Mareko 7 - Iaai Bible 1901 (New Caledonia)

¹ KE ame ûkhacaköu thö kâu ta je Faresaio, me keihen hnyat sihnalimen, waleji adre me o ûhedra Jerusalema,

² ke adre me wâ keihen laten ödrin e han ö ʼdra jeû ge je hnyamödrin ae kong, wale ödrin e ca hinyem.

³ Anyin ame ca han ta je Faresaio me at Juda hia, adre ne ca bödra ka hinyem wia, kʼ adre me kap hofuc vejec ûnyi ge wahingat:

⁴ ke ûhedra hnyi hna ûcû adre me ca han, ödra ka ca bödra ka soû: ke se hia ta je ûnyi adre me kap me hom, wale he ka hneû ta je utkaia, me je kaia hnân tuluto, me je kaia bras.

⁵ Haba ta je Faresaio me hnyat sihnalimen adre me hnö e, ka habe, Ieû ge lâtâm adre me ca hnu hoton hwakecin wahingat, wale a ödrin e han ge je hnyamödrin ae kong?

⁶ Me e ame ha ködrin, ka habe, E so hna perofeta hnö Isaia gabun hnyat thoi hnyok, ka habe, Haba tavat ang adre me oganö nya ge je esongodidra, Ke ûsâkâûö mönya je hnyekudra.

⁷ Ke ûnyi baû bi hnödra hna khudrung könya, Kʼ adre me nâ ta je hna ûne hnen tavat.

⁸ Öbun e hna degecâ hnanyibu anyin Khong, me kât hmâ je hna ûne hnen at.

⁹ Haingen ame ha kodra, ka habe, Öbun hwege ka degec ut hnanyibu anyin Khong, mʼ öbun e he ka vheno hnobun je hna ûne.

¹⁰ Anyin a haingö Mose, ka habe, Ogânâ kâmâm me hinyâm; ke, Haba at ame he ka haikongoâ kamen me hinyen, me adre me he ka hlingâ e:

¹¹ ke haingöbun, ka habe, Haba at ame he ka ha ka kamen me hinyen, ka habe, Haba anyik ta je ûnyi hnân hom hadruo u, me, Korabana, walang bongon, Adre me ham ka Khong;

¹² ke öbun e ca hna hmetu bi e he ka ânyâ ke ûnyi hobi kâu kamen me hinyen;

¹³ wale öbun e ohia hofuc hwan Khong ge hnobun je hna ûne, waleji öbun e nâ: ke se hia ta je ûnyi helâe öbun e labö mâdrâ.

¹⁴ Ke e ame hawâ hmetu tavat ae se hia, me ha kodra, ka habe, Ling nya ju öbun hia, me wâhmakhmeto:

¹⁵ e ba ûnyi ûheny hnyi hoton at ame dit ka hnyi hnyekon, ae khana he ka okongoâ e: ke haba ta je ûnyi ame didrut gan ame he ka okongoâ at.

¹⁷ Ke e ame dit hmetu thö hnyin uma ai, ûheny unyin tavat ae se hia, me haba laten adre me hnö e ge ûhöûcû.

¹⁸ Ke e ame ha ködrin, ka habe, Hawa, e ba minya gabun hna wâhmakhmeto? öbun e ca wâ ae ba ûnyi ûheny hnyi hoton ame dit ka hnyi hnyekon at, ae khana he ka okongoâ e?

¹⁹ anyin a e ame ca dit ka hnyi oûnykûm, ke so bi ka hnyi tang tiny, me didrut ka hnyi hnyot? E ame ha helâe, me haisoâ ta je jeû hia.

²⁰ Ke haingen, ʼ ka habe, Haba ûnyi ame didrut ûheny hnyi hnyekon at, wale ame okongoâ at.

²¹ Anyin a ûheny hnyin, wale ûheny hnyi hnyekon tavat, ame didrut je hna ûnykûme ae kong, me bi ûnyi monu,

²² me venöu, me ûhlingö, me venâu âiân ke at, me benyekon, me hwakecin ae kong, me iyawö, me hwakecin ae ikiki, me ihuhnyinköu, me hwege hnyem, me hop, me hwen monu:

²³ haba ta je ûnyi hia eling ae kong ame dit ûheny hnyi hnyok, me ame okongoâ at.

²⁴ Ke e ame todrö ûheny e, me he ka hnyi hnyigoulen Turo me Sidona. Ke e ame dit ka hnyi ke uma, me weny adre me ca he tavat ka wâ e: ke ca khana bi he ka oiyongâ.

²⁵ Ke ame long ut ke momo ae hu nokon hlu a delec hanu ae kong, me e ame o but me ta ju hmelen li can.

²⁶ At Heleni momo, a mâtrân at Surofoinike. Me e ame sumâtâ e he ka obâ demoni ûnyi ge nokon hlu.

²⁷ Ke e ame ha ka momo, ka habe, E mē sekon dö lakon: anyin ae ca so he ka hom jeû an lakon, me khûâ ka ta je kuli.

²⁸ Ke haba momo ame thu kâu, ka habe, Eke, Than lö: haba je kuli adre me labö an hmelen laulau je kolon jeû an lakon.

²⁹ Me e ame ha ka momo, ka habe, Can hofuc e, he thö, a hia but demoni ûnyi hnyi hnyekon nokom hlu.

³⁰ Haba momo ame he but ka hnyi umen uma, me wâ wanakat ame mokut hon hna mokut, ke hia but demoni.

³¹ Me e ame he hmetu ûheny hnyi je hnyegöulen Turo, me vheno Sidona ke ne o but hnyi köiö Galilaia, wanben je hnyigoulen Dekapoli.

³² Me adre me hom but kâu at ae wejiji ke teta minya hwan; me adre me khöû kâu he ka ip hnyamen hon.

³³ Me e ame lelö thö e ûheny unyin tavat ae se hia, me inâ li banyen ka hnyi li hnyikonyen, me e ame hangöjâ, me kâlâ bohmen;

³⁴ ke e ame bwele thö hnyi drany ai, me mâng, me ha kâu, ka habe, Efatha, haba bongon, khong ut.

³⁵ Me ame lany jut li hnyikonyen, me ok ut toiny bohmen, me e ame fuc wisa.

³⁶ Ke e ame hûna kodra, mʼ adre me ca he bi ka omanenâ: ke haba hoton hnen hna hûna hwegiâ kodra, me helâe minya adre me hwege ka omanenâ e.

³⁷ Me adre me lâiâ gan hmâ, me ha, ka habe, E so hnen hna ânyâ hia: e ame olöngâ ta je wejiji, me ofucâ ta je hum.