Mataio 27 - Iaai Bible 1901 (New Caledonia)

¹ HNYI hnyomakatu, haba je taben tavat bihut hia me wahingatiny hnyei, adre me si hnö Iesu, mʼ adre me he ka hlingâ e:

² ke adre me ca e, me lelö thö e me hna but e kö Pilato a gavena.

³ Ke a wâhmakhmeto but Juda at ame alecuâ e, a ga mou thö gan, me e ame ietra, me hom hmetu je mone a thote ka je taben tavat bihut me wahingat,

⁴ me ha, ka habe, Oge hia but ânyâ hulö he ka alecuâ dra ae ba hnyikongon. Ke haingödra, ka habe, U me ha bi kohmun? ka u bi u.

⁵ Me e ame degec je mone hnyin uma kap, me he but; me e ame he but me hnok.

⁶ Haba je taben tavat bihut, adre me hom je mone, me ha, ka habe, E ca ûcû he ka ip hnyi tangen bwihlany, anyin a hwaban dra.

⁷ Ke adre me ûhnenamö, me ûco hwaban e ke utkânâ anyin at ame up mini, me hnân khon komok a je atkanyaua.

⁸ Waleling, mʼ adre me hwenyi ien utkânâ eling, ka habe, Utkânâiny dra, ke ne o but hnyi bong ang.

⁹ Me ame hwâdâ thö hna ha ga Jeremia perofeta, ka habe, Adre me hom je mone a thote a hwaban at adre hia but ha me hwaban, wale a ha hwaban ge keihen lakon Isaraela;

¹⁰ me adre me ham me hwaban utkânâ anyin at ame up mini helâ me hnen Than hna hûna könya.

¹¹ Ke Iesu ame tot hnyi hnyimakan gavena: ke haba gavena ame hnö e, ka habe, U tuhan at Juda? Haingö Iesu ame ha kâu, ka habe, U me ha e.

¹² Ke ame bi fuco e hnen ta je taben tavat bihut me wahingat, me e ame ca thu bi.

¹³ Me haba Pilato ame ha kâu, ka habe, U me ca long a ödrin e osehia but bi fuci u?

¹⁴ Ke e ame ca thu bi kâu ke hofuc a khaca: me me lâiâ gan hmâ but gavena.

¹⁵ Ke haba hwakecin gavena hnyi ûen bijeû he ka labö thang ut ka tavat ke at adre ca, a at adre me weny.

¹⁶ Ke e hu gadra at ae lung adre ca, Barabasa ien.

¹⁷ Ke adre hia but ûkhacaköu, me haba Pilato ame ha kodra, ka habe, Ia webun oge me he ka thang ut köbun? Hawa, Barabasa, ame ne Iesu adre me hwenyi ien me Keriso?

¹⁸ Anyin ae khana but a gʼ adre hna e can ihuhnyinköu.

¹⁹ Ke e ame tiga laba hon taben owisa, ke haba âiân ame ûkhûnöng kâu he ka ha, ka habe, Ca he bi u ka ânyâ ke ûnyi ka at e ae wisa: anyin a oge hia but ibiose vec gan hnyi bong ang hnyi bwi.

²⁰ Ke haba je taben tavat bihut me wahingat adre me cubec tavat ae se hia he ka sumâtö Barabasa, mʼ adre me hlingö Iesu.

²¹ Haba gavena ame thu, ka habe, Ia ae webun gadru, mʼ inye he ka thang ut köbun? Me adre me ha, ka habe, Barabasa.

²² Haba Pilato ame ha kodra, ka habe, Ke ieû oge me he ka ânyâ kö Iesu adre me hwenyi ien Keriso? Me haingödra hia, ka habe, Osatauroâ thö.

²³ Me e ame ha, ka habe, Anyin a ie monu e ame ânyâ? Me adre me ha hwegiâ, ka habe, Osatauroâ thö.

²⁴ Ke a wâ but Pilato a e ame ca he ka ton, kʼ ame kû bi thö imonumonuny, me e ame hom utköiö, me hinyem hnyi hnyimakan tavat, me ha, ka habe, Iny alai ge dren at ang ae wisa: hamöbun biju.

²⁵ Haba tavat hia adre me thu, ka habe, E so e he dren ka takû ohmun me lakuhmun.

²⁶ Me e ame thong Barabasa but kodra: ke e ame osoi Iesu me hna but he ka osatauroâ.

²⁷ Haba je soja anyin gavena adre me hum Iesu ka hnyi uma umen than, me öûkhacaköuâ kâu je hanen deo vat hia.

²⁸ Ke adre me uny jut anyin je ûkhaû, me okhâvâ bi ge ûkhaû ae dra.

²⁹ Ke adre me hwâwâ je tö ae ûdedö hnân korona, me obicâ e, me ip hlowe hnyi hnyamen a metân; ke adre me ciboucâ hnyi hnyimakan, me hluma e, me ha, ka habe, E ge Tuhan at Juda!

³⁰ Me adre me hangöjâ e, me hom hlowe, me kot ban.

³¹ Ke adre hia but hluma e, me adre me uny hmetu but ûkhaû gan me okhâvâ ge je ûkhaûen bi, me lelö thö e he ka osatauroâ.

³² Ke adre me didrut me wâ ke at Kurene, Simona ien: me adre me muso e he ka tha he, me me he ka vadren anyin satauro.

³³ Ke adre me o but ka ke dok, Gologotha ien, haba bongon, me, hnen ibokomok,

³⁴ me adre me ham kâu waina adre ûhaniken me khöhlöng hnân ic: ke a hia but drem cubecâ, me e ame höcö he ka ijem.

³⁵ Ke adre hia but osatauroâ e, me adre me khenâ anyin je ûkhaû kodra bi, adre me ugleköbâ:

³⁶ ke adre me ûlalabainy me tuö e eling.

³⁷ Ke adre me ip ethö hon ban hna bi fuco e adre sihnalimen, ka habe, Walang Iesu a Tuhan at Juda.

³⁸ Me adre me tha osatauroâ mē li at venöu, ke at hnyi ke keihen metâ, me ke at hnyi ke keihen me.

³⁹ Haba tavat adre me he eling adre me hiâ e, me nyinyikâ je bödra,

⁴⁰ me ha, ka habe, E, u at ama kia uma kap, me otilâ hmetu hnyi kun ta bong, omeli u thö: u je ne Nokon Khong utut ûhem hnyi satauro.

⁴¹ Ke helâe minya je taben tavat bihut, tha ödrin me hnyat sihnalimen, me wahingat adre me hiâ e, me ha, ka habe,

⁴² E ame omelö keihen; ke haba e bi e ca khana bi he ka omelö e. E, Tuhan at Isaraela; e so e ame utut walang ang ûheny hnyi satauro, mʼ ate me he ka labageju kâu.

⁴³ E ame labageju ka Khong; e so e he ka omelö e walang ang, e ka weny e: anyin a e ame ha, ka habe, Inya ang Nokon Khong.

⁴⁴ Ke haba li at venöu waleji adre me tha osatauroi ödru mē, me ödru me hnyi haikongoâ helâe.

⁴⁵ Ke ame menekholom but hnyei hia, hwân hnyi awa a siks ke ne o but ka hnyi awa a nain.

⁴⁶ Ke helâke me hnyi awa a naininy Iesu ame hongot hwege, ka habe, Eli, Eli, lama sabakethani? walang bongon, ka habe, Khonguk, Khonguk lö, ieû gam u me hnö nya but?

⁴⁷ Haba keihen adre me ûtitilen eling adre me long, me adre me ha, ka habe, Haba at ang ame hao Elia.

⁴⁸ Ke haba ke at gadra ame ie wadring, me hom ohmanenâ, me hûlûlûâ hnyi vinega, me ip hnyi obiny hlowe, me habelen e.

⁴⁹ Ke haba kolon gadra, me adre me ha, ka habe, Më khanang: e so ate me wâ ame ne he Elia ka o he ka omelö e.

⁵⁰ Ke a hia but Iesu hongot hmetu, me e ame hna but hanon.

⁵¹ Ke wâ bi, ame khekhe lo but mano singiny uma kap hwân ethö ke ne o but eû; ke ame jijing dö hmeledrany; me ame hmouca but ta je kic;

⁵² ke ame memang ut ta je erkemok; ke se hia ta je unyin tavat ae kap a tavat adre me mokut, me adre me möt hmetu thö,

⁵³ me didro ûnyi hnyi ta je erkemok hwaban hnen hna möt hmetu, kʼ adre me didro ka hnyi taun ae kap, me manen dut ka tavat ae se hia.

⁵⁴ Ke haba keneturio, me tavat minya unyin, wale hnyat adre me tuö Iesu, ödrin e wâ hwiöi, ke ta je ûnyi adre me ânyâ, me ödrin e ot gan hmâ, me ha, ka habe, E hnathu Nokon Khong at ang.

⁵⁵ Ke wale minya omomo ae se hia adre me wâ sâkâûâ, waleji hnyat ödrin e he hotu Iesu ûheny Galilaia, me bi athnyabainy:

⁵⁶ ke wale minya unyidrin Maria Magadalena, me Maria hinyö Iakobo me Jose, me hinyen li laku Zebedaio.

⁵⁷ Ke haba hnyi sahac ame o but ke at ae tren omjeû ûheny Arimathea, Josefa ien, wale ke atö Iesu minya:

⁵⁸ haba at ang ame he but kö Pilato me sumâtâ unyi Iesu. Haba Pilato ame hûna bi he ka bâm.

⁵⁹ Ke Josefa ame hom unyin me lan e ge mano lino ae kalaut,

⁶⁰ me ip e hnyi anyin bi erkemok ae teb ûnyi, waleji e ame thö hnyin kic: me hagutâ veto ae gan ka hnyi hnyimen erkemok, ke e ame he but.

⁶¹ Ke wale Maria Magadalena me ke Maria, ödru me laba cicö erkemok.

⁶² Ke haba nyi, wale bong a hwaban bong hnân Penapena, ame ûkhacaköu thö kö Pilato je taben tavat bihut, me ta je Faresaio,

⁶³ me ha, ka habe, Taböny than lö, ohmun e ûnykûme a gʼ ame ha hnen at iyawö eling, kē tiga möt, ka habe, Hwaban kun ta bong oge me he ka möt hmetu.

⁶⁴ Anyin a wale hûna ju, mʼ adre me he ka ohmâ erkemok ke ne o but hnyi bong a kuniny, wâ e nye o but laten me venâu e, me ha ka tavat, ka habe, A möt hmetu thö e ûheny hnyi hna mok: me ame he ka gan dut monu a biliny hon monu a bân.

⁶⁵ Haba Pilato ame ha ködrin, ka habe, E hu bi gabun tavat tue: he thʼ öbun, hamöbun bi he ka ohmâ hoton hnobun hna khana.

⁶⁶ Me ödrin e he but, me ohmâ wia erkemok, me ödrin e okeceâ hmâ veto ge haten, ke e bi unyidrin tavat tue.