Mataio 16 - Iaai Bible 1901 (New Caledonia)

¹ ME ame o but ta je Faresaio me Sadukaio, me adre me cubec e me sumâtâ he ka omanenâ ke haten ûnyi hnyi drany.

² Me e ame thu kodra, ka habe, Hnyi sahac öbun e ha, ka habe, Ame he ka so drany: anyin ae dra drany.

³ Ke hnyi hnyomakatu, Ame he ka kong drany hnyi bong ang: anyin ame dra drany ke khömet. E khanʼ öbun he ka wâhmakhmetoâ bongon drany; ke ca khanʼ öbun bi be ka wâhmakhmetoâ ta je haten ta je ûen.

⁴ Ame elâm haten hnen dö ae kong kʼ ame bi ûnyi monu; kʼ adre me ca he bi ka ham kâu haten, ke so thibi haten anyi Jona perofeta. Ke e ame hnʼ ödra, me he but.

⁵ Ke ame khop dö laten hnyi ke keihen, kʼ ödrin e hnying he ka hok areto.

⁶ Haba Iesu ame ha ködrin, ka habe, O ʼbun âu ge leven anyin ta je Faresaio me ta je Sadukaio.

⁷ Me ödrin e ûhnenamököuâ, ka habe, anyin la otin e ca hok areto.

⁸ Haba Iesu ame wâhmakhmeto, me e ame ha, ka habe, Öbun hnyat labageju ûhnyûkong lö, ieû gabun öbun e ûhnenamököuâ anyin ae ba areto?

⁹ Hawa, öbun e ca wâhmakhmeto bala bi, ke öbun e ca ûnykûme bi je areto a thabûng anyin tavat a faiv thauzan, me ûseiny je tang öbun e hom?

¹⁰ Ke helâe je areto a seven anyin foa thauzan tavat me ûseiny je tang öbun e hom?

¹¹ Ieû gabun öbun e ca wâhmakhmeto a oge me ca ha köbun ge areto? Ke so bi he ka wâ âu ge leven anyin ta je Faresaio me je Sadukaio?

¹² Me ödrin e wâ ûnykûme a e ame ca ha ködrin he ka wâ leveniny areto, ke so bi ûne anyin ta je Faresaio me je Sadukaio.

¹³ Ke ame o but Iesu hnyi ke keihen hnyei Kaisaria Filipi, me e ame hnö laten, ka habe, Haba ifucin tavat ge Nokon at, me ia?

¹⁴ Haingödrin, ka habe, Haingen keihen, Ioane Bapataiso; ke haingen keihen, Elia: ke haingen keihen Jeremia, ame ne ke at hnyi ta je perofeta.

¹⁵ Ke haingen ködrin, ka habe, Ke haba ifucibun gak, mʼ iny ia?

¹⁶ Haba Simona Peteru ame thu me ha, ka habe, U thibi Keriso a Nokon Khong ae möt.

¹⁷ Ke haba Iesu ame thu me ha kâu, ka habe, Hnâm hnahic Simona Bar-Jona: anyin a ca omanenâ bi köu hnen at, ke hnen bi Kamök ethö hnyi drany.

¹⁸ Ke inya oge me ha köu, ka habe, U Peteru, ke hnyi hon veto ang, oge me he ka otilâ anyik ekalesia; ke ame ca he ka hwege ta je homagouleny hedis hon e.

¹⁹ Ke oge me he ka ham köu je kiny dokhon drany: ke haba ûnyi u me he ka ohmâ eang hmeledrany, adre me he ka ohmâ ethö hnyi drany: ke haba ûnyi u me he ka thang eang hmeledrany adre me he ka thang ethö hnyi drany.

²⁰ Me e ame ha ka laten mʼ ödrin e ca he ka ha ka ke at a e bi Keriso.

²¹ Hwân ûen e, Iesu ame hwân ka omanenâ ka laten a e ame he ka he Jerusalema ai, me vheno ta je vec ae se hia ûnyi ge wahingat, me ta je taben tavat bihut, me hnyat sihnalimen, kʼ adre me he ka hlingâ, kʼ ame he ka möt hmetu hnyi bong a kuniny.

²² Haba Peteru ame hom e, me hwân he ka thawâ, haingen, ka habe, Ekölö gam Than; adre me ca he bala ka ânyâ helâe köu.

²³ Ke e ame hwio thö me ha kö Peteru, ka habe, Satana lö, he thö ka hnyi hotuk: u at ame bijönik: anyin u je ca ûnykûme ge ta je ûnyi anyin Khong, ke ta je ûnyi thibi anyin at.

²⁴ Me Iesu ame ha ka laten, ka habe, A ne ke at ame weny he ka he hotuk, e so e ame hokhnyok, me hom anyin satauro me he hotuk.

²⁵ Anyin e haba at ame beomelö anyin möt, me ame be ka ohia e: ke haba at ame he ka hna anyin möt can inya, ame he ka hu e.

²⁶ Anyin a ieû troban ka at, a ne he ka hu kâu hmeledrany hia, ke ame bi hwaban e ge anyin möt? ke ieû hmetu ke ûnyi hnân he ka bi hwaban anyin möt?

²⁷ Anyin ame he ka o thö Nokon at hnyi hmanenanginy Kamen, tha e me anyin ta je angela, me e ame he ka ve ham ka tavat hia thitliö e ûcû me anyidra ta je huliwa.

²⁸ E hnathu, inya oge me ha köbun, haba keihen gadra adre me tot eang, adre me ca he bi ka mok, ke ne o but adre me wâ Nokon at ame he ka o hnyi dokhon dökhu.