Mataio 24 - Iaai Bible 1901 (New Caledonia)

¹ HABA Iesu ame didrut ûheny hnyi uma kap; me ame o but laten he ka omanenâ kâu je ke keihen hna op uma kap.

² Haba Iesu ame ha ködrin, ka habe, Hawa, öbun e wâ but ta je ûnyi hia eang? e hnathu inya oge me ba köbun, ka habe, Ame ca he bi ke veto ka mokut hon ke veto, ke adre me he ka thö degecâ hia.

³ E ame tiga laba hon bucen Elaio, me ame o duöng kâu laten, me ha, ka habe, omanenâ thö kohmun ame he ka o kehö ta je ûnyi eî ke ieû haten ge hnâm hna he ka o hmetu, me ûnyi minya a obiny hmeledrany?

⁴ Ke haba Iesu ame thu ködrin, ka habe, Wâ eâu, wâ e nye omonu öbun dut ke at.

⁵ Anyin ödra se hia adre me he ka o hnyi iök me ha, ka habe, Inya ang Keriso; me omonoâ tavat ae se hia.

⁶ Ke öbun e he ka long ge ta je vat, me hoon ta je vat: wâ eâu, öbun nye he ka ot, anyin ame he bi ka o ta je ûnyi e, ke tiga hia bi obiny.

⁷ Anyin ame he ka tot ke hnyei ka ke hnyei, me ke dökhu ha ke dökhu; ke ame he ka hu je hmiâ, me hwiöi hnyi ke je dok.

⁸ Ke haba ta je ûnyi eling, me wale hwân ta je vec.

⁹ Me adre me he ka hnʼ öbun dut ka tavat ûöveci, ke adre me he ka hlingʼ öbun: ke adre me he ka huköti öbun ta je hnyei hia thithö can iök.

¹⁰ Me ame he ka thö thö tavat ae se hia, me ûalecuödraköu ödra, me bi iwahnaihmiony.

¹¹ Ke ame he ka o ta je perofeta thoi ae se hia me omonoâ tavat ae se hia.

¹² Ke can hnödra hna osehia hulö, ame he ka katebu ibetengiö anyin tavat ae se hia.

¹³ Ke haba at ame he ka tethmâ ke ne o but obiny, me e ame he ka möt.

¹⁴ Ke adre me he ka khetâ ûthumetuiny dökhu ang hnyi hmeledrany hia hnân ohnatho ka ta je hnyei; me ame he ka o but obiny.

¹⁵ Awe, öbun ka wâ ûnyi ae ikiki at ame okongo, ame tot hnyi dok ae kap, waleji a ha Daniela perofeta, (wâhmakhmeto ju hnen at ame aû),

¹⁶ haba hnyi ûen e, e so ame he tavat adre me laba hnyi Juda ka kec ka hnyi bucen:

¹⁷ ke haba at hnyi hon uma, e so e me ca utut he ka hok ûnyi ûnyi hnyi hnyin umen uma:

¹⁸ ke haba at a belök, e so e me ca hmetu bi he ka hom anyin ûkhaû.

¹⁹ Ke ekölö ge tavat a ödra erkin, me tavat adre me ûasin hnyi je bong eling.

²⁰ Ke hic ju öbun, mʼ öbun e ca he ka kec hnyi ûen megic, ke sabath:

²¹ anyin ame he ka o vec ae gan hmâ e ba helâe ehac hnyi hwân hmeledrany ke ne o but walang ang, kʼ ame ca he bi ka helâe hmetu.

²² Ke adre ne ca owakhaletâ ta je bong, me ba at ame he ka möt: ke so bi adre me he ka owakhaletâ ta je bong e ge tavat adre ûca.

²³ Ke a ne ha köbun ke at, ka habe, Wâ bi, Keriso but ang, ke, Wale bi e; ca kap öbun.

²⁴ Anyin ame he ka o je Keriso thoi, me je perofeta thoi, me adre me he ka omanenâ ta je haten ae gan, me ta je ûnyi hnân lâiâ, mʼ adre me he ka omono tavat adre me ûca a ne ca pason.

²⁵ Wâ bi, oge hia but ha bânâ köbun.

²⁶ Anyin a wale, ödra ka he ka ha köbun, ka habe, Wâ bi, e but hnyi hnyebuba, ca he thʼ öbun: ke Wâ bi, e but hnyi je hnyeûle eiö, ca kap öbun.

²⁷ Anyin a haba hucuce ame o thö ûheny jimeyö, kʼ ame umumelam jio; kʼ ame he ka helâe, e ka o hmetu Nokon at.

²⁸ Haba hnen ta je komok, me wale dok ame ûkhacaköu ta je aeto hnyin.

²⁹ Ke hwaban vec hnyi ûen eling, ame he ka ie menekholom but seûno, ke ame ca he hmetu ka melam tehi, ke ame he ka kolu but ta je okhû, ke adre me he ka jijing ta je man hnyi drany:

³⁰ me ame he ka manen hnyi drany haten Nokon at: ke ame he ka ûtengiö ta je tribu hia eang hmeledrany, ke adre me he ka wâ Nokon at ame o hon ta je ûlâiny drany, tha e me man me hmanenang ae gan hmâ.

³¹ Ke e ame he ka kunâ anyin ta je angela me ifucin khoto ame mea, me adre me he ka ûkhacaköuâ thö hnen ta je hna ûca ûnyi hnyi je ang a vak, hwân hnyi ke can drany ke ne o but ka hnyi ke can.

³² Ke nâ thʼ öbun ûhöûcû me imeta: e tiga but je anginy ke hlau je lan, me khanʼ öbun ae hakekeny jut honivakeny;

³³ ke helâe minya öbun, öbun ka wâ thö ta je ûnyi hia thithö e, khanʼ öbun dö ae hakekeny jut, ke e but ang hnyi hwanuma.

³⁴ E hnathu inya oge me ha köbun a gʼ ame ca he ka ie hia dö eang, me ame he ka hwâdâ ta je ûnyi hia e.

³⁵ Ame he ka hia drany me hmeledrany, kʼ ame ca he bi ka hia hok ta je hofuc.

³⁶ Ke haba bong me awa eling, me ba at ae khana, ke ca khana minya bi ta je angela ethö hnyi drany, ke Nokon, ke hake Kamen thibi.

³⁷ Ame he ka helâ me je bong bongu Noa ioiny Nokon at.

³⁸ Anyin a hnyi ûen ae tiga ca o thö uoû, adre me labö han me ic, me faipoipo, me ûham ta momo, ke ne o but hnyi bong Noa ame didro ka hnyi hnyin hu,

³⁹ ke ca khanʼ ödra bi ke ne o but ame o thö uoû, me ame tha ohiʼ ödra hia but; ke ame he ka helâe, e ka o hmetu Nokon at.

⁴⁰ Hnyi ûen eling ame belök li at a lo; adre me he ka hom khaca, me hnen biju khaca:

⁴¹ lo li momo ame he ka tha hnyi khenyi hwit; adre me he ka hom khaca, kʼ ame he ka hnen biju khaca.

⁴² Anyin a wale, hmâkâ thö: anyin ae ca khanʼ öbun ûen ame he ka o hnyin Tuhö-bun.

⁴³ Ke wâhmakhmeto ju öbun ûnyi ang, a ga ne wâ at ae tren uma hna hmak hnyi lit ame he ka o hnyin at ae venöu, me ame ne hia but hmâkâ, me ca hna bi kodra he ka kia umen uma.

⁴⁴ Anyin a wale laba penapena thʼ öbun: anyin a hnyi ûen öbun e ca ûnykûme bi ame he ka o but Nokon at.

⁴⁵ Ewa athnyaba ae hnathu me metâ, wale hnen tuhan hna otilâ he ka muso hnyaban, he ka khenâ jeû ködrin hnyi je hing ûen cici?

⁴⁶ Hnen hnahic athnyaba eling, e ka o tuhan ka wâ a gʼ ame ânyâ helâe.

⁴⁷ E hnathu inya oge me ha köbun, e ame he ka otilâ e he ka muso anyin ta je ûnyi hia.

⁴⁸ Ke a ne ha athnyaba ae kong eû hnyi hnyekon, ka habe, E tiga bec Tuhok;

⁴⁹ me hwân he ka kot je athnyaba a lahanen, me he ka han me ic unyin tavat adre ic me monu;

⁵⁰ me ame he ka o tuhan athnyaba eling hnyi bong e ame ca ûnykûme, me hnyi ûen e ame ca wâhmakhmeto hnyin,

⁵¹ me ame he ka subâ luâ e, me ha jekhon unyin tavat thoi hnyok; ame he ka tenge eling me ûgiö ganyon.