Mataio 20 - Iaai Bible 1901 (New Caledonia)

¹ ANYIN ae ûcû dokhon drany me tuhan uma, at ame vesâkong he ka hawâ tavat huliwa ka hnyi anyin hna belökâ vine.

² Ke tha mou thö gan me tavat huliwa he ka kap ûsa khaca denari hnyi bong, me e ame kunʼ ödra ka hnyi anyin hna belökâ vine.

³ Ke e ame dit hmetu but hnyi awa a kuniny, kʼ ame wâ keihen adre me ûtitilen bâu hnyi hna ûcû;

⁴ ke e ame ha kodra, ka habe, He thʼ öbun ka hnyi hna belökâ vine, me oge me he ka bi hwaban köbun ûnyi ae ûcû. Me ödrin e he but.

⁵ Ke e ame dit hmetu but, hnyi awa a siks, ke hnyi awa a nain, kʼ ame ânyâ helâe.

⁶ Ke haba hnyi awa a eleven, e ame dit hmetu but, me wâ keihen adre me ûtitilen baû; me e ame ba kodra, ka habe, Ieû gabun öbun e ûtitilen baû ke obekhötâ bong?

⁷ Haingödra kâu, ka habe, Anyin ae ba at ame hawʼ ohmun. Ke e ame ha kodra, ka habe, He thʼ öbun minya ka hnyi hna belökâ vine.

⁸ Ke hnyi hauhaotreng, haba tuhan vine ame ba ka homakan huliwa, ka habe, Hawâ thö tavat huliwa me ham kodra hwaban, hwân ge tavat a bilidra ke ne o but ka tavat a bödra.

⁹ Me ame o but tavat adre hawâ hnyi awa a eleven, me ödrin e ve kap denari.

¹⁰ Ke ame o minya but tavat a bödra, kʼ ödrin e ûnykûme he ka kap gânâ; ke ödrin e ve kap minya denari.

¹¹ Ke adre hia but kap, me adre me ulidro tuhan uma,

¹² me ha, ka habe, Haba tavat a bilidra adre hia but huliwa khaca thibi âwâ, ke u je mâdrâ ködrin e ûcû möhmun, waleji tavat ohmun e hok hmakiny bong me kahwainy ae gan hmâ.

¹³ Ke e ame thu ka ke at gadrin, ka habe, Hanok lö, iny ca hwali köu: ʼhawa, öte ca tha thamuâ hnyi denari?

¹⁴ Hom dö ânyâm me he thö, haba wek bi he ka ham ka at a biliny e ûcû möu.

¹⁵ Hawa, e ca ûcû könya he ka ânyâ wek ge anyik ta je ûnyi? hawa e kong emakâm anyin a iny at betenge?

¹⁶ Ke helâe haba at a biliny ame he ka bân, ke haba at a bân, ame he ka biliny jut.

¹⁷ Haba Iesu ame he Jerusalema ai, me e ame saû thö me laten a twelv a hake ödrin ke, me ha ködrin eû hnyi gethen, ka habe,

¹⁸ Wâ bi, otin e he Jerusalema ai; ke adre me he ka alecuâ Nokon at ka je taben tavat bihut me hnyat sihnalimen; ke adre me he ka hahnaûhangoâ e, he ka hlingâ,

¹⁹ ke adre me he ka hna e ka Aten je hnyei he ka hluma e, me kot ge osö, me osatauroâ: ke e ame he ka möt hmetu thö hnyi bong a kuniny.

²⁰ Me ame e but kâu hinyen li laku Zebedaio tha e me li lakon, ödrin e khudrung me sumâtâ e ge ke ûnyi.

²¹ Me e ame ha ka momo, ka habe, Ieû wem? Haba momo ame ha kâu, ka habe, Ö u ha thö me me he li lakuk ang ka laba ke at hnyi ke keihâm a metâm, ke ke at hnyi ke keihâm a mem hnyi dokhom dökhu.

²² Ke haba Iesu ame thu me ha, ka habe, E ca khanʼ öbu bongon hnöbu hna sumâtâ. Hawa, e khanʼ öbu he ka ic hnyi kaia oge me he ka ijem? Haingödru ka habe, E khanʼ ohmu.

²³ Ke e ame ha ködru, ka habe, Öbu me he ka hnyi ic hnyi anyik kaia: ke haba he ka laba hnyi ke keihen metök me mek, me ca hamök bi he ka ham, ke wale hobi kâu thibi hnen Kamök hna penapena hobi kâu.

²⁴ Ke a long ut hnyat a ten me ame hmönyidrin ka li liamekeiny.

²⁵ Ke haba Iesu ame hawʼ ödrin kâu me ha, ka habe, E khanʼ öbun a hwakecin tavat adre me musö Aten je hnyei he ka hwen than hudrin, ke ame musi ödrin hnen ta je tuh-ödrin.

²⁶ Ame ca he ka helâe gabun: ke haba at ame began gabun ame he ka bi athnyaba köbun;

²⁷ ke haba at ame weny he ka bân gabun, me ame he ka bi athnyaba köbun:

²⁸ helâ me Nokon at a ca o me me he ka bi athnyaba kâu tavat, ke so bi he ka bi athnyaba me ham anyin möt hnân hwaban melen tavat ae se hia.

²⁹ Ke ödrin e tiga dit ûhedrin Jeriko me ame he tavat ae se hia hotudrin.

³⁰ Ke wâ bi, li wadröu ödru me laba hnyi baten gethen, kʼ ödru me long a gʼ ame he nulʼ ödru Iesu, me ödru me hongot, ka habe, Than a Nöku Davita lö, betenge ju gahmu.

³¹ Me ame thawʼ ödru tavat ae se hia, mʼ ödru me laba hnyibû: ke so bi ödru me hongot hwege tot, me ha, ka habe, Than a Nöku Davita lö, betenge ju gahmu.

³² Me Iesu ame todru me hawʼ ödru, me ha, ka habe, Ieû webu a oge me he ka ânyâ köbu?

³³ Haingödru, ka habe, Than lö, me me bwela but li emaköhmu.

³⁴ Me haba Iesu ame hnyok ködru, me kâlâ li emaködru: me ödru me ie bwela but me he hoton.