Mareko 9 - Iaai Bible 1901 (New Caledonia)

¹ KE e ame ha kodra, ka habe, E hnathu, inya oge me ha köbun, ka habe, Haba ke je hnyat adre me tot eang, me adre me ca he ka mē mok ke ne o but adre me wâ dokhu dokhon Khong ame he ka o me man.

² Ke hwaban ta bong a siks Iesu ame hum Peteru me Iakobo, me Ioane, me su ödrin ka hnyi bucen ae beû a hake ödrin ke: ke e ame ke bongon dut hnyi hnyimaködrin:

³ me ame hadröngöc ut anyin ûkhaû, me hau hmonyin; e ca khana ke at eang hmeledrany a at kot mano he ka ohawâ but helâe.

⁴ Ke haba Elia me Mose ödru me manen ködrin, me tha ûhne-namö me Iesu.

⁵ Ke haba Peteru ame ha kö Iesu, ka habe, Rabi, e so otin e laba ang; ke ohmun e he ka otilâ ke je uma menâ a kun, hnân hobi köu khaca, ke hobi kö Mose khaca, ke hobi kö Elia khaca.

⁶ Anyin ae ca khana ûnyi he ka ha; anyin ödrin e ot gan hmâ.

⁷ Ke ame o thö ke ûlâ me tubi ödrin: me ame o but hofuc ûnyi hnyi hnyin ûlâ, ame ha, ka habe, Walang Nokuk a oûnykûmik: long ju öbun kâu,

⁸ Ke ödrin e ie bwele igigilo ke ba hmetu ke at ödrin e wâ, ke hake Iesu thiju unyidrin.

⁹ Ke ödrin e tiga utut ûhedrin hon bucen, me e ame hûna ködrin mʼ ödrin e ca he ka omanenâ hnödrin hna wâ, e me mē möt hmetu thö Nokon at ûheny hnyi hna mok.

¹⁰ Me ödrin e kât hmâ hofuc e, me ûhnenamököuâ ka habe, Ieû bongon möt hmetu ûheny hnyi hna mok.

¹¹ Ke ödrin e hnö e, ka habe, Haingen hnyat sihnalimen, ka habe, Ame he ka bö Eha ka o.

¹² Ke e ame ha ködrin, ka habe, E hnathu a bö Elia ka o, me ohâtâ ta je ûnyi hia: ke adre sihnalimen ahö ge Nokon at a e ame he ka vheno ta je vec ae se hia me adre me he ka oûnyibâûâ e?

¹³ Ke inya oge me ha köbun, ka habe, A hia but o Elia, ke adre hia but ânyâ kâu wedra minya, helâ me hna sihnalimen gan.

¹⁴ Ke ödrin e o but ka laten, me ödrin e wâ tavat ae se hia igigili ödrin, me hnyat sihnalimen adre me ûhnenamö mödrin.

¹⁵ Ke a wâ but e hnen tavat ae se hia, adre me ie lâiâ, me wadring kâu he ka iouny so mē.

¹⁶ Ke e ame hnei ödra, ka habe, Ieû anyibun ûhnenamö mödrin?

¹⁷ Me ame thu kâu hnen ke at ge tavat ae se hia, ka habe, At ûne lö, inya oge me hom köu nokuk, a delec hnen hanu ae hum;

¹⁸ ke haba hnyi je dok e ame hom e ka hnyin e ame sa e hnyikânâi: ke e ame hûlûhangöc dö, me ûk ut ganyon, me aû tot: ke oge me ha ka lâtâm he ka obâ e; ke ca khanʼ ödrin.

¹⁹ Me e ame thu ködrin, ka habe, Dö ame ca labageju lö, oge me he ka tha inya möbun ke ne o but kehö? oge me he ka hokhnyoki öbun ke ne o but kehö? hö jem könya.

²⁰ Me adre me hom e kâu: ke a wâ but e, me haba hanu ame ie kia but e; ke e ame ta hon kânâ me sesebila, kʼ ame hûlûhangöc dö.

²¹ Me e ame hnö kamen, ka habe, A o kehö ûnyi ang kâu? Ke haingen, ka habe, Hwân ke tiga wanakat.

²² Ke e ame ibi ose khûâ e ka hnyi meic, me ka hnyi köiö minya, he ka hlingâ e: ke a ne khanö u, me ö u betenge gahmun, me hadruʼ ohmun.

²³ Haba Iesu ame ha kâu, ka habe, A ne khanö u bi! E khana ta je ûnyi hia hnen at ame labageju.

²⁴ Me ame ie fuc kamen wanakat, me ha, ka habe, Inya oge me labageju; ö u hadruâ anyik calabageju.

²⁵ A wâ but Iesu tavat ae se hia adre me wadring ûkhacaköu, me e ame thawâ hanu ae kong, me ha kâu, ka habe, U hanu ae hum me wejiji lö, inya oge me hûna köu he ka didrut ûhem hnyi hnyekon, ke ca delec hmetu bala bi.

²⁶ Me e ame kuku me seset, me didrut: ke haba wanakat, me ame ûcû me at a mokcu; me ame ha tavat ae se, ka habe, A mokcu.

²⁷ Ke haba Iesu ame lelö thö hnyamen, me otilö thö e; me e ame tot.

²⁸ Me e ame didro hnyin uma ai, me ame hnö duöngâ e hnen laten, ka habe, E ca khanʼ ohmun he ka obâ e.

²⁹ Me e ame ha ködrin, ka habe, Ame ca dit thibut ûnyi a helâe, ke so bi ûnyi ge hic.

³⁰ Ödrin e he but ûhedrin e, me he hnyi wanben Galilaia; ka ca weny bi he ka manen ka ke at.

³¹ Anyin a e ame nâ laten, me ha ködrin, ka habe, Adre me he ka hna Nokon at ka hnyi je hnyamen tavat, kʼ adre me he ka hlingâ e; ke hwaban hna hlingâ e, me e ame he ka möt hmetu hnyi bong a kuniny.

³² Ke ödrin e ca wâhmakhmeto bi hofuc eling, ke ödrin e ot minya he ka hnö e.

³³ Ke ödrin e o but hnyi Kaperenauma: ke wale eiö hnyin uma, me e ame hnei ödrin, ka habe, Ieû öbun e iwatretra gan eû hnyi gethen?

³⁴ Ke ödrin e laba hnyibû: anyin a ödrin e hia but iwatretra eû hnyi gethen ge at ae beönua.

³⁵ Ke e ame laba ju me hawâ hnyat a twelv me ha ködrin, ka habe, A ne hu at ame bebân gabun, e ame he ka biliny me bi athnyaba ködrin hia.

³⁶ Ke e ame hom ke wanakat me ip e hnyi wanbödrin: ke e ame kap e ge li benyen, me ha ködrin, ka habe,

³⁷ Haba at ame he ka kap ke wanakat a helâng hnyi iök, me e ame kop nya: ke haba at ame kop nya, ame ca hake kop nya, ke at minya bi a kunö nya.

³⁸ Ioane ame ha kâu, ka habe, At ûne lö, ohmun e wâ but ke at ame obâ je demoni hnyi iâm, me ohmun e thawâ e: anyin a e ame ca he hotutin.

³⁹ Ke haingö Iesu, ka habe, Ga thawâ bi e, anyin ae ba at ame ânyâ ke huliwa ae man hnyi iök, me ame he ka ie haikongu nya.

⁴⁰ Anyin a haba at ame ca iwahnaihmiony mötin, me ame tha hien mötin.

⁴¹ Anyin a haba at ame he ka habelibun ge utköiö, anyin a je lahanö Keriso öbun, e hnathu, inya oge me ha köbun ame ca he ka hia hwaban e.

⁴² Ke haba at ame he ka othöâ thö ke at ae ûhnyûkong eang ame labageju könya, me so kâu adre ne öhvekinyâ hnyi hwagenyin veto hnân oamamâ, me khûâ but kâû ka hnyi köiö.

⁴³ Ke a ne bi jönâm hnyamâm, suba degecâ but: anyin ae so köu he ka dit ka hnyi möt, ke hia hnyamâm, hon he ka dit me li hnyamâm hnyi gena, ka hnyi meic ame ca mok.

⁴⁵ Ke a ne bi jönâm hnen cam, subâ degecâ but: e me so but köu he ka dit ka hnyi möt ke hia cam, hon he ka khûö u me li cam hnyi gena.

⁴⁷ Ke a ne bi jönâm emâkâm, ûâ degecâ thö: e me so bi köu he ka dit ka hnyi dokhu dokhon Khong ke khaca biju emâkâm, hon he ka khûö u me li ecmak hnyi gena;

⁴⁸ waleji ame ca mok bi hnyin anyidra biget, ke adre ca ume meic.

⁴⁹ Anyin adre me he ka sâltâ tavat hia ge meic.

⁵⁰ E so sâlt: ke a ne hia but hnân ohinyâ sâlt, öbun e he ka kâmâu ka ohinyâ hmetu e? E so e hu sâlt eû hnyi je hnyekubun, me laba ûsoköu ju öbun.