he ka laba hnyi Kaperenauma, hnyi hobat köiö, hnyi hnyigoulen Zebulona me Nafatali:

¹⁴ me me hwâdâ hna ha ga Isaia perofeta, ka habe,

¹⁵ Hnyei Zebulona me Nafatali, Cicö köiö, hoton Joridano, Galilaia iny ke je hnyei,

¹⁶ Haba tavat adre me laba hnyi menekholom Adre me wâ melam ae gan, Ke haba tavat adre me laba hnyi ke keihen hnyei a hmenon mok, Ame o but melam kodra.

¹⁷ Hwân hnyi ûen e, Iesu ame hwân he ka khetâ me ha, ka habe, Ietra ju öbun; anyin ae hakekeny jut dokhon drany.

¹⁸ Ke e ame vheno hobat köiö Galilaia, ke e ame wâ li liamekeiny, jia Simona ke ien Peteru, me Anederea a keiny, ödru me thong ert eû hnyi köiö; anyin a ödru li at thut.

¹⁹ Ke e ame ha ködru, ka habe, He hotuk, me oge me he ka wiʼ öbu me hnân thelo at.

²⁰ Me ödru me ie hna but je ert me he hoton.

²¹ Ke e ame he ûheny e, me e ame wâ ke li liamekeiny, jia Iakobo nöku Zebedaio, me Ioane a keiny, ödru me tha laba me Zebedaio a kamö-dru hon hu, ödrin e ena ûtödrin je ert; ke e ame haʼ ödru.

²² Me ödru me ie hna but hu me kamödru, me he hoton.

²³ Ke Iesu ame vheno Galilaia hia thithö, ame ûne hnyin umödrin je sunago, me khetâ ûthumetu a soiny dökhu, me ohia ta je mok hia thithö, me ta je sēnyin hia hnyi hnyei.

²⁴ Ke e ame lung igigilo Suria hia thithö: me adre me hom but kâu tavat ae mok hia thithö, wale ame takû ödra ge je ve mok me vec, tavat a delec demoni, me ing, me mat, me e ame omeli ödra.

²⁵ Haba tavat ae se hia adre me he hoton e, ûhedra Galilaia me Dekapoli me Jerusalema me Juda me ke keihen hoton Joridano.