Mataio 13 - Iaai Bible 1901 (New Caledonia)

¹ HNYI bong eling Iesu ame he ûheny hnyi uma, me laba hnyi hobatköiö.

² Me ame ûkhacaköu thö kâu tavat ae se hia, me e ame ölö thö ka hnyi hon hu me laba; ke ame utitilen tavat ae se hia hnyi baten köiö.

³ Me e ame ha kodra ta je hofuc ae se hia a deny je ûhöûcû, haingen, ka habe, Wâ bi, ame he but at belök he ka jijingâ wan;

⁴ ke e ame jijingâ, me ame kolu but ke je wan hnyi baten gethen, me ame o but ta je meno ame gâ me an dö:

⁵ ke ame kolu but keihen ka hnyi hon dok ae hudei, ke ca haki hnyi kânâ: me ame ie kû thö anyin ae ca haki kânâ:

⁶ kʼ ame o but seûno, me ame le but, me me mok, anyin ae ba iwân.

⁷ Ke ame kolu but keihen hnyi wanben ta je ûö ae ûdedö; ke ame kû takoû but hnen ta je ûö ae ûdedö:

⁸ ke ame kolu but keihen ka hnyi kânâ ae hoso, me wa but, keihen ûsa wan haded, keihen ûsa sikste, keihen ûsa thote.

⁹ Haba at ae hu hnyikonyen, long ju e.

¹⁰ Me ame o thö laten, me ha kâu, kahabe, Ieû can u je ha kodra ge ta je ûhöûcû?

¹¹ E ame thu ködrin me ha, ka habe, Adre me ham köbun he ka wâhmakhmetoâ ta je ûnyi ae iyong hnyi dokhon drany, kʼ adre me ca ham bi kodra.

¹² Anyin adre me he ka ham ka at ae hu gan, me me he ka tren gan hmâ: ke adre me he ka hom ge at ae ca hu gan bi, ûnyi e ame hu.

¹³ Anyin a wale, inya oge me ha kodra ta je ûhöûcû; anyin adre me bwela, kʼ adre me ca wâ bi, ke long, kʼ adre me ca lönghmakhmeto bi, kʼ adre me ca wâ ûnykûme bi.

¹⁴ Me hwâdâ but kodra hna perofeta hnö Isaia, ka habe, Öbun e he ka long ge hnyeköny, me ca wâ ûnykûme bi; Kʼ öbun e he ka wâ ge ecmak, me ca he bi ka khana:

¹⁵ Anyin ame khot ut hnyekon, tavat ang, Ke hmak je hnyikönyödra he ka long, Kʼ adre mook ge je emaködra; Wâ adre nye wâ ge je emaködra Me long ge je hnyikönyödra, Me wâ ûnykûme ge hnyekudra, Me hmetuhmetu but, Mʼ oge me he ka omeli ödra.

¹⁶ Ke hnahic hnen ta je emaköbun, anyin öbun e wâ, me ta je hnyikönyöbun, anyin öbun e long.

¹⁷ Anyin ae hnathu inya oge me ha köbun, ka habe, e se hia ta je perofeta me tavat ae wisa hwakecidra adre me weny he ka wâ hnobun hna wâ, kʼ adre me ca wâ bi; me be he ka long hnobun hna long, kʼ adre me ca long bi.

¹⁸ Anyin a wale long ju öbun ûhöûcû ge at ame belök.

¹⁹ E ka long ut ke at hofucin dökhu, ke ame ca wâ ûnykûme bi, me ame o but at ae kong, me hûgûnâ ûnyi adre tā eû hnyi hnyekon. Wale thibi e hna tā hnyi baten gethen.

²⁰ Ke haba hna tā hnyi dok ae hudei, wale at ame long hofuc, me ie kap senyinâ;

²¹ ke so bi e ba bi iwân eû hnyi hnyekon, kʼ ame ca kûeny tethmâ; ke ame ne o but hlöuhlöu, me ûöveci, can hofuc, me e ame ie thö thö.

²² Ke haba at adre tā hnyi wanben ta je ûö ae ûdedö, wale at ame long hofuc, ke ame kû takoû hofuc hnen je vheliny hmeledrany, me je iyawö ge omjeû, me e ame ca wa but.

²³ Ke haba hna tā hon kânâ ae hoso, wale at ame long hofuc, me wâ ûnykûme; at ame hing wa, me hu wan, keihen ûsa wan haded, ke keihen ûsa sikste, ke keihen ûsa thote.

²⁴ E ame omanenâ hmetu kodra ke ûhöûcû, ka habe, Haba dokhon drany, me ûcû me at ame tā je wan ae so hnyi iny hnyei:

²⁵ ke ame tiga mokut tavat, me ame he but iwahnaihmiöny mē, me tā takoû hwit hnen zizania, me he thö.

²⁶ Ke ame kû thö bâtân me wa, me ame manen minya but zizania.

²⁷ Me ame o but lathnyabainy at tren uma, me ha kâu, ka habe, Than lö, hawa, u je ca tā ta je wan ae so hnyi em hnyei? ke ûnyi ua bi zizania?

²⁸ Ke e ame thu me ha ködrin ka habe, Ame ânyâ e hnen iwahnaihmiony. Ke haba lathnyaba ödrin e ha kâu, ka habe, Hawa e wem ohmun e he ka oc ûkhöûnâ e?

²⁹ Ke haingen, ka habe, Ohe; wâ öbun nye tha oc dö hwit me je zizania.

³⁰ E so ödru me he ka tha kû ke ne o but hnyi ûen menu: ke haba hnyi ûen menu oge me he ka ha ka tavat menu, ka habe, Më ûkhöûnâ thö je zizania, me tha ip me ca, hnân thong degecâ: ke ip dö hwit hnyi anyik om hani.

³¹ E ame omanenâ hmetu kodra ke ûhöûcû, ka habe, Haba dokhon drany, me ûcû me wan sinapi ame hom ke at me ta hnyi iny hnyei:

³² wale thibi e wan ae ûhnyûkong hmelen ta je wan hia; ke hnyi ûen e ame kû thö me ame gan hmâ hon ta je ûö ae ometu, a ûö cici, me ûcû ka ta je meno ame gâ ethö he ka tabâ ta je vheiny.

³³ Ke e ame ha hmetu kodra ke ûhöûcû, ka habe, Haba dokhon drany me ûcû me leven ame hom ke momo me ikhâlâ hnyi hnyin falawa a kun ta tulut, ke ne o but ame tha khibi hia thö.

³⁴ Haba ta je hofuc hia e, ame ha Iesu ka tavat hnyi je ûhöûcû; kʼ ame ca fuc kodra ke ba ûhöûcû:

³⁵ me me hwâdâ thö hna ha hnen perofeta, ka habe, Oge me he ka khong ut hnyimök hnyi ta je ûhöûcû; Oge me he ka ha ta je ûnyi ae iyong hwân hnyi hna bi taben hmeledrany.

³⁶ Ke haba Iesu ame hna but tavat ae se hia, me ame didro ka hnyi uma: ke ame o but kâu laten, haingödra, ka habe, Omanenâ thö köhmun bongon ûhöûcû me zizania hnyi utkânâ.

³⁷ Me e ame thu ködrin, me ha, ka habe, Haba at ame tā wan ae so, me wale Nokon at;

³⁸ ke haba utkânâ, me wale hmeledrany; ke haba wan ae so, me wale lakon dokhu; ke haba zizania, me wale lakon at ae kong;

³⁹ ke haba iwahnaihmiony a at ame tā, me wale diabolo: ke haba menu, me wale obiny hmeledrany; ke haba tavat menu, me wale ta je angela.

⁴⁰ Ke haba zizania adre ûkhöûnâ he ka thong hnyi meic; me ame he ka helâe hnyi obiny hmeledrany.

⁴¹ Ame he Nokon at ka kunâ anyin ta je angela, mʼ ödrin e he ka ûkhöûnâ ûnyi hnyi dokhon dökhu ta je ûnyi hia adre me bi jöniny, ke tavat adre me ânyâ hulö,

⁴² me khûʼ ödrin ka hnyi thopiny meic: kʼ adre me he ka tenge me ûgiö ganyudra eling.

⁴³ Ke haba tavat ae wisa, me adre me he ka hadröngöc helâ me seûno hnyi dökhu dokhon Kamödra. Haba at ae hu li hnyikonyen, long ju.

⁴⁴ Haba dokhon drany, me ûcû me tang omjeû adre me ikhâlâ hnyi hnyei; waleji ame wâ hnen ke at, me ikhâlâ but; me e ame senyin me he but me ûcoâ anyin ta je ûnyi hia, me ûco utkânâ eling.

⁴⁵ Wale hmetu ang, haba dokhon drany me ûcû me at ûco omjeû at ame elâm ta je penina ae so:

⁴⁶ ke e ame wâ ju ke penina ae gan hwaban, me e ame mē ûco anyin ta je ûnyi hia hnân bi hwaban e.

⁴⁷ Wale hmetu ang, haba dokhon drany, me ûcû me ert adre me thong eû hnyi köiö, me ame hnok dö ta je wâ monu hia:

⁴⁸ ke ame unöngöt dö, me ödrin e lelö e ka hnyi hme; ke adre me ûlalabainy me ûkhöûnâ je wâ ae so ka hnyi je tang, me degec bi ta je wâ ae kong.

⁴⁹ Ame he ka helâe hnyi obiny hmeledrany: ame he ka he but ta je angela me kia luâ tavat ae kong me tavat ae wisa,

⁵⁰ me khûʼ ödra ka hnyi thopiny meic: adre me he ka tenge me ûgiö ganyudra eling.

⁵¹ Hawa, öbun e wâ ûnykûme ta je ûnyi hia e? Haingödrin ka habe, Eke.

⁵² Me e ame ha ködrin, ka habe, Anyin a wale, haba tavat sihnalimen hia waleji adre nâ ka hnyi dokhon drany, me helâ me at ae tren uma ame eang ta je ûnyi ae teb ûnyi me ta je ûnyi ae kueny jut ûnyi hnyi tang omjehen.

⁵³ A hia but Iesu umo ta je ûhöûcû e, me e ame he but ûheny e.

⁵⁴ Me e ame o but ka hnyi iny hnyei, me e ame nʼ ödra hnyin umödra sunago, me adre me lâiâ, me ha, ka habe, Ûnyi ua metâ eang me ta je huliwa ae man unyin at ang?

⁵⁵ Hawa, ca nokon bi at tretrau? ke ca Maria bi ien hinyen? ke hawa, ca je liamekeiny mē jia Iakobo, me Josefa, me Simona, me Juda?

⁵⁶ Ke ca eang bi unyita je lahaniny hia? Ke ûnyi ua bi ta je ûnyi hia eang gan?

⁵⁷ Ke adre me thö thö gan. Ke haba Iesu ame ha kodra, ka habe, E ca ba lung anyin perofeta, ke ka e bi hnyi iny hnyei, me anyin bi lap.

⁵⁸ Ke e ame ca ânyâ ta je huliwa ae man ae se hia eling, can anyidra ca labageju.