Mareko 6 - Iaai Bible 1901 (New Caledonia)

¹ ME e ame he but ûheny e; me e ame o ka hnyi iny hnyei; ke haba laten ödrin e he hoton.

² Ke ame o thö bong sabath, me e ame hwân ka ûne hnyin sunago: ke ame long e tavat ae se hia, me adre me lâiâ, me ha, ka habe, Ûnyi ua ta je ûnyi ang ge at ang? ke, Ieû metâ adre ham ka at ang, ke ehö ge ta je huliwa ae man helâe a ânyâ ge li hnyamen?

³ Ca at tretrau at ang, wale nöku Maria, ke liamekeiny me Iakobo, me Jose, me Juda, me Simona? ke hawa, ca e bi ang unyita je lahaniny hia? Me adre me thö thö gan.

⁴ Haingö Iesu kodra, ka habe, E ca ba bi lung anyin perofeta, ke ka e bi hnyi iny hnyei, ke unyin je lahanen, ke hnyi hnyaban.

⁵ Ke ca khana bi he ka ânyâ eling ke huliwa ae man, ke e ame ip thibi hnyamen hon ke ta je komok me omeli ödra.

⁶ Ke e ame lâiâ can anyidra ca labageju. Ke e ame vheno igigilo je taun he ka ûne.

⁷ Ke e ame hawâ hnyat a twelv, me hwân he ka kunʼ ödrin, a ödrin ûcû lo; ke e ame ham ködrin musi hon ta je hanu ae kong;

⁸ me e ame hûna ködrin, ka habe, Ca hom ke ûnyi hobi kâu he, ke uci thibi; e ba kamec, ke ba tang, ke ba minya mone hnyi tangen;

⁹ ke bi taben je hnyeûcadrin, ke e ame ha minya, ka habe, Ca khâvâ bi lo li ûkot.

¹⁰ Haingen ame ha ködrin, ka habe, Haba uma öbun e he ka dit ka hnyin, laba ju e ke ne o but öbun e hmetu but ûheny e.

¹¹ Ke haba dok ame ca he ka kop öbun, kʼ adre me ca ling öbun, öbun ka he but ûheny e jijingâ but kânâiny hnyeûcabun me hnân haten kodra.

¹² Me ödrin e he but, me khetâ, ka habe, hamen tavat he ka ietra.

¹³ Ke se hia ta je demoni ödrin e obâ, ke se hia tavat a ödra tren mok, ödrin e hû ge wakaco, me omeli ödra.

¹⁴ Ke a long ut gan Heroda than; anyin ame lung ien: me e ame ha, ka habe, A möt hmetu thö Ioane bapataiso ûheny hnyi hna mok, anyin a wale ame huliwa ta je man eang ûnyi gan.

¹⁵ Ke haingen keihen, ka habe, Elia ling. Ke haingen keihen, ka habe, Perofeta ling, helâke at a hanen je perofeta.

¹⁶ Ke a long ut Heroda gan, me e ame ha, ka habe, Ioane ling, waleji oge sö degecâ ban, e a möt hmetu thö.

¹⁷ Anyin a hia but Heroda ûkhûnöng he ka kot Ioane, me ip e hnyi uma ceat, ca Herodia öiö Filipo liamekeiny mē: anyin a e ame hom e me âiân.

¹⁸ Anyin a haingö Ioane kö Heroda, ka habe, E ca ûcû bi köu he ka hom âiân liamekeiny möu.

¹⁹ Ke ame hmönyi Herodia kâu, me behlingâ e; ke ca khana bi;

²⁰ anyin a Heroda ame outö Ioane, ame wâhmakhmeto e, a e at ae wisa me kap, me e ame tuö e. Ke hnyi ûen e ame long ifucin, me e ame hlohlo gan hmâ; ke e ame long senyinâ hwan hofuc.

²¹ Ke ame o but bong ae ûcû Heroda ame ânyâ bijeû hnyi sahaciny bong adre hnokoâ e hnyin, ka anyin je homakan, me je taben vat ae nua, me ta je taben at Galilaia;

²² me ame didro hlu nöku Herodia me biâ, me e ame osenyini Heroda me tavat adre me tha laba mē; me haba than ame ha ka hlu, ka habe, Ha thö könya wem, me oge me he bi nya ka ham köu.

²³ Me e ame khemanyin kâu, ka habe, Oge me he ka ham köu hnâm hna he ka ha könya ke ne o but hnyi ke keihen a hafiny dökhuk dokhu.

²⁴ Ke e ame didrut me ha ka hinyen ka habe, Ieû oge me he ka ha! Haba momo ame ha, ka habe, Bö Ioane bapataiso.

²⁵ Me e ame ie dit logot hmetu thö ka than me sumat me ha, ka habe, Inya oge me wek u me he ka ham könya walang ang bö Ioane Bapataiso hnyin mini.

²⁶ Me ame hmak ut hnyekon than, ke ûnyi bi ge hna khemanyin, me ge tavat adre me tha laba mē, e ame ca behânâ kâu.

²⁷ Haba than ame ie kunâ ke soja hanen tavat tue, me hûna he ka hom ban: me e ame he but me subâ nyi Ioane hnyin uma ceat,

²⁸ me hom ban hnyin mini, me ham ka hlu; ke haba hlu ame ham bi ka hinyen.

²⁹ Ke e khana but laten, me ödrin e he me hom unyin, me ip hnyi erkemok.

³⁰ Haba je aposetolo ödrin e ûkhacaköu kö Iesu; me ödrin e omanenâ kâu ta je ûnyi hia ödrin e hia but ânyâ, me ta je ûnyi ödrin e hia but ûnö.

³¹ Ke haingen ködrin, ka habe, Ai öbun ka hnyi dok ae ba aten he ka mē menâ. Anyin ae se hai tavat adre me o me be hmetu, ke ba ûen ködrin he ka han.

³² Me ödrin e kec hon hu ka hnyi ke dok ae ba aten.

³³ Ke a wâ but tavat ödrin e kec ut, ke se hia tavat adre me wâhmakhmeto ödrin, me adre me tha wadring hot ûnyi hnyi ta je taun, me bödra ke bilidrin bi.

³⁴ Ke e ame o but me wâ tavat ae se hia hmonyin, me e ame betenge gadra, anyin a ödra ûcû me ta je mamoe ae ba at ame tuö: me e ame hwân he ka nʼ ödra ge ta je ûnyi ae se hia.

³⁵ Ke haba hnyi sahac ame he but kâu laten me ha kâu, ka habe, Hnyebuba ang, ka sahac ut:

³⁶ kunʼ ödra thö, mʼ adre me he ka he ka hnyi je taun me je hnyaba igigilo he ka ûcû ö ʼdra bi.

³⁷ Ke e ame thu ködrin, ka habe, Ha ö ʼdra bi öbun. Hai-ngödrin kâu, ka habe, Hawa, ohmun e he ka he me ûcû areto a tu haded je denari hwaban, me hnân ha ö ʼdra?

³⁸ Ke e ame ha ködrin, ka habe, Ve ta areto gabun? he thö ka wâ. Ke ödrin e wâ but, me ödrin e ha, ka habe, Thabûng, ke lo li wâ.

³⁹ Ke e ame hûna a gʼ adre me he ka laba hia hnyi je deo lap hon hnaonying ae but.

⁴⁰ Ke adre me laba gaga a ûsa wan haded, me ûsa fifte.

⁴¹ Ke e ame hom je areto a thabûng, me li wâ, me bwele hnyi drany ai, me oleâ, me thuthu je areto; me e ame ham ka laten, mʼ ödrin e he ka ip hnyi hnyimakodra; ke e ame khenâ li wâ kodra hia.

⁴² Ke ödra hia adre me han me ame sekudra ju.

⁴³ Ke adre me hom dö je kolon hna han me öunöngotâ je tang a twelv, me hanen je wâ minya.

⁴⁴ Ke baba tavat adre me han je areto, me faiv thauzan obaga.

⁴⁵ Ke e ame ie kunâ laten he ka laba hon hu, ke bodrin ka kec ka hnyi ke keihen Bethesaida ai, me e ame he ka kunâ tavat ae se hia.

⁴⁶ Ke a hia but ûhûne mödra, me e ame he ka hnyi bucen he ka hic.

⁴⁷ Hnyi sahac, ke tiga e hu hnyi wanben köiö, ke hake e biju hot.

⁴⁸ Me e ame ö ʼdrin, kʼ ödrin e mokhon dut galu, anyin a esang, ke haba hnyi hna hmak a vak hnyi lit, me e ame o but ködrin ame he hon köiö; helâke ame he but ka khaletʼ ödrin:

⁴⁹ ke ödrin e wâ but e, kʼ ame he hon köiö, me ödrin e ûnykûme, ka habe, Hanu jo, me ödrin e kuku:

⁵⁰ anyin a ödrin hia ödrin e wâ e, me hlohloâ. Ke e ame ie ha hofuc ködrin, ka habe, Hwege thö: inya thibi; ca ot bi.

⁵¹ Ke e ame ölö thö ködrin ka hnyi hon hu; me ame ta but hau: me ödrin e lâiâ gan hmâ hnyi je hnyekudrin;

⁵² anyin a ödrin e ca ûnykûme je areto, ke e khot je hnyekudrin.

⁵³ Ke ödrin e kec ka hnyi ke keihen me ödrin e khop dö hnyi hnyei Genesareta, me un dut.

⁵⁴ Ke ödrin e utut ûhedrin hon hu, me ame ie wâhmakhmeto e hnen tavat,

⁵⁵ me adre me wadring igigilo hnyei eling hia, me hwân he ka vadren ta je komok hon ta je hna mokut ka hnyi dok waleji adre me long a e bi hnyin.

⁵⁶ Ke haba hnyi ta je dok hia e ame o ka hnyin, ame ne je hnyaba, ame ne je taun, ame ne ta hnyei, me adre me ip ta je komok hnyi je dok adre me ûcû omjeû hnyin, ke adre me khöû kâu mʼ adre me he ka kâlâ e, ame ne obiny thibi anyin ûkhaû: ke haba tavat hia thithö adre me kâlâ e, me adre me möt ut.