Mataio 28 - Iaai Bible 1901 (New Caledonia)

¹ HABA hnyi obiny bong sabath, ke tiga okubelitiny bong a bân hnyi wik, ame o but Maria Magadalena me ke Mana he ka wâ erkemok.

² Ke wâ bi, wale hwiöi ae gan hmâ; anyin ame utut angela anyin Than ûheny hnyi drany, me o, me hagutâ veto ûnyi hnyi hnyimen erkemok, me laba ju hon.

³ Haba hnyimakan helâ me hucuce, ke hau anyin ûkhaû:

⁴ me ame Öbubuny hnyat tue me ot, ke helâke je komok ödrin.

⁵ Haba angela ame thu me ha ka watamomo, ka habe, Ca ot bi: anyin ae khanö nya a öbun e elöm Iesu waleji adre osatauroâ.

⁶ E hia but ang; anyin a e a möt hmetu thö, helâji me hnen hna ha. Ai öbun ka wâ dok waleji a mokut hnyin Than.

⁷ Ke ie logot dʼ öbun me ha ka laten, ka habe, E a möt hmetu thö ûheny hnyi hna mok; ke wâ bi, e a bân dut Galilaia ai, ke bilibun biju; öbun e he ka iouny mē eling: awe, oge hia but ha köbun.

⁸ Me ödrin e ie he logot ûhedrin hnyi erkemok me ot me senyin ae gan hmâ, me wadring he ka thumeto laten.

⁹ Ke wâ bi Iesu ame ûkhanö mödrin, me ha, ka habe, Talofa. Me ödrin e be me kât li can, me khudrung ju kâu.

¹⁰ Haba Iesu ame ha ködrin, ka habe, Ca ot bi: he thʼ öbun ka thumeto je liamekeiny mönya madre me he ka he but Galilaia ai, me ödrin e he ka iouny eling mönya.

¹¹ Ödrin e tiga he, me wâ bi, keihen hnyat tue ödrin e he ka hnyi taun, me thumeto je taben tavat bihut ge ta je ûnyi hia adre ânyâ.

¹² Me adre me ûkhacaköu me wahingat, me ûhnenamö, me adre me ham ka ta je soja mone ae gan,

¹³ me ha, ka habe, Ha thʼ öbun, ka habe, Haba laten ödrin e he hnyi hnyinghet me venâu e, ke ohmun tiga mokut bi.

¹⁴ Ke a ne o but hofuc e ka li hnyikonyen gavena, mʼ ohmun e he ka cubec e, me ohia anyibun hmak.

¹⁵ Me adre me hom je mone, me ânyâ helâ me hna nʼ ödrin: ke haba hofuc e adre me labö ha ehele unyin at Juda, ke helâe minya ke ne o but hnyi bong ang.

¹⁶ Ke haba laten a eleven ödrin e he Galilaia ai, ka hnyi bucen waleji a hia but Iesu kû ködrin.

¹⁷ Ke ödrin e wâ but e, me ödrin e khudrung ju kâu: ke haba keihen ödrin e loloâ.

¹⁸ Me haba Iesu ame o but ködrin me ba hofuc ködrin, haingen, ka habe, Adre hia but ham könya musi hia hnyi drany me eang hmeledrany.

¹⁹ Anyin a wale, he thʼ öbun ka bi latök hnyi ta je hnyei hia thithö, me bapataisoi ödra hnyi ien Kamen, me Nokon, me Hanu Kap:

²⁰ ke nʼ ödra thö he ka vheno ta je ûnyi hia thithö waleji oge me hûna köbun: ke wâ bi, inya oge me tha e möbun hnyi ta je bong hia thithö ke ne o but ka hnyi obiny hmeledrany.