Mareko 10 - Iaai Bible 1901 (New Caledonia)

¹ KE e ame todrö me he ûheny ling me o hnyi je hnyigoulen Juda me hoton Joridano: me ame ûkhacaköu hmetu kâu tavat ae se hia; ke e ame nʼ ödra hmetu helâji me hwakecin.

² Ke ame o but kâu ta je Faresaio, me hnö e, ka habe, Hawa e ûcû ka at he ka degec âiân? adre me cubec e.

³ Ke e ame thu kodra, ka habe, Ieû hna hûna köbun hnö Mose?

⁴ Haingödra, ka habe, Mose ame hna he ka sihnalimen tusiny thang hna faipoipo, mʼ adre me degec ut.

⁵ Iesu ame thu kodra, ka habe, Anyin ae nâk je hnyekubun e ame sihnalimen köbun hnanyibu eling.

⁶ Ke haba adrem hwân dö hnyi hna op ta ûnyi, e ame wiʼ ödru baga me momo.

⁷ Anyin a wale, ame he baga ka hna but kamen me hinyen me kece ka âiân:

⁸ ke ame he ka khaca thibi unyidru: waleling mʼ ödru me ca lo hmetu bi, ke khaca thibi unyidru.

⁹ Anyin a wale, e ca hamen at bi he ka thang ûnyi ame hûjâ hnen Khong.

¹⁰ Ke haba laten, me ödrin e hnö hmeto e eiö hnyin uma ge bongon ûnyi eling.

¹¹ Ke e ame ha ködrin, ka habe, Haba baga ame degec âiân kʼ ame hom hmetu ke at, me e ame bi ûnyi monu kâu:

¹² ke e ka hamen momo degec âiân, me hom ke at bi, me ame bi ûnyi monu momo eling.

¹³ Ke adre me hom but kâu ta je mendreng me me he ka kalʼ ödrin: kʼ ame thawʼ ödrin laten.

¹⁴ Iesu ame wâ, me ame vec hnyekon, ke haingen ködrin, ka habe, Hna but ta je mendreng mʼ adre me he könya; ca thawʼ ödra bi: anyin a helâ mʼ ödra dokhu dokhon Khong.

¹⁵ E hnathu inya oge me ha köbun, Haba at ame ca kap dokhu dokhon Khong helâ me wanakat, me e ame ca he ka dit ka hnyin.

¹⁶ Ke e ame kop ödrin me ha hnahici ödrin, me ip li hnyamen hudrin.

¹⁷ Ke e ame he eû hnyi gethen, me ame wadring ke at me cibouca kâu, me hnö e, ka habe, At ûne lö, ieû hanymök oge me he ka ânyâ me me hu thö könya möt ame ca ba balua!

¹⁸ Ke haingö Iesu kâu, ka habe, Ieû gam u me ha a iny so? e ba at ae so, ke hake Khong thibi.

¹⁹ E khanö u ta je hnanyibu, ka habe, Ca he ka ûhlingö, Ca he ka bi ûnyi monu, Ca he ka venöu, Ca he ka ohnathoâ thoi, Ca iyawö, Ogânâ kâmâm me hinyâm.

²⁰ Ke e ame thu kâu, ka habe, At ûne lö, oge hia but vheno ta je ûnyi e kʼ iny tiga wanakat.

²¹ Ke haba Iesu ame wâ hmâ e, me betenge gan, me ha kâu, ka habe, Khaca thiju ûnyi ae hia gam: he thö ka ûco ânyâm ta je ûnyi, me ham ka ta je theduoc, me ame he ka hu köu tang omjeû hnyi drany: ke aiö u bi, he hotuk.

²² Ke e ame hmak ut ge hofuc eling, me he but me hlöuhlöu: anyin ae tren omjeû ae gan hmâ.

²³ Haba Iesu ame hngehngele, me e ame ha ka laten, ka habe, Huliwa but tavat tren omjeû he ka didro ka hnyi dokhu dokhon Khong!

²⁴ Me ame lâiâ laten ge hwan hofuc. Ke haba Iesu ame thu hmetu, me ha ködrin, ka habe, Lakuk lö, huliwa ae gan hmâ he ka didro ka hnyi dokhu dokhon Khong hnen tavat adre me labageju ka hnyi omjeû!

²⁵ E hâhâ ka kamela he ka dit hnyi hwanumen jebû, ke hnek bi at ae tren omjeû he ka didro ka hnyi dokhu dokhon Khong.

²⁶ Me ödrin e lâiâ gan hmâ me ha, ka habe, Ia la ae khana he ka möb!

²⁷ Iesu ame ō ʼdrin me e ame ha, ka habe, E pason hnen at, ke e khana bi, Khong: anyin ae khana Khong he ka ânyâ ta je ûnyi hia thithö.

²⁸ Haba Peteru ame hwân he ka ha kâu, ka habe, Wâ bi, ohmun e hia but hna degecâ ta je ûnyi hia me he hotom.

²⁹ Haingö Iesu, ka habe, E hnathu, inya oge me ha köbun, E ba at ame hia but hna but uma, me je liamekeiny, me lahaneny, me kamen, me hinyen, me lakon, me ta hnyei, can inya me evangelia,

³⁰ kʼ ame ca he ka kap walang ang hmetu wan handed, a je uma, me je liamekeiny, me lahaniny, me hinyen, me lakon, me ta hnyei, tha e me je vec; ke haba hnyi ûen ame he ka o thö, wale möt ame ca ba balua.

³¹ Ke se hia tavat adre me bödra, ame he ka bilidra but; me tavat ame bilidra ame he ka bödra but.

³² Ke ödrin eû hnyi gethen ödrin e he Jerusalema ai; ke Iesu ame hnyimakan anyidrin bunyen: ke ödrin e lâiâ; ke haba tavat adre me he hotudrin adre me ot. Ke e ame hom hmetu hnyat a twelv, me hwân he ka omanenâ ködrin ta je ûnyi ame he ka o kâu, ka habe,

³³ Wâ bi otin e he ang Jerusalema ai; ke adre me he ka hna Nokon at ka je taben tavat bihut, me hnyat sihnalimen; ke adre me he ka hangâ e he ka mok, me hna e ka Aten ke je hnyei:

³⁴ ke adre me he ka hluma e, me hangöjâ, me osoâ, me hlingâ; ke hwaban kun ta bong e ame he ka möt hmetu.

³⁵ Ke ame hakekenyâ e li laku Zebedaio jia Iakobo me Ioane, me ha kâu, ha habe, At ûne lö, E wehmu mʼ u me he ka mâdrâ ûnyi a wehmu.

³⁶ Me e ame ha ködru, ka habe, Ieû ae webu oge me he ka mâdrâ hobi köbul

³⁷ Haingödru ödru me ha kâu, ka habe, Hnʼ öhmu but mʼ ohmu me he ka laba, ke at hnyi ke keihâm a metâm, ke ke at hnyi ke keihâm a mem hnyi ânyâm hmanenang.

³⁸ Ke haba Iesu ame ha ködru, ka habe, E ca khanʼ öbu bongon hnöbu hna sumâtâ. Hawa, öbu hwege he ka ijem utköiö oge me he bi ka ijem? ke he ka bapataisoi öbu ge hna bapataiso adre ma bapataisoi nya hnyin!

³⁹ Haingödru ödru me ha kâu, ka habe, Öhmu me he ka hwege. Haingö Iesu ködru, ka habe, Öbu me be ka hnyi ic hnyi utköiö oge me ijem, kʼ adre me he ka bapataisoi öbu ge hna bapataiso adre ma bapataisoi nya hnyin:

⁴⁰ ke so bi e ca hanymök he ka ham ka at he ka laba hnyi ke keihen a metök me mek: baba e, me hnân hobi kâu tavat adre me penapena e hobi kâu.

⁴¹ Ke a long ut hnyat a ten, me ödrin e hwân he ka hmonyin kö Iakobo me Ioane.

⁴² Ke haba Iesu ame hawʼ ödrin, me ha ködrin, ka habe, Öbun e wâ but hwakecin tavat adre me muso Aten ke je hnyei, a ödrin e hwen than hudrin; kʼ ame musi ödrin bi hnen je tuhödrin.

⁴³ Ke ame ca he ka helâe unyibun: ke haba at unyibun ame weny he ka gan, me e ame he ka athnyaba köbun:

⁴⁴ ke haba at unyibun ame weny he ka bân, me e ame he ka athnyabaidrin hia.

⁴⁵ Anyin e hnathu ame ca o Nokon at mʼ adre me huliwa kâu, ke so bi he ka hamen bi athnyaba, me ham anyin möt hnân hwaban möt anyin tavat ae se hia.

⁴⁶ Ke ödrin e o but hnyi Jeriko: ke e ame he hmetu me laten ûhedrin Jeriko me tavat ae se hia, me ame laba nöku Timaio, Baratimaio at sumat ae wadröu, eû hnyi baten gethen.

⁴⁷ Ke a long ut a Iesu but e, at Nazareta, me e ame hwân he ka hongot, ka habe, Iesu lö, a Nöku Davita, betenge ju gak.

⁴⁸ Ke se hia tavat adre me thawâ e, me me he ka laba hnyibû ju: ke e ame hongot tot bala, ka habe, Nöku Davita lö, betenge ju gak.

⁴⁹ Ke haba Iesu ame todru me ha, ka habe, Hawâ thö. Me adre me hawâ wadröu, me ha kâu ka habe, Hwege thö, todrö, e ame hao u.

⁵⁰ Me e ame degec ut anyin ûkhaû, me todrö me he kö Iesu.

⁵¹ Ke Iesu ame thu kâu me ha, ka habe, Ieû ae wem oge me he ka mâdrâ köu? Haingen wadröu ame ha kâu, ka habe, Raboni, mʼ oge me he bi ka bwela.

⁵² Ke haba Iesu ame ha kâu, ka habe, He thö, u je so but hnen ânyâm labageju. Me e ame ie bwele but, me he hoton eû hnyi gethen.