Luka 6 - Iaai Bible 1901 (New Caledonia)

¹ HNYI ke sabath e ame he hnyi hna belök; ke haba laten ödrin e thu je wan hwit, me tau ge je hnyamödrin, me han.

² Ke haba keihen ta je Faresaio adre me ha ködrin, ka habe, Ieû gabun öbun e ânyâ ûnyi ae ca wisa he ka mâdrâ hnyi sabath?

³ Me Iesu ame thu ködra, ka habe, Öbun e ca munyi aû hna mâdrâ hnö Davita, waleji e ame mekihnânem me anyin bunyen;

⁴ a gʼ ame didro ka hnyi uma umen Khong me hom, me an je areto hnân omanenâ, ke ame ham minya ka anyin bunyen; wale ae ca ûcû he ka an, ke so thibi tavat bihut?

⁵ Ke e ame ha kodra, ka habe, Nokon at a Tuhan sabath minya.

⁶ Hnyi ke sabath e ame didro ka hnyi sunago me ûne: ke wale bi eling ke at, ke meleca but hnyamen a metân.

⁷ Haba tavat sihnalimen me ta je Faresaio adre me ecmâkâ e, ame ne he ka osoâ hnyi sabath; mʼ adre me he ka wâ thö deny he ka bi fuco e.

⁸ Ke e ame wâhmakhmeto ûnykûmenödra, me e ame ha ka at ae meleca hnyamen, ka habe, Höhöi thö, todrö hnyi wanben. Me e ame höhöi thö me tot.

⁹ Haba Iesu ame ha kodra, ka habe Oge me he ka hnei öbun, Hawa, e ûcû he ka mâdrâ so hnyi sabath, ame ne he ka mâdrâ hulö? he ka omelö at, ame ne he ka hlingâ?

¹⁰ Ke e ame hngehngele me ō ʼdra hia thithö, me e ame ha ka at, ka habe, Lau but hnyamâm. Me e ame ânyâ, me ame so but hnyamen.

¹¹ Ke adre me hmönyidra gan hmâ; me ûhnenamököuâ ûnyi adre me he ka ânyâ kö Iesu.

¹² Hnyi ûen eling, e ame he ka hnyi bucen he ka hic; ke e ame hic ka Khong hnyi lit hia.

¹³ Ke a lany jut, me e ame hawâ laten: ke e ame ûca hnyat a twelv gadrin, me e ame hwenyi iödrin je aposetolo;

¹⁴ jia Simona, wale e ame hwenyi ien minya bi Peteru, ke Anederea a liamekeiny mē, ke Iakobo, ke Ioane, ke Filipo, ke Batolomaio,

¹⁵ ke Mataio, ke Toma, ke Iakobo noku Alefaio, ke Simona adre me hwenyi ien, Zelote,

¹⁶ ke Juda liamekeiny me Iakobo, ke Juda Isakariota wale at ûalecuo;

¹⁷ ke e ame tha utut mödrin me tot hnyi dok ae tha hon, me tavat ae se hia a je laten, me tavat ae se hia ûhedra Juda hia, me Jerusalema, ke ûnyi hnyi hobat köiö hnyi Turo me Sidona, tavat adre me he but kâu he ka long hwan, me me he ka osoâ hnödra je mok;

¹⁸ me tavat minya adre ovecâ hnen ta je hanu ae kong, me adre me so but.

¹⁹ Ke ame elâm he ka kâlâ e hnen tavat ae se hia: anyin ame he but man ûnyi gan me osoi ödra hia.

²⁰ Haba e ame wâ hmâ laten kʼ ame ha, ka habe, Hnobun hnahic tavat ne theduoc, anyin a hobi köbun dokhu dokhon Khong.

²¹ Hnobun hnahic öbun e mekihnânem walang ang, anyin adre me he ka osekuni öbun. Hnobun hnahic öbun e tenge walang ang, anyin öbun e he ka hluma.

²² Hnobun hnahic e ka he tavat ka hûköti öbun, me obʼ öbun, me haikongu öbun, me degec je iöbun helâ me ûnyi ae kong can Nokon at.

²³ Senyin dʼ öbun hnyi bong eling, me utsenyin: anyin a wâ bi, e gan hmâ hwa-böbun ethö hnyi drany: anyin adre me mâdrâ helâe ka ta je perofeta hnen lakamödra.

²⁴ Ekölö gabun tavat tren omjeû! anyin a öbun e hia but kap anyibun so.

²⁵ Ekölö gabun tavat ae sekubun walang ang! anyin a öbun e he bi ka mekihnânem. Ekölö gabun tavat öbun e hluma walang ang! anyin a öbun e he ka tenge me hlöuhlöu.

²⁶ Ekölö gabun e ka he tavat hia ka haisoi öbun! anyin a helâe hnen lakamödra ka ta je perofeta thoi.

²⁷ Ke inya oge me ha köbun tavat öbun e long, ka habe, Betenge ju ge ta je iwahnaihmiony möhun, mâdrâ thö so ka tavat adre me hûköti öbun,

²⁸ hasoi ödra thö adre me hangʼ öbun, hic ju hobi kodra adre me okongu öbun.

²⁹ Ke haba at ame he ka khaû wahicâm, me wia minya thö kâu ke keihen; ke haba at ame he ka hûgûnâ ânyâm ûkot, me ca behânâ bi ûkhaû.

³⁰ Ham dö ka tavat adre me sumatö u; ke ca hnö hmetu bi ânyâm ta je ûnyi adre hûgûnâ.

³¹ Ke haba hnobun hna weny tavat he ka ânyâ köbun, me ânyâ helâ ju e kodra.

³² Ke öbun e ne betenge ge tavat adre me betenge gabun, ie at ame he ka ole köbun? anyin a tavat ae kong adre me betenge ge tavat adre me betenge kodra.

³³ Ke öbun e ne mâdrâ so ka tavat adre me mâdrâ köbun so, ie at ame he ka ole köbun? anyin a tavat ae kong adre me mâdrâ helâe.

³⁴ Ke öbun e ne mē ham ka tavat, me ûnykûme he ka hu hmetu gadra, ie at ame he ka ole köbun? haba tavat ae kong adre me mē ham ka tavat ae kong, me me hu hmetu ûnyi ae tha ûcû,

³⁵ Ke betenge ju ge je iwahnaihmiony möbun, me mâdrâ thö so, me mē ham, ke ca ûnykûme bi; ke ame he ka gan hmâ hwaban köbun, ke öbun e he ka je lakon Beönua: anyin a e menyik kodra hia adre me ca ole bi, me tavat minya ae kong.

³⁶ Ibetengiököu ju öbun, helâ me Kamöbun at ae betenge.

³⁷ Ca ûnykûme hwalö bi, mʼ adre me ca he ka ûnykûme hwali öbun: ca haimono, mʼ adre me ca he ka haimonu öbun: thang bâûâ mʼ adre me he ka thang bâûʼ öbun bi:

³⁸ ham dö, ke adre me he bi ka ham köbun; wale tulut ae gan, adre hlec, me ûjijingâköuâ, me kökölu but, adre me he ka ham ka hnyi je ûlaibun. Ke haba hnobun hna tuluto, me adre me he bi ka tuluto köbun.

³⁹ Ke e ame ha ûhöûcû kodra, ka habe, Hawa, e khana wadröu he ka lelö ke wadröu? ödru me ca he ka tha ta ka hnyi hmonop?

⁴⁰ E ca beönua at adre nâ hon at ame ûne: ke ame he ka tha ûcû at adre ometâ me at ame ûne kâu.

⁴¹ Ke ieû gam u me wâ hmâ atmen hnyi emakan liamekeiny möu, ke u me ca wâ ûnykûme bi udâ hnyi hnyin emâkâm bi?

⁴² Ke u me he ka kâmâu ka ha ka liamekeiny möu, ka habe, Liamekeiny lö, iny bethe he ka hom atmen hnyi hnyin emâkâm, ke haba u bi u me ca wâ hmâ udâ eû hnyin emâkâm bi? U at thoi hnyok, bâm ka degec udâ ûnyi hnyi emâkâm bi, mʼ u me he ka wâ wia he ka degec ut atmen ûnyi hnyi emakan liamekeiny möu.

⁴³ Anyin ae ba ûö ae so ame wa wan bi ae kong; ke haba khaca, e ba ûö ae kong ame wa wan ae so.

⁴⁴ Anyin ame ve manen je ûö ge wan bi. Anyin adre me ca tau je wan meta ûnyi hnyi ûö ae udedö, ke adre me ca tau wan vine hnyi iwatetaföcö.

⁴⁵ Haba at ae so ame hom but ta je ûnyi ae so ûnyi hnyi tang omjehen hnyekon ae so; ke haba at ae kong ame hom but ta je ûnyi ae kong ûnyi hnyi tang omjeû ae kong: anyin ame fuc dö hnyem ûnyi ge hnyok ae unöngöt dö.

⁴⁶ Ke ieû e gabun a öbun e hao nya, ka habe, Taböny than, Taböny than lö, kʼ öbun e ca mâdrâ bi ta je ûnyi oge me ha?

⁴⁷ Haba tavat hia adre me o könya me long hok ta je hofuc me mâdrâ, me oge me he ka omanenâ köbun at ae ûcû mē:

⁴⁸ E ûcû me at ame hötilö uma, kʼ ame hiny dilâ, ke a bi taben ge veto, ke ame o but di, kʼ ame khutukhavâ uma eling, me ame ca bwebwet bi: anyin adre me otilâ wia e.

⁴⁹ Ke haba at ame long, kʼ ame ca mâdrâ bi, me ûcû me at ame hötilö uma hon kânâ ke ba taben; ke ame patrutrua bi di kâu, me logot û but e; ke gan hmâ hnaûhango uma e.