Mataio 23 - Iaai Bible 1901 (New Caledonia)

¹ HABA Jesu ame ha ka tavat ae se hia me laten minya ka habe,

² Haba hnyat sihnalimen me ta je Faresaio adre me laba hon je utap tabö Mose:

³ anyin a wale, haba ta je ûnyi hia thithö ödrin e he ka ha köbun he ka ânyâ, ânyâ thö, me tuö: ke ca he öbun ka ûcûcûbongoâ hwakecidrin; anyin adre me ha thibi, kʼ adre me ca ânyâ bi.

⁴ Eke, adre me hûgo ta je hok ae hmak, ke pason he ka hijen, me ip hon li bajebenyin tavat, ke ödrin bi, ödrin e ca bwebwelâ ge ke banyödrin.

⁵ Ke ödrin e ânyâ hia anyidrin ta je huliwa hnân bi wânen at: anyin ödrin e olâwâ anyidrin je filateri, me ogânâ je baten je khaûdrin,

⁶ me wedrin ta je hna laba ae beönua hnyi ta je bijeû, ke je utap ae nua hnyi ta je sunago,

⁷ me he ka nom ködrin hnyi ta je hna ûcû, me he ka haiʼ ödrin, ka habe, Rabi.

⁸ Ke haba öbun, ca he ka hawʼ öbun, ka habe, Kabi: anyin a khaca thibi at ûne köbun, ke öbun ka liamekeiny hia.

⁹ Ke ca he ka hawâ ke at eang hmeledrany, ka habe, Kamen: anyin a khaca thibi kamöbun ethö hnyi drany.

¹⁰ Ke ca he öbun ka hawʼ öbun, ka habe, Je homakan: anyin a khaca thibi homakan köbun, wale Keriso.

¹¹ Ke haba at ae gan unyibun, me ame he ka athnyabaibun.

¹² Ke adre me he ka oûhnyûkongo at ame ka ogânâ e; kʼ adre me he ka ogânâ at ame ka oûhnyukongoâ e.

¹³ Ekölö gabun hnyat sihnalimen me ta je Faresaio, hnyat thoi hnyok! anyin Öbun e hlöng dokhon drany ka at: anyin öbun e ca didro ka hnyin, ke öbun e thawâ minya tavat adre me labö didro.

¹⁵ Ekölö gabun hnyat sihnalimen me ta je Faresaio, hnyat thoi hnyok! anyin öbun e vheno köiö me hnyei he ka heleû hanöbun a khaca, ke e ka wia e, öbun e ânyâ e me me nokon gena a ibi olo nuainy hubun.

¹⁶ Ekölö gabun tavat ûsû kʼ Öbun wadröu bi, wale a tavat adre me ha, ka habe, A ne ke at ame khemanyin ûnyi ge uma kap, me ûnyi baû bi e; ke haba at ame he ka khemanyin ûnyi ge goliny uma kap, me hmâ bala but e.

¹⁷ Hnyat ae monu öbun me wadröu: anyin a ieû ae nua, a ne gol, a ne uma, wale at ame okabâ gol?

¹⁸ Ke a ne ke at ame khemanyin ûnyi ge taben hut, me ûnyi baû e; ke a ne ke at ame he ka khemanyin ûnyi ge bwihlany hon e, me e hmâ bala but a

¹⁹ Hnyat ae wadröu: anyin a ieû ae nua, hawa a ne bwihlany, a ne taben bi hut, wale at ame okabâ bwihlany?

²⁰ Anyin a wale, haba at ame khemanyin ûnyi ge taben hut, e ame khemanyin ûnyi ge e bi, me ta je ûnyi hia thithö minya adre ip ethö hon.

²¹ Ke haba at ame khemanyin ûnyi ge uma kap, me ame khemanyin ûnyi ge e bi, me ûnyi ge at minya ame laba eiö hnyin.

²² Ke haba at ame khemanyin ûnyi ge drany, e ame khemanyin minya ge theron anyin Khong, me at minya ame tabâ e.

²³ Ekölö gabun hnyat sihnalimen me ta je Faresaio hnyat thoi hnyok! anyin a öbun e ham ke hanen a libenyitainy minet, me aneto, me komina, ke öbun e hia but hna biju ta je ûnyi ae gan hnyi hnanyibu, wale hna owisa, me ibetengiö, me labageju: e ûcû öbun e ânyâ ta je ûnyi e, ke ca hna bi ta je ûnyi eang.

²⁴ Hnyat ûsû, kʼ öbun je wadröu bi, hnyat öbun e hneköien minâ, me utâ bi kamela.

²⁵ Ekölö gabun hnyat sihnalimen me ta je Faresaio, hnyat thoi hnyok! anyin öbun e hneû hoton utkaia me mini, ke haba bi hnyin, me unöngöt ge hna hûgûnâ hwali me hwakecin ae kong.

²⁶ Faresaio ae wadröu lö, hneû bânâ but hnyin utkaia me mini, me me so minya but hoton.

²⁷ Ekölö gabun hnyat sihnalimen me ta je Faresaio, hnyat thoi hnyok! anyin a öbun ûcû me ta je erkemok adre me ohawâ, ke so hmonyin at ka wâ hoton, ke haba eû hnyin, me unöngöt ge je jeien komok, me ikiki hia.

²⁸ Ke helâe, öbun ame manen wisa ka tavat, ke unöngöt dö eû hnyibun ge thoi hnyok me hulö.

²⁹ Ekölö gabun hnyat sihnalimen me ta je Faresaio, hnyat thoi hnyok! anyin a öbun e up veten je erkemok hon ta je perofeta, me omecâ je erkemok hon tavat ae wisa,

³⁰ me ha, ka habe, A ne ohmun hnyi ta je bong bongon lakamöhmun, ohmun e ca he ka hnyi hanen tavat adre me hlingâ ta je perofeta.

³¹ Waleling me öbun ka ohnathu öbun bi a öbun lakon tavat adre me hlingâ ta je perofeta.

³² Awe, öunöngötâ thö tulut anyin lakamöbun.

³³ Öbun je on lö, ke lakon je vaipa, öbun e he ka kâmâu ka kec ge hnaûhangöiny gena?

³⁴ Wâ bi, inya oge me kunâ köbun ta je perofeta me tavat ae metâ, me hnyat sihnalimen: ke öbun e he ka hlingâ me osatauroâ keihen gadrin, ke öbun e he ka osoâ keihen hnyi umöbun je sunago, me sedʼ Ödrin ûnyi hnyi ke taun ka hnyi ke taun:

³⁵ me ame he ka o but köbun dra ae wisa hia adre hingâlâ eang hmeledrany, hwân ge dra drö Abela at ae wisa, ke ne o but ka dra dro Zakaria nöku Barakia, waleji öbun e hlingâ hnyi wanben uma kap me taben hut.

³⁶ E hnathu inya oge me ha köbun, ka habe, Ame he ka o ta je ûnyi hia eling ka dö ang.

³⁷ Jerusalema, Jerusalema lö, at ame hlingâ ta je perofeta, me lûâ tavat adre me kunâ kâu! iny ibi osehia wek he ka ûkha-caköuâ lakom helâ me hinyen denakhoto ame tube lakon ge li labenyin, mʼ öbun ka höcö öbûn!

³⁸ Wâ bi adre hia but hna degecâ umöbun uma ke ba onyen.

³⁹ Anyin a inya oge me ha köbun, ka habe, Öbun e ca he hmetu ka ö nya, ke ne o but ûen öbun e he ka ha hnyin, ka habe, Hnen hnahic at ame o but hnyi ien Than.