Mataio 3 - Iaai Bible 1901 (New Caledonia)

¹ HNYI je bong eling ame o thö Ioane Bapataiso kʼ ame khetâ hofuc hnyi hnyebuba hnyi Juda,

² haingen ka habe, Ietra ju öbun; anyin ae hakekeny jut dokhon drany

³ Anyin a e at a ha gan Isaia perofeta, haingen, ka habe, Ifucin at ame hongot hnyi hnyebuba, ame ha, ka habe, Penapena ju gethen deny Than, Owisa thö deny ta je gethen.

⁴ Ke haba Ioane ame khavâ ûkhaû a leûnen kamela, kʼ ame ca hnyekon ge wen a unen meno; ke haba hing an jeû me hamon me haniiny hnyot.

⁵ Me ame he but kâu Jerusalema, me Juda hia thithö, me ke keihen hnyei hia hakekenyâ Joridano;

⁶ ke e ame bapataisoi ödra hnyi wagewe Joridano, adre me omanenâ anyidra ta je monu.

⁷ Ke hnyi ûen e ame wâ ta je Faresaio me ta je Sadukaio ae se hia adre me o but ka hnyi anyin bapataiso, me e ame ha kodra, ka habe, Je lakon on lö, ia koû köbun mʼ öbun e he ka kec ge hmonyin ame he ka o?

⁸ Wa but öbun wan ae ûcû me ietra:

⁹ ke ca ûnykûme he ka ha eû hnyi je hnyekubun, ka habe, Aberahama kamöta: anyin oge me ha köbun e khana Khong he ka okûâ lakon kö Aberahama ûnyi hnyi je veto ang.

¹⁰ Adre hia but walang ang ip giwa hnyi hwecin ta je ûö: haba ta je ûö hia ame ca wa so, me adre ma sö degecâ me khûâ ka hnyi meic.

¹¹ Haba inya oge me bapataisoi öbun ge köiö ka hnyi ietra: ke haba at ame he jem hotuk ae beönua huk, ae ca ûcû nya bi he ka hom taben li hnyeûcan: e ame he ka bapataisoi öbun ge Hanu Kap me meic:

¹² e bi hnyi hnyamen anyin ut, ke e ame he ka ânyâwia hwit hnyi hnen hna huje hwit; ke e ame he ka ûkhöunâ anyin hwit ka hnyi omhani, ke e ame he ka thong thatûnyin hwit hnyi meic ame ca mok balua.

¹³ Haba Jesu ame he but ûheny Galilaia Joridano ai ko Ioane, e me he ka bapataisoâ e.

¹⁴ Ke haba Ioane ame bethawâ e, me ha, ka habe, E so u me he bi ka bapataisoi nya, ke u me he but könya?

¹⁵ Ke Iesu ame thu me ha kâu, ka habe, Më kap ju walang ang: anyin ae ûcû köta he ka hnu hoton hia thithö hwakecin ae wisa. Me e ame long kâu.

¹⁶ A hia but bapataisoi Iesu, me e ame ölö thö ûheny hnyi köiö: ke wâ bi adre me khong ut kâu drany, ke e ame wâ Hanon Khong ame gâ but kâu helâ me biny, me o hnyi hon;

¹⁷ ke wâ bi ke hwan ûnyi hnyi drany, ame ha, ka habe, Walang Nokuk a oûnykûmik, at oge me ti senyin gan.