Mataio 25 - Iaai Bible 1901 (New Caledonia)

¹ ME adre me he ka oûco dokhon drany me je hing hlu a ten, ödrin e ve hom anyidrin je lamepa he ka ûkhanö me at a tep faipoipo.

² E monu ke faiv gadrin, ke metâ ke faiv.

³ Haba hnyat e ae monu ödrin e hom anyidrin je lamepa, ke ödrin e ca hok wakaco minya bi:

⁴ ke haba hnyat ae metâ ödrin e hok wakaco hnyi anyidra je kaia me hnyi anyidra je lamepa.

⁵ E tiga bec at a tep faipoipo, me ödrin hia ödrin e ta mokut me mokut.

⁶ Ke hnyi wanbenset adre me kuku thö me ha, ka habe, Wale but ang at a tep faipoipo! Ai öbun he ka ûkhanö mē.

⁷ Me ame todrö je hlu hia eling, me ânyâwia anyidrin je lamepa.

⁸ Ke haba hnyat ae monu ödrin e ha ka hnyat ae metâ, ka habe, Hanyihmun ge hanen anyibun wakaco, anyin ae mok ut anyihmun je lamepa.

⁹ Ke haba hnyat ae metâ ödrin e thu me ha, ka habe, Ame ne ca he ka ûcû ohmun bi mʼ öbun: ke so bi he thʼ öbun ka tavat ûcû, me ûco hobi köbuu bi.

¹⁰ Ke ödrin e tiga he bi he ka ûcû, me ame o but at a tep faipoipo; me haba hnyat ödrin e penapena, me ödrin e tha didro mē ka hnyi bijeûiny faipoipo, ke adre me hlöng ut hwanuma.

¹¹ Hwaban e, ame o but ke je hlu, me ha, ka habe, Taböny than, taböny than lö, khong ut kohmun.

¹² Ke e ame thu, me ha, ka habe, E hnathu inya oge me ha, ka habe, E ca khanö nya öbun.

¹³ Anyin a wale, hmâkâ ju öbun, anyin ae ca khanʼ öbun bong me awa ame he ka o but hnyin Nokon at.

¹⁴ Anyin a haba ûnyi e, me helâke ame he ke at ka hnyi ke hnyei, me e ame hawâ lathnyabainy me hna but ködrin anyin ta je ûnyi.

¹⁵ Ke e ame ham ka ke at je talan a faiv, ke ka ke at lo, ke ka ke at khaca; ka ke at me ke at hoton hnödrin hna khana; ke e ame he but ka hnyi dok ae sâkâû.

¹⁶ Haba at a kap je talan a thabûng, me e ame ie he me ûcû hanen, me ame hu minya hanen a thabûng hmetu ke je talan.

¹⁷ Ke helâe me at a kap lo, e ame ûcû hanen ke lo hmetu.

¹⁸ Ke haba at a kap khaca, me e ame he but me hiny kânâ, me ikhâlâ mone anyin tuhan.

¹⁹ Ke hwaban ta je bong ae se hia ame o but tuhan lathnyaba eling, me tuluto anyidrin ta je ûnyi.

²⁰ Me ame o but at a kap je talan a thabûng, ke e ame hom minya ke je talan a thabûng me ha, ka habe, Than lö, u je hna könya je talan a thabûng: wâ bi, oge hia but ûcû hanen thabûng ke ta talan minya.

²¹ Me haingen tuhan ame ha kâu, ka habe, Ole, u athnyaba ae so me hnathu, u je hia but hnathu hnyi ta je ûnyi ae wakhalet, oge me he ka otilö u hon ta je ûnyi ae se hia, didro ka hnyi senyin anyin tuhâm.

²² Me ame o but minya at a kap lo li talan, me ha, ka habe, Than lö, u je hna könya lo li talan: wâ bi oge hia but ûcû hanen a lo ke li talan minya.

²³ Haingen than ame ha, ka habe, Ole, u athnyaba ae so me hnathu, u je hia but hnathu hnyi ta je ûnyi ae wakhalet, oge me he ka otilö u hon ta je ûnyi ae se hia: didro ka hnyi senyin anyin tuhâm.

²⁴ Me ame o but minya at a kap talan a khaca, me ha, ka habe, Than lö, inya oge me wâhmakhmeto u, a u at ae hwege monu hnyimâkâm, u me meno hnyi dok u je ca tā hnyin, me ûkhöûnâ hnyi dok u je ca jijingâ hnyin:

²⁵ me oge me ot me he me konâm ânyâm talan hnyi kânâ; ke wale hmetu ang ûnyi a ânyâm.

²⁶ Me haba tuhan ame thu me ha kâu, ka habe, U athnyaba ae kong mo ūsēnyin, e khatö u a oge me meno hnyi dok oge ca ta hnyin, me ûkhöûnâ hnyi dok oge me ca jijingâ hnyin;

²⁷ anyin a wale, hamâm he ka ip anyik mone unyin tavat ûcû hobi kâu iny ka o thö, mʼ oge me he ka hu hmetu anyik me hna bi hanen.

²⁸ Anyin a wale, hûgûnâ thö gan talan me ham ka at a tren talan a ten.

²⁹ Anyin adre me he ka ham kodra hia tavat ae hu gadra, me me se hia but gadra: ke haba at ae ba adre me he ka hûgûnâ gan ûnyi e ame hu.

³⁰ Ke khûâ but athnyaba ae ûnyi baû ka hnyi menekholom hnyou: ame he ka tenge eling me ûgiö ganyon.

³¹ Ke e ka o but Nokon at hnyi anyin hmanenang tha e me anyin ta je angela hia thithö, me e ame he ka laba hon theroniny anyin hmanenang:

³² ke ame he ka ûkhacaköu ta je hnyei hia thithö hnyi hnyimakan: ke e ame he ka khenâ luʼ ödra but, helâ me at tuö mamoe ame khenâ luâ ta je mamoe me ta je got:

³³ me e ame he ka ip ta je mamoe hnyi ke keihen a metân, me ta je got hnyi ke keihen a meny.

³⁴ Haba Than ame he ka ha kodra hnyi ke keihen a metân, ka habe, Ai öbun, öbun hia tavat a ohnahicâ hnen Kamök, hu hwajekhöûbun ju dökhu adre penapena hobi köbun hwân hnyi hna bi taben hmeledrany:

³⁵ anyin a oge mekihnânem, mʼ öbun e ha ök: oge me beic, mʼ öbun e habelik: iny atkanyua, mʼ öbun e hawo nya:

³⁶ oge me he thu, mʼ öbun e okhaûo nya: oge me mok, mʼ öbun e senö nya: ke inya hnyin uma ceat, mʼ öbun e o thö könya.

³⁷ Me ame he ka thu kâu hnen tavat ae wisa, ka habe, Than lö, ohmun e ō u kehö u mekihnânem, mʼ ohmun e hâm, kʼ u beic mʼ ohmun e habelâm?

³⁸ Ke ohmun e ö u kehö a u atkanyua, mʼ ohmun e hawo u? ke he thu, mʼ ohmun e okhaûo u?

³⁹ Ke ohmun e ö u kehö a u mok, ke hnyin uma ceat, me o thö köu?

⁴⁰ Me ame he Than ka thu ködrin, ka habe, E hnathu inya oge me ha köbun, habaji ge hnobun hna ânyâ ka ke at gadra ae ûhnyûkong hmonyin a je liamekeiny mönya, me öbun e ânyâ ling könya.

⁴¹ Ke e ame he ka ha kodra hnyi ke keihen a meny, ka habe, Ûsâkâûö but mönya, öbun tavat ae hnaûhango ka hnyi meic ame ca mok balua, waleji adre penapena hobi kö diabolo me anyin ta je angela:

⁴² anyin a oge me mekihnânem, kʼ öbun e ca ha ök: oge me beic, kʼ öbun e ca habelik:

⁴³ iny atkanyua, kʼ öbun e ca hawo nya; oge me he thu, kʼ öbun e ca okhaûo nya; oge me mok, ke oge me laba hnyi uma ceat, kʼ öbun e ca senö nya.

⁴⁴ Ke ödra minya adre me he ka thu, me ha, ka habe, Than lö, ohmun e ō u kehö a u mekihnânem, ke beic, ke atkanyua, ke he thu, ke mok, ke laba hnyin uma ceat, mʼ ohmun e ca hadruo u?

⁴⁵ Me e ame he ka thu kodra, me ha, ka habe, E hnathu inya oge me ha köbun, ka habe, Habaji ge hnobun hna ca ânyâ ka ke at gadra ae ûhnyûkong hmonyin, me öbun e ca ânyâ minya ling könya.

⁴⁶ Ke haba tavat ang, me adre me he ka he ka hnyi hna bi hwaban ame ca ba balua; ke haba tavat ae wisa hwakecidra ka hnyi möt ame ca ba balua.