Mareko 15 - Iaai Bible 1901 (New Caledonia)

¹ A HNYOMAKATU but, me ame ie uhnenamö je taben tavat bihut, me wahingat, me hnyat sihnalimen, me tavat ûhnei hia, me adre me cö Iesu, me lelö thö e, me hna but e kö Pilato.

² Haba Pilato ame hnö e, ka habe, U Tuhan at Juda? Me e ame thu, me ha, ka habe, U me ha e.

³ Ke se hia ta je hofuc ame bifuco gan je taben tavat bihut.

⁴ Haba Pilato ame hnö hmetu e, ka habe, E ba hnân thu gam? wâ bi e se hia ta je hofuc adre me bifuco köu.

⁵ Haba Iesu ame ca thu hmetu thö ke hofuc, me haba Pilato ame lâiâ.

⁶ Ke haba hnyi bijeû e ame labö thang kodra ke at adre me ca, at a wedra.

⁷ Ke e hu ke at Barabasa ien adre me tha ca me tavat adre me thu musi, hnyat adre me ûhlingö hnyi hna thu musi.

⁸ Ke ame he tavat ae se, me hwân he ka sumâtâ ama ânyâ kodra helâ me hnen hna labö ânyâ.

⁹ Ke haba Pilato ame thu kodra, ka habe, Hawa, e webun oge me he ka thang ut köbun Tuhan at Juda?

¹⁰ Anyin a e ame wâ but a gʼ adre hna e hnen je taben tavat bihut can ihuhnyinköu.

¹¹ Ke haba je taben tavat bihut adre me cubec tavat ae se hia he ka ha, ka habe, E so he ka thong Barabasa bi kodra.

¹² Ke haba Pilato ame ha hmetu me thu kodra, ka habe, Ie ûnyi oge me he ka ânyâ kâu, waleji öbun e hwenyi ien, me Tuhan at Juda?

¹³ Me adre me hongot hwege hmetu, ka habe, Osatauroâ thö.

¹⁴ Ke haba Pilato ame ha kodra, ka habe, Hnân eû, ie ûnyi ae kong e ame ânyâ? Ke adre me ti ha hwegiâ, ka habe, Osatauroâ thö e.

¹⁵ Ke haba Pilato ame weny he ka osenyinâ tavat ae se, me e ame thöng Barabasa but kodra, ke a hia but osoi Iesu, e ame hna but e mʼ adre me he ka osatauroâ.

¹⁶ Haba ta je soja adre me lelö e ka hnyi hnyeule eû, wale a umen than; ke adre me ûkhacaköuâ ta je soja hia.

¹⁷ Me adre me okhavâ e ge ûkhaû ae udrudrâ hlit, me hwâwâ je ûö ae ûdedö hnân korona, me obicâ kâu;

¹⁸ me adre me hwân ka nom kâu, me ha ka habe, E, Tuhan at Juda!

¹⁹ Ke adre me kot ban ge hlowe, me hangöjâ e, me cibouca me nom kâu.

²⁰ Ke adre hia but hiâ e, me adre me uny jut ûkhaû ae udrudrâ hlit, me okhavâ e ge je ûkhaûen bi. Ke adre me lelö but e kâû he ka osatauroâ.

²¹ Ke adre me musi Simona at Kurene at ame he unyidra ûheny hnyi ta hnyei, kamö Alesanedo me Rufo, he ka vadren anyin satauro.

²² Ke adre me hom e ka hnyi dok Gologatha ien, bongon hna wia, hnen ibokomok.

²³ Ke adre me ham kâu waina adre ûthueniken me muro: ke e ame ca kap.

²⁴ Ke adre me osatauroâ e me khenâ anyin je ûkhaû, adre me ugleköbâ, ame ne he ka anyi ia eâu.

²⁵ Ke hnyi awa a kuniny adre me osatauroâ e.

²⁶ Ke walang tusi adre sihnalimen a hnödra hna bifuco e, ka habe, Tuhan at Juda.

²⁷ Ke lo li at venöu adre me tha osatauroâ mē; ke at hnyi ke keihen a metâ, ke ke at hnyi ke keihen a me.

²⁹ Haba tavat adre me he eling adre me hiâ e, me nyinyikâ je bödra me ha, ka habe, E! u at ame he ka kia uma kap me otilâ hmetu hnyi kun ta bong,

³⁰ omeli u thö, me utut ûhem hnyi satauro.

³¹ Helâe minya je taben tavat bihut me tavat sihnalimen adre me hiâ e, me ha, ka habe, E ame omelö keihen; e ca khana bi he ka omelö e.

³² E so e utut walang ang Keriso, Tuhan at Isaraela ûheny hnyi satauro, mʼ ate me he ka wâ me labageju. Ke habe li at adre tha osatauroâ mē, ödru me hiâ minya.

³³ Ke haba hnyi awa a siksiny ame menekholom but hnyei hia ke ne o but hnyi awa a naininy.

³⁴ Ke haba hnyi awa a naininy, Iesu ame hongot hwege, ka habe, Eloi, Eloi, lama sabakethani? bongon adre wia, Khonguk, Khonguk lö, ieû gam u me hnö nya but?

³⁵ Ke a long ut keihen adre me ûtitilen, haingödra, ke habe, Wâ bi, e ame hao Elia.

³⁶ Me ame wadring dö ke at me hûlûlûâ ohmanenâ hnyi vinega, me ip hon obiny hlowe, me habelen e, me ha, ka habe, Më khanang; e so ate me wâ ame ne he Elia ka o he ka hom e hnyikânâi.

³⁷ Ke a hia but Iesu hongot hwege, me e ame mokcu.

³⁸ Ke ame khekhe lo but mano singiny uma kap hwân ethö ke ne o but eû.

³⁹ Ke a wâ but keneturio, at ame tot cicö e, a gʼ ame hna but helâe hanon, me haingen, ka habe, E hnathu Nokon Khong at ang.

⁴⁰ Ke waleû omomo adre me wâ sâkâûâ; ke e unyidrin Maria Magadalena, ke Maria hinyö Iakobo ûhnyûkong me Jose, ke Salome;

⁴¹ wale hnyat ödrin e he hoton me bi athnyabainy ke tiga e hnyi Galilaia; ke se hia minya omomo waleji adre me tha he mē Jerusalema ai.

⁴² A sahac ut, anyin a bong Penapena, wale bong hakekenyâ sabath,

⁴³ me ame he but Josefa at Arimathea, a at ûhnenamö adre ogânâ, at ame halubahingen dokhu dokhon Khong; me e ame hwege me didro kö Pilato, me sumâtâ unyi Iesu.

⁴⁴ Ke ame lâiâ Pilato anyin a logot mok: me e ame hawâ keneturio me hnö e, ka habe, E kueny jut ka mok.

⁴⁵ Ke ka long e ûnyi ge keneturio, me e ame ham unyin kö Josefa.

⁴⁶ Ke e ame ûco ecmano lino, kʼ ame hom but e hnyikânâi, me lan e ge mano lino, me ip e hnyin erkemok adre thö hnyi kic; ke e ame tetebulo veto ka hnyi hnyimen erkemok.

⁴⁷ Ke haba Maria Magadalena, ke Maria hinyö Jose, me ödru me wâ dok adre ip e hnyin.