Luka 24 - Iaai Bible 1901 (New Caledonia)

¹ KE hnyi bong a bâniny seven, hnyi haolany, me ödrin e he but ka hnyi erkemok, kʼ ödrin e hom ta je ûnyi ae bo so, wale ödrin e penapena.

² Ke ödrin e wâ veto a gʼ adre hia but hagutâ ûnyi hnyi hnyimen erkemok.

³ Me ödrin e didro, ke ödrin e ca wâ bi unyin Than Iesu.

⁴ Ke ödrin e tiga loloâ, wâ bi, li at ödru me tot unyidrin, kʼ ödre khavâ je ûkhaû ae hadröngoc:

⁵ me ödrin e ot, me hnyimaködrin hnyikânâi, ke ödru me ha ködrin, ka habe, Ieû gabun öbun e elâm at ae möt unyin tavat adre mokcu?

⁶ Ca e hmetu ang, ke a möt hmetu thö: ûnykûme thʼ öbun hofuc waleji a ha köbun ke tiga e hnyi Galilaia,

⁷ ame ha a gʼ adre me he ka hna Nokon at ka hnyi je hnyamen tavat ae kong, me osatauroâ, kʼ ame he ka möt hmetu hnyi bong a kuniny.

⁸ Me ödrin e ûnykûme hwan hofuc,

⁹ me he hmetu ûnyi hnyi erkemok, me thumeto hnyat a twelv ge ta je ûnyi eling, me je lahanödrin hia.

¹⁰ Haba iödrin me Maria Magadalena, me Joana, me Maria hinyö Iakobo: ke haba keihen omomo unyidrin, me ödrin e thumeto ta je aposetolo ge ta je ûnyi e.

¹¹ Ke haba hofuc hwan omomo, me helâ me hofuc baû ködrin; mʼ ödrin e ca kap bi.

¹² Ke haba Peteru ame todrö me wadring ka hnyi erkemok; me e ame nom me selâdrâ, me wâ a je mano lino thiju ame mokut; me e ame he hmetu hnyaban ai me lâiâ hna mâdrâ.

¹³ Ke wâ bi hnyi bong eling lo li at gadrin ödru me he ka hnyi ke taun Emao ien, e ûsâkâûö me Jerusalema helâke me siksti je setadia.

¹⁴ Ke ödru me ûhnena-mö tilâ ta je ûnyi hia a o.

¹⁵ Ke ödru me tiga ûhnenamö me ihut, haba Iesu ame hakekeny me tha he mödru.

¹⁶ Ke adre kât li emaködru me ödru me ca he ka wâhmakhmeto e.

¹⁷ Ke e ame ha ködru, ka habe, Ie je ûnyi e öbu me ûhnenamö tilâ? Ke ödru me todru me hmak.

¹⁸ Haba ke at gadru Kaleopa ien, ame thu kân, ka habe, U me ne hake atkanyua biju la e hnyi Jerusalema, ae ca khanö u ta je ûnyi a o hnyi je bong eang?

¹⁹ Ke e ame ha ködru ka habe, Ie ta je ûnyi? Haingödru ödru me ha kâu, ka habe, Ga Iesu at Nazareta wale perofeta ae man hnyi huliwa me hofuc, hnyi hnyimakan Khong me tavat hia thithö:

²⁰ wale hnen je taben tavat bihut, me tavat adre me musi ohmun adre me hna e me me mok, ke adre me osatauroâ e.

²¹ Ke ohmun e gejon a e bi at ame he ka omelö at Isaraela. Ke haba khaca minya, walang bong a kuniny hwaban hna ânyâ ta je ûnyi eling.

²² Ke wale minya, haba watamomo a je lahanöhmun ödrin e outhmoki ohmun ge imwidrin hnyi erkemok hnyi haolany;

²³ ke ödrin e ca wâ bi unyin, ke ödrin e o but me ha, a gʼ ame manen dut ködrin li angela, li at ödru me ha, ka habe, A möt hmetu thö e.

²⁴ Ke a mwi ke je lahanöhmun hnyi erkemok, me wâ helâji me hnen watamomo hna ha: ke ödrin e ca wâ bi e.

²⁵ Me e ame ha ködru, ka habe, Öbu li monu, me bec li hnyekubu he ka kap hia je hna ha hnen ta je perofeta!

²⁶ Hawa, ca hamen Keriso he ka kap ta je vec eling, me he ka dit ka hnyi anyin hmanenang?

²⁷ Ke e ame hwân ga Mose me ta je perofeta hia, he ka omanenâ ködru ta je hna sihnalimen hia gan.

²⁸ Ke ödrin e hakekeny ka hnyi taun, ödru me he ka hnyin: ke haba e, me helâke ame he ka he balua.

²⁹ Me ödru me thawâ e, ka habe, Laba ju unyihmu: anyin a sahac ut, ke ame he but ka hia bong. Me e ame didro he ka tha laba mödru.

³⁰ Ke e ame tha laba mödru he ka han, me e ame hom areto, me oleâ, me thuthu me ham ködru.

³¹ Me adre me khong ut li emaködru, ke ödru me wâhmakhmeto e; me e ame ie hia but gadru.

³² Ke ödru me ûhaköu, ka habe, A ca kahwa bi li oûnykûmitu, waleji hnyi hnen hna ûhnenamö mötu eû hnyi gethen, me hnen hna omanenâ kötu je hna sihnalimen?

³³ Ke ödru me todrö hnyi awa eling me hmetu Jerusalema ai, me wâ hnyat a eleven ödrin e ûkhacaköu, me tavat unyidrin,

³⁴ ke haingödrin, ka habe, E hnathu a möt hmetu thö Than, ke a manen dut kö Simona.

³⁵ Ke ödru minya ödru me omanenâ ta je ûnyi eû hnyi gethen, me hnen hna manen ködru hnyi hnen hna thuthu areto.

³⁶ Ke ödrin e tiga ûhnenamö ta je ûnyi e, me e ame tot hnyi wanbödrin, me ha ködrin, ka habe, Hnahic köbun.

³⁷ Ke ödrin e öbubuny, me ot, ke ödrin e ûnykûme a hanu ödrin e wâ.

³⁸ Me e ame ha ködrin, ka habe, Ieû gabun öbun e hlohlo? ke ieû ame kû gan lolo eû hnyi je hnyekubun?

³⁹ Wâ bi li hnyamok me li cak, a inya ang: mâdrö nya ju, me wâ; anyin ae ba hanu ae hu utioiny me je jö helâ me hnobun hna ö nya.

⁴⁰ Ke a hia but ha e, e ame omanenâ ködrin li hnyamen, me li can.

⁴¹ Ke ödrin e tiga ca kap bi, anyin a ödrin e senyin me lâiâ, me e ame ha ködrin, ka habe, E hu ö ʼbun jeû eang?

⁴² Me ödrin e ham kâu ong hanen wâ adre le.

⁴³ Ke e ame hom me han hnyi hnyimaködrin.

⁴⁴ Me e ame ha ködrin, ka habe, Walang je hofuc oge me ha köbun, waleji e me tiga inya ang unyibun, ae ûcû he ka owhâdâ ta je ûnyi hia adre sihnalimen hnyi hnanyibu anyi Mose, me ta je perofeta, me ta je salamo gak.

⁴⁵ Me e ame khong ut je hnyekudrin, me ödrin e he ka wâhmakhmeto hna sihnalimen;

⁴⁶ ke e ame ha ködrin, ka habe, Adre hia but sihnalimen helâng, a gʼ ame he Keriso ka vec, me möt hmetu ûheny hnyi hna mok hnyi bong a kuniny;

⁴⁷ me he ka khetâ, hnyi ta je hnyei hia hwân hnyi Jerusalema, ietra, mo he ka thang degecâ ta je hulö ûnyi ge ien.

⁴⁸ Ke öbun bi hnyat ohnathoâ ta je ûnyi e.

⁴⁹ Ke wâ bi, inya oge me he ka kunâ köbun hna ha bânâ ga Cica: ke so öbun e he ka mē laba hnyi taun ke ne o but öbun e he ka hu man ûnyi ethö.

⁵⁰ Ke e ame hum ödrin cicö Bethania: ke e ame hai li hnyamen me hahnahici ödrin.

⁵¹ Ke e ame tiga hahnahici ödrin, me e ame ie ûsâkâûö but mödrin, me adre me kap dö e hnyi drany ai.

⁵² Ke ödrin e khudrung ju kâu, me he hmetu Jerusalema ai me senyin ae gan hmâ:

⁵³ ke ödrin bala bi hnyin uma kap, kʼ ödrin e haisoâ Khong.