Mareko 8 - Iaai Bible 1901 (New Caledonia)

¹ HABA hnyi je bong eling, me e hu hmetu tavat ae se hia hmonyin, ke ba ö ʼdra, me e ame hawâ laten me ha ködrin, ka habe,

² Inya oge me betenge ge tavat ae se hia, anyin a ödra bong kun dut unyik, ke ba ö ʼdra:

³ ke oge ne he ka kunʼ ödra ka hnyi umödra je uma ke ödra mekihnânem, me adre me he ka momonu eû hnyi gethen; anyin a sâkâû ta je dok a mwi hnyin keihen.

⁴ Haba laten ödrin e thu kâu, ka habe, ûnyi ua adre me he ka osekunâ tavat ang ge areto hnyi hnyebuba eang?

⁵ Ke e ame hnei ödrin, ka habe, Ve ta areto gabun? Haingödrin, Seven.

⁶ Me e ame hûna ka tavat ae se hia he ka laba ju hon kânâ: ke e ame hom je areto a seven, ke hwaban hna oleâ e ame thuthu, me ham ka laten, he ka ip hnyi hnyimakodra; me ödrin e ip hnyi hnyimakan tavat ae se hia.

⁷ Ke e unyidrin minya ke je wâ ae ûhnyûkong: ke hwaban hna oleâ, e ame ûkhûnöng he ka ip minya e hnyi hnyimakodra.

⁸ Ke adre me han me ame sekudra thö: me adre me hom dö je kolon hna han seven ta je tang.

⁹ Ke helâ me foa thauzan tavat, me e ame kunʼ ödra.

¹⁰ Ke e ame ie ölö thö ka hnyi hon hu tha e me laten, me he ka hnyi ke keihen Dalemanutha.

¹¹ Ke ame o but ta je Faresaio me hwân he ka hnö e, adre me elâm gan haten ûnyi hnyi drany he ka cubec e.

¹² Ke e ame mâng hwege eû hnyi hnyekon me ha, ka habe, Ieû ge do ang adre me elâm haten? e hnathu inya oge me ha köbun ka habe, Adre me ca he ka ham haten ka dö ang.

¹³ Ke e ame hnʼ ödra but, me ölö hmetu hon hu ai, me kec ka hnyi ke keihen.

¹⁴ Ke ödrin e hnying hok kamec; khaca thibi areto unyidrin hon hu.

¹⁵ Ke e ame hûna ködrin, ka habe, E, ö ʼbun aû ge leven anyin ta je Faresaio me leven anyi Heroda.

¹⁶ Me adre me ûhnena-mököuâ, ka habe, E ba jeû gatin.

¹⁷ Ke haba Iesu ame wâhmakhmeto, me e ame ha ködrin, ka habe, Ieû gabun öbun e ûhnenamököuâ, ka habe, anyin ae ba ö ʼbun? hawa öbun tiga ca wâ, me wâhmakhmeto? e khot bala bi je hnyekubun?

¹⁸ E hu li emaköbun, kʼ öbun e ca wâ bi? ke hu li hnyikönyöbun, kʼ öbun e ca long bi? ke öbun e ca ûnykûme bi?

¹⁹ Haba ji ge hnok hna thuthu je areto a thabûng ka tavat a faiv thauzan, ve ta tang a unöngöt a kolon öbun e hom? Haingödrin kâu, ka habe, Twelv.

²⁰ Me je areto a seven ka tavat a foa thauzan, ve ta tang a kolon a unöngöt öbun e hom? Haingödrin, ka habe, Seven.

²¹ Me e ame ha ködrin, ka habe, Öbun e ca wâhmakhmeto bala bi?

²² Ke ödrin e o but hnyi Bethesaida. Ke adre me hom but kâu at ae wadröu, me sumâtâ he ka kâlâ e.

²³ Me e ame hom hnyamen at ae wadröu, me lelö thö e ka hnyi hoton taun; ke a hia but hangöjâ li emakan, me ip li hnyamen hon, me e ame hnö e, ka habe, U me wâ ke ûnyi?

²⁴ Ke e ame bwele thö me ha, ka habe, Inya oge me wâ tavat; anyin oge me ö ʼdrin helâ me je ûö, adre me he.

²⁵ Ke e ame ip hmetu li hnyamen hon li emakan; ke e ame wâ hmâ, me ame so but, me wâ wia ta je ûnyi hia.

²⁶ Me e ame kunâ e ka hnyi hnyaban, me ha, ka habe, Ca mē dit bi ka hnyi taun.

²⁷ Haba Iesu ame tha he me laten, ka hnyi je ong taun hnyi Kaisaria Filipi: ke eû hnyi gethen e ame hnö laten, me ha ködrin, ka habe, Haba ifucin tavat gak, mʼ iny ia?

²⁸ Me ödrin e thu kâu, ka habe, Ioane Bapataiso: me keihen, ka habe, Elia; me keihen, ka habe, Hanen je perofeta.

²⁹ Ke e ame hnei ödrin, ka habe, Haba ifucibun gak, mʼ iny ia? Haingö Peteru ame thu kâu, ka habe, U thibi Keriso.

³⁰ Me e ame hûna ködrin, mʼ ödrin e ca ha bi ka ke at.

³¹ Ke e ame hwân he ka nʼ ödrin, a gʼ ame he Nokon at ka vheno ta je vec ae se hia, kʼ ame he ka oûnyibâûâ e ge wahingat, me je taben tavat bihut, me hnyat sihnalimen, ke adre me he ka hlingâ e, kʼ ame he bi ka möt hmetu hwaban kun ta bong.

³² E ame ha manenâ hofuc eling. Ke haba Peteru ame lelö thö e me hwân he ka thawâ e.

³³ Ke e ame hwio thö me wâ laten, me e ame thawo Peteru, me ha, ka habe, Satana lö, he thö ka hnyi hotuk: anyin a u je ca wâ ûnykûme ta je ûnyi anyin Khong, ke so thibi ta je ûnyi anyin at.

³⁴ Ke e ame hawâ tavat ae se hia me laten minya, me ha kodra, ka habe, A ne hu ke at ame weny he ka he hotuk, e so e he ka hamen hokhnyok, me hom anyin satauro me he hotuk.

³⁵ Anyin a haba at ame beomelö anyin möt, me ame he ka ohia e; ke haba at ame he ka hna anyin möt can inya me evangelia, me e ame he ka omelö e.

³⁶ Anyin a ieû troban ka at ame ne hom hmeledrany hia me me anyin bi, kʼ ame he bi ka hna but anyin möt?

³⁷ Ke ieû ke ûnyi ae ûcû ka at he ka ham hnân ûco anyin möt?

³⁸ Haba at ame he ka hmehma gak me hok ta je hofuc hnyi dö ang, a dö bi ûnyi monu, kʼ ame ânyâ ta je hulö, me ame he bi Nokon at ka hmehma gan hnyi ûen e ame tha o me ta je angela ae kap hnyi hmanenanginy Kamen.