Luka 8 - Iaai Bible 1901 (New Caledonia)

¹ HWABAN e, e ame vheno ta je taun me hnyaba, kʼ ame khetâ, me omanenâ ûthumetu ae so anyin dokhu dokhon Khong, ke tha e mē hnyat a twelv,

² me ke je momo waleji a omeli ödrin, kʼ ödrin e tren hanu ae kong me je mok, wale Maria adre me wenyö Magadalena, waleji hnen je demoni a seven hna didrut ûnyi hnyin,

³ me Joana öiö Khuza, at ame tuö hnyaban Heroda, me Susana, me keihen minya ae se hia, hnyat adre me haomjehen ûnyi hnyi anyidra ta je ûnyi.

⁴ Ke ame ûkhacaköu tavat ae se hia kâu, kʼ ame o but kâu aten ta je taun hia, me e ame ha ûhöûcû, ka habe,

⁵ Ame he but at belök he ka jijingâ wan: me e ame jijingâ, ke ame kölu but keihen eû hnyi baten gethen; me adre me uto ju, kʼ ame an dö ge ta je meno adre me gâ ethö.

⁶ Ke ame kölu but keihen hon dok ae hudei, me ame kû thö me ie meleca but, anyin ae ba ûnyi hnân omenyikâ.

⁷ Ke ame kölu but keihen hnyi wanben ta je ûö ae ûdedö; me ame tha kû thö mē je ûö ae ûdedö, me takoû but e.

⁸ Ke ame kölu but keihen ka hnyi hon kânâ ae hoso, me ame kû thö, me wa, ûsa wan haded je wan. E ame ha je hofuc eling kodra, kʼ ame hongot, ka habe, Haba at ae hu li hnyikonyen me me löng, löng ju e.

⁹ Ke ame hnö e hnen laten, ka habe, Ieû bongon ûhöûcû et

¹⁰ Me e ame ha, ka habe, Adre me ham köbun he ka wâhmakhmeto ta je ûnyi ae iyong hnyi dokhu dokhon Khong: ke adre me bi hnân ûhöûcû ka keihen; mʼ adre me he ka bwele, me ca wâ bi, me he ka long me ca wâ ûnykûme bi.

¹¹ Walang ûhöûcû, ka habe, Haba wan, wale hofuc hwan Khong.

¹² Haba keihen hnyi baten gethen, wale tavat adre me long; me ame o but diabolo me hom dö hofuc ûnyi hnyi je hnyekudra, wâ adre nye labageju mʼ ödra mödrut.

¹³ Haba keihen hon dok ae hudei, me wale tavat adre me long me kap hofuc me senyin; ke ba wân gadra, ke ca beû bi anyidra labageju ke adre me ta ju hnyi ûen ûcûbic.

¹⁴ Haba keihen ame kölu hnyi wanben ta je ûö ae ûdedö, wale tavat adre me long, me he but, me ame kû takû ödra hnen ta je vhet, me omjeû, me ta je senyin ge möt ang, kʼ adre me ca wa wan ae metu.

¹⁵ Haba keihen hnyi kânâ ae hoso, wale tavat adre me long hofuc me hnyok ae so me hnathu, me kât hmâ, me wa wan a deny hok hnyok.

¹⁶ E ba at ame vâc lamepa, me he ka tube e ge utkaia, me ip eû hnyi hmelen hnamokut; kʼ adre ma ip ethö hon taben, me me wâ melaminy hnen tavat adre me didro.

¹⁷ Anyin ae ba ûnyi adre me ikhâlâ ame ca he ka manen; ko ba ûnyi ae iyong ame ca he bi ka manen.

¹⁸ Anyin a wale, wâ wia öbun ûhebun ka long: anyin a haba at ae hu gan, me adre me he ka ham ta je ûnyi kâu; ke haba at ae ba gan, me adre me he ka hom gan ûnyi e ame ûnykûme ae hu.

¹⁹ Me ame o but kâu hinyen me je liamekeiny mē, ke ca khanʼ ödrin he ka hakekeny kâu, anyin ae se hia tavat.

²⁰ Me adre me thumeto e, ka habe, Waleû hinyâm me je liamekeiny möu ödrin e tot, ödrin e beiouny möu.

²¹ Ke e ame thu kodra, ka habe, Haba at ame long hofuc hwan Khong me mâdrâ, wale je liamekeiny mönya me hinyök.

²² Ke haba hnyi ke bong e ame tha ölö thö me laten ka hnyi hon hu; ke e ame ha ködrin, ka habe, otin e he ka kec ka hnyi ke keihen köiö: me ödrin e kec ut.

²³ Ödrin e kec ke e ame mokut: me ame o but höu hnyi köiö; me ame he ka unöngöt dö hudrin hu, he ödrin e he but ka û.

²⁴ Me ödrin e he but kâu me öhmâkâ e me ha, ka habe, Taböny than, taböny than, otin e he but ang ka mok. Me e ame hmak dö, me thawâ ang me je waköiö: me ame hia but, me ta but hau.

²⁵ Ke e ame ha ködrin, ka habe, Ewa anyibun labageju? Ke ödrin e ot, me lâiâ, me ûhnenamököuâ, ka habe, Ehö at ang, anyin a e ame hûna ka ang me köiö, me ödru me long kâu?

²⁶ Ke ödrin e khop dö hnyi ke keihen Gadara, wale cicö Galilaia.

²⁷ Ke e ame ölö thö hot ai, me ame ûkhanö mē at ûheny hnyi taun, a delec je demoni; ke ame ca khaû bi, hwân ehac, ke ame ca laba bi hnyi uma, ke ame laba bi hnyi je erkemok.

²⁸ Ke e ame ö Iesu, me e ame hongot me ta ju hnyi hnyimakan me ha hwegiâ, ka habe, Ieû u me he ka ânyâ könya Iesu a Nokon Khong ae Beönua? Inya oge me khöû köu, ca oveci nya.

²⁹ Anyin a e ame hûna ka hanu ae kong he ka didrut ûnyi hnyi hnyin at. Anyin a e ame osehia kât e: ke adre me labö tuö e, me ca ge tö fao, me ca li can; ke e ame thamuâ hna ca e, me ame hom e hnyebuba ai hnen demoni.

³⁰ Ke haba Iesu ame hnö e, ka habe, Ia iâm? Me e ame ha, ka habe, Legiona; anyin a delec e hnen je demoni ae se hia.

³¹ Ke ödrin e khöû kâu, me me ca he ka kunʼ ödrin ka hnyi dok ae dit.

³² Ke wale but e hnahat buaka ae manen ame han tot hon bucen: ke ödrin e khöû kâu, me me he ka hnʼ ödrin he ka dilic ödra. Me e ame hnʼ ödrin dut.

³³ Me ame didrut je demoni ûhedrin hnyi hnyin at, me delec je buaka: haba hnahat buaka adre me wadring ut jimethö hnyi hwatapkolu kâû ka hnyi köiö, me adre me û but.

³⁴ Ke a wâ but hnen tavat han buaka hna mâdrâ, me ödrin e kec, me ûthu metu hnyi taun me ta hnyei.

³⁵ Ke adre me he but he ka hnyi wâ hna mâdrâ, me o kö Iesu, me wâ at a didrut je demoni ûhedrin hnyi hnyekon, ke e ame laba hnyi hmelen li ca Iesu, a khaû, ke metu but: me adre me ot.

³⁶ Haba tavat adre wâ adre me thumeto tavat ge hna omelö at a delec demoni.

³⁷ Ke haba tavat aten hnyei Gadara hia igigilo, adre me khöû kâu he ka hnʼ ödra but, anyin adre me ot gan hmâ: me e ame ölö thö ka hnyi hu me kec hmetu.

³⁸ Ke haba at a obâ je demoni ûnyi hnyi hnyekon, me e ame sumâtâ, me me he ka tha laba mē: ke Iesu ame kunâ e me ha, ka habe,

³⁹ He thö ka hnyi umâm uma, ke omanenâ thö ta je ûnyi ae gan a ânyâ köu Khong. Me e ame he me omanenâ hnyi taun hia ta je ûnyi ae gan a mâdrâ kâu Iesu.

⁴⁰ Ke ame o hmetu but Iesu, me ame kap soâ e hnen tavat; anyin a ödra hia adre me halubahingen e.

⁴¹ Ke wâ bi, ame o but ke at Jairo ien, at ame muso sunago: ke e ame ta ju hnyi li ca Iesu, me khöû kâu me me he ka hnyi umen uma;

⁴² anyin a khaca thibi nokon hlu, ame ne twelv but hunainy, ke e ame he but ka mok. Me ame he Iesu, kʼ ame ûhneki kâu tavat ae se hia.

⁴³ Ke waleû ke momo kʼ ame hingölö dra hnyi twelv ta hunâ, ke ba hia but tang omjehen ge hnen hna bi hwaban tavat tren bubuny, ke ba at ae khana he ka osoâ e,

⁴⁴ haba momo e ame hnyi he hoton, kʼ ame mâdrâ obiny ûkhaûen: me ame ie hme thö dra gan.

⁴⁵ Me haingö Iesu, ka habe, Ia kalö nya? Ke haba ödra hia adre me ivinö, me haingö Peteru me keihen unyin, ka habe, Than lö, haba tavat ae se hia adre me ûhneki me setu u.

⁴⁶ Ke haba Iesu ame ha, ka habe, E hu at a kalö nya: anyin oge me wâhmakhmeto a ga didrut man gak.

⁴⁷ Ke a wâ but momo ae ca iyong hmetu, me e ame o öbubuny me nom ju hnyi hnyimakan me omanenâ kâu hnyi hnyimakan tavat ae se hia can a e ame kâlâ, kʼ ame ie imelen dö.

⁴⁸ Me e ame ha ka momo, ka habe, Nokuk lö, u je mödrut ge ânyâm labageju; he thö me hnahic.

⁴⁹ Ke e ame tiga fuc, me ame o but ke at ûheny hnyi hnyaban at ame muso sunago, me ha, ka habe, A mokcu nokom hlu; ca ûjengö bi At ûne.

⁵⁰ Ke a long Iesu, me e ame thu kâu, ka habe, Ca ot bi: ke labageju ju, me e ame he ka möt.

⁵¹ Ke e ame didro ka hnyi uma, kʼ ame thawʼ ödra mʼ adre me ca hnyi dit, ke so thibi Peteru, me Ioane, me Iakobo, me kamen me hinyen hlu.

⁵² Haba ödra hia adre utengiö ke tenge thungaû gan: me haingen, ka habe, Ca ûtengiö; anyin a ca mokcu, kʼ ame mokut.

⁵³ Me adre me hluma e, anyin ae khanʼ ödra a ga, mokcu.

⁵⁴ Ke e ame hom hnyamen me hongot, ka habe, Hlu lö, todrö.

⁵⁵ Me ame o hmetu but hanon, me ame ie todrö hlu: ke Iesu ame hûna he ka han.

⁵⁶ Haba kamen me hinyen ödru me lâiâ: ke e ame hûna ködru, ka habe, Ca omanenâ bi ka ke at hna mâdrâ.