Mataio 10 - Iaai Bible 1901 (New Caledonia)

¹ KE e ame hawâ laten a twelv, me e ame ham ködrin musi hon ta je hanu ae kong, he ka obʼ ödra, ke he ka osoâ ta je mok hia, me ta je sēnyin hia.

² Ke walang ien ta je aposetolo a twelv, ka habe, A bö Simona, ke ien minya Peteru, ke Anederea liamekeiny mē, ke Iakobo nöku Zebedaio, ke Ioane liamekeiny mē;

³ ke Filipo, ke Batolomaio, ke Toma, ke Mataio a telona, ke Iakobo nöku Alefaio, ke Thadaio,

⁴ ke Simona at Kanana, ke Juda Isakariota, at ame alecuâ e.

⁵ Wale hnyat a twelv a kunʼ ödrin Iesu me hûna ködrin, ka habe, Ca he öbun hnyi gethen deny Aten ta je hnyei, ke ca dit bi ka hnyi ke taun anyin at Samaria:

⁶ ke so bi, he thʼ öbun ka ta je mamoe a hia hanen lap anyi Isaraela.

⁷ Ke haba hnyi ûhebun, khetâ thö me ha, ka habe, E hakekeny jut dokhon drany.

⁸ Omelö thö ta je mok, ke omelö hmetu thö tavat adre me mokcu, ke okhabalavâ but ta je lepera, ke obâ but ta je demoni: öbun e hia but kap baûâ but.

⁹ Ca hok gol, me sileva, me bras hnyi tangöbun je tangen mone;

¹⁰ me ong tang hobi kâu he ka he, me ûsa lo ûkot, me je tangen hnyeûca, me uci: anyin ae ûcû at huliwa he ka kap jeû,

¹¹ Haba ta je taun me ta je hnyaba öbun e he ka o ka hnyin, elelâm dö at ae ûcû hwakecin; ke laba ju e ke ne o but öbun e he ûheny e.

¹² Ke öbun ka didro ka hnyi ke uma, italofa ju mödra.

¹³ Ke a ne so uma eling, e so e ame ta but hon, hnobun hna ha hnahicâ e: ke a ne ca so bi, e so he ka hmetu köbun hnobun hna ha hnahicâ.

¹⁴ Ke kaba at ame ca köp öbun, kʼ ame ca long hobun ta je hofuc, awe, öbun ka didrut ûnyi hnyin uma eling ame ne taun, jijingâ but kânâiny je hnyeûcabun.

¹⁵ E hnathu, inya oge me ha köbun, ka habe, Ame he ka hâhâ ka hnyei Sodoma me Gomora hnyi bong owisa hon taun eling.

¹⁶ Wâ bi, inya oge me kunʼ öbun helâ me ta je mamoe hnyi wanben ta je luko: anyin a wale metâ but öbun helâ me ta je on, me menyik helâ me ta je biny.

¹⁷ Ke wâ eâu tavat: anyin adre me he ka hnʼ öbun dut ka tavat ûhnei, ke adre me he ka kuc öbun hnyi umödra ta je sunago;

¹⁸ eke, adre me he ka lili öbun ka hnyi hnyimakan tavat musi me ta je than can inya, hnân ohnathoâ ködrin me Aten ta je hnyei.

¹⁹ Ke ödrin ka he ka hnʼ öbun dut, ca ûnykûme bi, ka habe, adre me he ka kâmâu hna ha, ke ieû: anyin adre me he ka ham köbun ûnyi hnân he ka ha hnyi ûen eling.

²⁰ Anyin a ca öbun hnyat öbun e ka ha, ke so bi Hanon Kamöbun at ame fuc eû hnyi je hnyekubun.

²¹ Ame he keiny ka hna liamekeiny mē ka mok, ke helâe minya kamen ka nokon: kʼ ame he lakon ka tot ka kamödrin me hinyödrin, mʼ adre me he ka hlingʼ ödru.

²² Ke ame he tavat hia thithö ka hûkötö köbun can iök: ke haba at ame he ka hokhnyok ke ne o but hnyi obiny, me ame he ka möt.

²³ Ke ödra ka oveci öbun hnyi ke taun, kec dö ka hnyi ke taun: anyin ae hnathu inya oge me ha köbun, ka habe, Öbun e ca he ka vheno hia ta je taun hnyi Isaraela, ke ne o but ame o thö Nokon at.

²⁴ E ca beönua at adre nâ hon at ûne, ke ca beönua athnyabainy hon tuhan.

²⁵ E so ka at adre nâ ame ne tha ûcû me at ame nâ e, ke e ka tha ûcû hlu me tuhan. Adre ne hia but hawâ at ae tren hnyaba, ka habe, Belezebuba, hawa, adre me ca he minya ka hawâ ien aten hnyaban!

²⁶ Anyin a wale, ca ot bi gadra: anyin ae ba ûnyi adre me ikhâlâ ame ca he ka manen; ke ba minya ûnyi ae iyong adre me ca he ka wâ.

²⁷ Haba ûnyi oge me ha köbun hnyi menekholom, ha thʼ öbun hnyi melam: ke haba hnobun hna long ge je hnyikönyöbun, khetâ thö hon ban je uma.

²⁸ Ke ca ot bi ge tavat adre me hlingâ unyin, ke ca khanʼ ödra bi he ka hlingâ hanu: ke so he ka outen at ae khana he ka ohnaûhangoâ unyin me hanu hnyi gena.

²⁹ Hawa, adre ca ûco li wahelö hwaban asari? ke ba at gadru ame he ka kolu ka hnyi hon kânâ, e ka ca musi bi Kamöbun:

³⁰ ke adre hia but aû hia je leûnen böbun.

³¹ Anyin a wale, ca he öbun ka ot, anyin a öbun beönua hon ta je wahelö ae se hia.

³² Anyin a wale, haba at ame he ka haiö nya hnyi hnyimakan tavat, me oge me he bi nya ka hâiâ e hnyi hnyimakan Kamök ethö hnyi drany.

³³ Ke haba at ame he ka ivinö nya hnyi hnyimakan tavat, me oge me he bi nya ka ivinoâ e hnyi hnyimakan Kamök ethö hnyi drany.

³⁴ Ca ûnykûme bi öbun, ka habe, oge me o but he ka kunâ ûsoköu ka hnyi hmeledrany: oge me ca o but he ka kunâ fao-köu, ke so bi hele vat.

³⁵ Anyin oge me o but me me he ka imouköu nokon me; kamen, ke hlu me hinyen, ke ûngon me ûngon:

³⁶ ke haba ta je iwahnaihmiony me at, me ame he ka e bi hnyi hnyaban.

³⁷ Haba at ame betenge ka kamen me hinyen huk, me ca ûcû könya; ke haba at ame betenge ka nokon baga me nokon hlo huk, me ca ûcû könya.

³⁸ Ke haba at ame ca hom bi anyin satauro me he hotuk, me ca ûcû könya.

³⁹ Haba at ame wâ anyin möt, me ame he ka ohia e; ke haba at ame ohia anyin möt can inya, me ame he ka wâ e.

⁴⁰ Haba at ame köp öbun, me ame köp nya minya, ke haba at ame köp nya, me ame kap at a kunö nya.

⁴¹ Haba at ame kap perofeta hnyi ien perofeta, me ame he ka hu kâu hwaban perofeta; ke haba at ame kap at ae so hwakecin hnyi ien at ae so hwakecin, me ame he ka hu hwaban at ae so hwakecin.

⁴² Ke haba at ame he ka habelen at ae ûhnyûkong eang ge utköiö ae katebu thibi, hnyi ien at ûling, e hnatho inya oge me ha köbun, ka habe, ame ca he ka hia hwaban hobi kâu.