Mareko 11 - Iaai Bible 1901 (New Caledonia)

¹ KE ödrin e hakekeny jut Jerusalema ai, hnyi Bethefage me Bethania, hnyi bucen Elaio, me e ame kunâ li laten me ha ködru, ka habe,

² He thʼ öbu ka hnyi taun cici öbu: ke öbu ka o but eling, öbu me he ka ie wâ nokon asina adre noc, waleji a ödra tiga ca tabâ bi; thang ut e, me hom do jem.

³ Ke e ka hu at ame he ka ha köbu, ka habe, Ieû can öbu me ânyâ ang? me öbu ha thö, ka habe, E hu hanymen e ge Than; ke e ame he ka ie kunâ e jem.

⁴ Me ödru me he but me wâ nokon asina adre noc hakekenyâ hwanuma eû hnyi gethen; me ödru me thang ut e.

⁵ Me ame ha ködru hnen keihen adre me tot eling, ka habe, Öbu me thang me hnân eû asina?

⁶ Ke ödru me ha ködrin helâ me hna ha ga Iesu: me ödrin e hnʼ ödru but.

⁷ Ke ödru me hom nokon asina kö Iesu me ip anyidrin je ûkhaû hon; ke e ame tabâ e.

⁸ Ke se hia tavat adre me ulolo je khaûödra eû hnyi gethen; ke haba keihen adre me so angin ta je ûö ûnyi hnyi hnyot

⁹ Ke haba tavat adre me bödra me tavat adre me he hoton, adre me hongot, ka habe, Hosana; Hnen hahic at ame o but hnyi ien Than:

¹⁰ Hnahic hnen dokhu ame o but, a dokhon kamöta a Davita: Hosana hnyi dok ae nua ethö.

¹¹ Me e ame o but hnyi Jerusalema hnyi uma kap: ke e ame wâ igigilo ta je ûnyi hia, ke e ame he hnyi sahac Bethania ai tha e me hnyat a twelv.

¹² Ke nyi, ödrin e o but ûhedrin Bethania, me e ame mekihnânem.

¹³ Ke e ame wâ imeta hnyi dok ae sâkâu ae hu lan, me e ame o but he ka wâ ame ne hu wan: e ame o but ka hnyin, me ame wâ a je lan thibi; anyin a ca ûen bi wa a meta.

¹⁴ Me e ame ha ka imeta, ka habe, E so ame ca he ke at ka an wan gam nyiele balua. Ke ame long e hnen laten.

¹⁵ Ke ödrin e o but hnyi Jerusalema: me e ame dit ka hnyi uma kap, kʼ ame hwân he ka obâ tavat adre me ûcû hnyin uma kap, kʼ ame hagutâ hnyikânâi ta je laulau anyin tavat adre me ûcû mone, ke je taben lap anyin tavat adre me ûco je biny;

¹⁶ ke e ame ca hna ka ke at he ka he me kaia hnyin uma kap.

¹⁷ Ke e ame ûne, me ha kodra, ka habe, Hawa, adre me ca sihnalimen, ka habe, Adre me he ka hwenyi ien umök uma, me Uma umen hic hobi kâu ta ogo hnyei hia thithö? ke öbun e hia but wia e me op a umen ta je venöu.

¹⁸ Ke a long ut hnen je taben tavat bihut, me hnyat sihnalimen, me adre me heleû deny he ka hlingâ e: anyin a ödrin e outen e, anyin ame lâiâ tavat hia hnen hna ûne.

¹⁹ Ke e ame he ûheny hnyi taun hnyi je sahac.

²⁰ Hnyi hnyomakatu ödrin e he hnyi baten imeta me ödrin e wâ a ga mokcu e hwân hnyi hwecin.

²¹ Haba Peteru ame ûnykûme hmetu, me e ame ha kâu, ka habe, Rabi, wâ bi a meleca thö imeta waleji u je hangâ.

²² Ke haba Iesu ame thu me ha ködrin, ka habe, Labageju ka Khong.

²³ E hnathu inya oge me ha köbun, ka habe, haba at ame he ka ha ka bucen ang, ka habe, Kec dö, me u me he ka ta but eû hnyi köiö; kʼ ama ca hlohlo bi hnyi hnyekon, kʼ ama labageju a ame he ka hwâdâ hnen hna ha; awe, e ame he ka hu e.

²⁴ Anyin a wale, inya oge me ha köbun, ka habe, Haba ta je ûnyi hia öbun e he ka sumâtâ hnyi hic, labagejon ju a öbun e he ka kap, mʼ öbun e he ka kap dö.

²⁵ Ke öbun ka he ka tot me hic, öbun e ne hia but ip hnân ge ke at, hna degecâ but, me me he Kamöbun ethö hnyi drany ka hna degecâ hnöbun hna hanyâûâ.

²⁷ Ke ödrin e o hmetu hnyi Jerusalema: ke e ame he hnyin uma kap, me ame o but kâu je taben tavat bihut, me hnyat sihnalimen, me wahingat;

²⁸ me adre me ha kâu, ka habe, Hnen musi anyi ia u me mâdrâ ta je ûnyi e? ke ia a ham köu musi he ka mâdrâ ta je ûnyi e?

²⁹ Ke haba Iesu ame ha kodra, ka habe, Oge me he bi nya ka hnei öbun ge ke ûnyi, ke thu hmetu thö könya, me oge me he bi nya ka ha köbun musi oge me ânyâ hnyin ta je ûnyi e.

³⁰ Haba bapataiso anyi Ioane, me, ûnyi hnyi drany, hawa ûnyi ge at? thu thö könya.

³¹ Me adre me ûhnenamö, ka habe, Ate ne he ka ha, ka habe, Ûnyi hnyi drany; me e ame he ka ha, ka habe, Ieû gabun öbun e ca kap e?

³² Ke ate ne ha, ka habe, Ûnyi ge at—ödra outen tavat: anyin a ödra hia adre me kop Ioane helâ me perofeta.

³³ Me adre me thu kö Iesu, ka habe, E ca khanʼ ohmun. Me haba Iesu ame ha kodra, ka habe, Oge me ca he minya inya ka ha köbun musi oge me ânyâ hnyin ta je ûnyi e.