Mareko 1 - Iaai Bible 1901 (New Caledonia)

¹ WALANG hwâniny ûthumetu ae so anyi Iesu Keriso, a Nokon Khong.

² Helâ me hna sihnalimen ga Isaia perofeta, ka habe, Wâ bi, inya oge me kunâ anyik ûthumetu hnyi hnyimâkâm, At ame he ka ânyâwia dem gethen;

³ Ifucin at ame hongot hnyi hnyebuba, ka habe, Penapena ju gethen deny Than, Owisa thö deny ta je gethen;

⁴ Ame o but Ioane, at ame bapataiso hnyi hnyebuba me khetâ hna bapataisoiny ietra mʼ adre me thang degecâ but ta je hulö.

⁵ Me ame he but kâu hnyei Juda hia, ke at Jerusalema hia; me e ame bapataisoi ödra hnyi wagewe Joridano, kʼ adre me ve omanenâ anyidra ta je monu.

⁶ Ke leûnen kamela khaûö Ioane, ke e ame ka weikâ hnyin ge wen unen meno, ke haba an jeû, me hamon me haneiny hnyot.

⁷ Ke e ame khetâ, me ha, ka habe, Ame he jem ke at a biliny ae man huk, e ca ûcû bi nya ka nom me thang hna hûkâlâ tangen li hnyeûcan.

⁸ Inya oge me bapataisoi Öbun ge köiö; ke e ame he ka bapataisoi öbun ge Hanu Kap.

⁹ Ke haba hnyi je bong eling ame o but Iesu ûheny Nazareta hnyi Galilaia, me ame bapataisoâ e Ioane hnyi Joridano.

¹⁰ Ke e ame tiga ölö thö ûheny hnyi wagewe, me e ame wâ drany adre me khong ut, me Hanu ame gâ hon e helâ me biny:

¹¹ me ame o but hwan hofuc ûnyi hnyi drany, ka habe, U thibi Nokuk a oûnykûmik, inya oge me senyin köu.

¹² Haba Hanu ame ie kunâ e ka hnyi hnyebuba.

¹³ Ke e ame laba hnyi hnyebuba fâte je bong, ame cubec e hnen Satana; ke tha e mē omeno ae hiny; ke haba ta je angela adre me bi athnyabainy.

¹⁴ Ke hwaban hna cö Ioane, Iesu ame o hnyi Galelaia, ame khetâ ûthumetu ae so anyin Khong, ka habe,

¹⁵ A hwâdâ but ûen, ke hakekeny jut dokhu dokhon Khong: ietra ju öbun, me kap ûthumetu ae so.

¹⁶ Ke e ame he hnyi baten köiöiny Galilaia, me ō Simona, me Anederea liamekeiny me Simona, ödru me thong ert eû hnyi köiö: anyin a ödru li at thut.

¹⁷ Haingö Iesu ame ha ködru, ka habe, He hotuk me oge me he ka wiʼ öbu me hnân thelo at.

¹⁸ Me ödru me ie hna but ûtödrutang ert me he hoton.

¹⁹ Ke e ame tiga he me e ame ō Iakobo nöku Zebedaio me Ioane a liamekeiny mē, ödru me laba hon hu me ena je ert.

²⁰ Me e ame ie hauʼ ödru minya: ke ödru me hna but kamödru a Zebedaio me je lathnyaba hon hu, me he hoton.

²¹ Ke ödrin e he thö Kaperenauma ai; me e ame ie didro ka hnyi sunago hnyi sabath me ûne.

²² Me adre me lâiâ hnen hna ûne: anyin a e ame nʼ ödra helâ me at ae tren man, ke ca helâ me hnyat sihnalimen.

²³ E eling hnyi umödra sunago ke at ae hu hanu ae kong; ke e ame hongot, ka habe,

²⁴ Iesu at Nazereta lö, ieû gam kohmun? hawa, u je o he ka ohiʼ ohmun? inya oge me wâhmakhmeto u, a u At ae Kap anyin Khong.

²⁵ Haba Iesu ame thawâ e me ha, ka habe, Ca mede bi, ke didrut ûhem hnyi hnyekon.

²⁶ Ke haba hanu ae kong ame osesebilâ e, me kuku hwege me didrut ûheny hnyi hnyekon.

²⁷ Ke ödra hia adre me lâiâ, me ûhne-namököuâ, ka habe, Ieû ong? hna ûne ae teb ûnyi! anyin a e ame muso ta je hanu ae kong hnen man, me ödrin e long kâu.

²⁸ Me ame ie lung igigilo ka hnyi je ke keihen hia hnyei Galilaia.

²⁹ Ke adre me didrut ûhedra hnyi sunago, me ödrin e ie didro, tha ödrin me Ioane me Iakobo ka hnyi uma umo Simona me Anederea.

³⁰ Ke haba hinyen öiö Simona ame mokulec mok a kahwa, me adre me ie omanenâ kâu mok anyin momo:

³¹ me e ame he me kât hnyamen momo, me otilâ; me ame ie hia but kahwa, me e ame huliwa ködrin.

³² Hnyi sahac, ke ame he but ka dit seûno, me adre me hom but kâu ta je komok hia, me tavat a dilic ödra demoni.

³³ Me ame ûkhacaköu thö taun hia hnyi hwanuma.

³⁴ Ke e ame omelö ta je mok ae ve bongon, me obâ ta je demoni ae se hia; ke e ame ca hna bi ta je demoni he ka fuc, anyin adre me wâhmakhmeto but e.

³⁵ Ke haba nyi, ke tiga bec ka o thö seûno, me e ame höihöi thö me didrut, me he ka hnyi dok ae ba aten, me hic eling.

³⁶ Me ame he hoton Simona me tavat a tha ödrin mē;

³⁷ ke ödrin e wâ but e, me haingödrin kâu, ka habe, Ame elöm u tavat hia.

³⁸ Ke haingen ködrin, ka habe, E so otin e he ka hnyi ke je taun ehele, mʼ inya he ka khetâ minya eling; anyin a oge me o but hobi kâu e.

³⁹ Me e ame dit ka hnyi umödra je sunago hnyi Galilaia hia, kʼ ame khetâ hofuc me obâ ta je demoni.

⁴⁰ Me ame o but kâu ke lepera, ame khöu kâu me ciboucâ kâu, me ha kâu, ka habe, U je ne wem me khanö u he ka osoi nya.

⁴¹ Me e ame hnyok kâu, me hinôbeny me kâlâ e, me ha, ka habe, E bewek; u ma so but.

⁴² Me ame ie hia but lepera gan, kʼ ame so but.

⁴³ Ke e ame hûna hwegiâ e, me ie kunâ e, me ha kâu, ka habe,

⁴⁴ Wâ eâu u nye ha ka ke at: ke he thö, omanenö u thö ka at bihut, me ham hna hûna hnö Mose hnân haten ködrin, ge hna okalaöti u.

⁴⁵ Ke e ame didrut, me hwân he ka khetâ me olungâ, me omanenâ ûnyi e, me ca khana hmetu Iesu he ka he manen ka hnyi taun, me e ame laba ju hnyije dok ae ba aten: ke adre me ve o kâu ûhedra hnyi je ke keihen hia.