Luka 21 - Iaai Bible 1901 (New Caledonia)

¹ KE e ame wâ tavat ae tren omjeû adre me ve khûâ anyidra ta je bwihlany ka hnyi tangen mone.

² Ke e ame wâ ke safac ae theduoc, ame khûâ li mone ae ûhnyûkong.

³ Ke e ame ha, ka habe, E hnathu inya oge me ha köbun, ka habe, E gan hmâ hnen safac eang ae theduoc hna khûâ, hudrin hia:

⁴ anyin a ödra hia adre me ve khûâ ka hnyi tangen bwihlany ûnyi hnyi unöngöt gadra: ke haba momo ûnyi hnyi anyin theduoc ame khûâ hia hwaban anyin möt.

⁵ Ke haba keihen adre me ûhnenamö uma kap, wale adre omecâ ge ta je veto ae so me je bwihlany, me e ame ha, ka habe,

⁶ Haba ta je ûnyi e öbun e wâ, ame he ka o ûen, me ame ca he bi ka hnen ke veto hon ke veto, ke adre me he ka thö hia.

⁷ Ke ödrin e hnö e, ka habe, At ûne lö, ame he ka hwâdâ kehö ta je ûnyi e? ke ieû haten ge ûen ame he ka hwâdâ hnyin ta je ûnyi e?

⁸ Haingen, ame ha, ka habe, Wâ eâu, adre nye omonu öbun dut: anyin a at se hia adre me he ka o hnyi iök, me ve ha, ka habe, Inya ang; ke, e hakekeny jut ûen: ca he öbun ka hnu hotudrin.

⁹ Ke öbun ka long hön vat, me bwebwet, ca ot bi: anyin ame he ka mē o ta je ûnyi e; ke ca logot bi obiny.

¹⁰ Me e ame ha ködra, ka habe, Ame he ka tot metâ ke hnyei ka ke hnyei, me ke dokhu ka ke dokhu:

¹¹ ke ame he ka hu ta je hwiöi ae gan, me hmiâ, me mok hnyi ke je dok; ke ame he ka manen ûnyi hnyi drany ta je ûnyi hnân outen, me ta je haten ae gan.

¹² Ke adre me he ka kot öbun, ke tiga ca o ta je ûnyi eling, me okongu öbun, me hnʼ öbun ka hnyi je sunago, me je uma ceat, me lili öbun ka je than me gavena can iök.

¹³ Ke ame he ka o e köbun hnân ohnatho.

¹⁴ Anyin a wale ip ju eû hnyi je hnyekubun, a ca he öbun ka mē ûnykûme ûnyi hnân he ka thu:

¹⁵ anyin oge me he ka ham köbun hnyem me metâ, me me ca khana iwahnaihmiony möbun he ka ûkhin fuc möbun me ton.

¹⁶ Ke ame he ka alecuʼ Öbun hnen je kamen, me hinyen, me je liamekeiny, me lahanöbun, me je lawaebun; ke adre me he ka hlingâ keihen gabun.

¹⁷ Ke ame he tavat hia thithö ka hûköti öbun can iök.

¹⁸ Ke ame ca he ka hia ke leûnen böbun.

¹⁹ Öbun ka hok hnyok, me öbun e he ka möt.

²⁰ Ke öbun ka wâ Jerusalema adre me igigilo hnen vat, me wâhmakhmeto ju öbun ae hakekeny jut he ka ohia e.

²¹ Hnyi ûen eling, e so e he at Juda ka kec ka hnyi je bucen; ke so e didrut tavat adre me laba hnyin taun eling; ke ca dit hmetu bi ûhedra hnyiöu.

²² Anyin a ûen bi hwaban eling, me me hwâdâ ta je ûnyi hia adre me sihnalimen.

²³ Ekölö ge tavat a ödra erkin, ke tavat ûasin hnyi bong e! anyin ame he ka o hlöuhlöu ae gan hnyi hnyei, me hmonyin ka tavat ang.

²⁴ Ke adre me ke ka ta ge homakan hele vat, me he ka hom hwenbʼ ödra ka aten ta je hnyei: kʼ ame he ka uto Jerusalema hnen aten ta je hnyei, ke ne o but ame bekhöt ut ûen aten ta je hnyei.

²⁵ Ke ame he ka hu ta je haten hnyi seûno me tehi me ta je okhû; ke hlöuhlöu hnyi hmeledrany minya, ke hlohlo hnyi ta je hnyei can imeainy köiö me ta je waköiöiny ame û:

²⁶ ame he ka mok tavat ge ot, kʼ adre me penapena halubahingen ta je ûnyi eling ame he ka o ka hnyi hmeledrany: anyin adre me he ka jijingâ ta je man ethö hnyi drany.

²⁷ Ke hnyi ûen e adre me he ka wâ Nokon at ame utut kʼ ame tabâ ûlâ tha e me man, mo hmanenang ae gan.

²⁸ E ka hwân he ka hwâdâ ta je ûnyi eling, bwele thʼ öbun me wâ; anyin ae hakekeny jut he ka omeli öbun.

²⁹ Ke e ame ha ködra ûhöûcû, ka habe, Wâ bi imeta me je ûö hia:

³⁰ e ka kû thö, me öbun e wâ me wâhmakhmeto ae hakekeny jut honivakeny.

³¹ Ke helâe, öbun ka wâ ta je ûnyi eang ame o, wâhmakhmeto ju öbun ae hakekeny jut dokhu dokhon Khong.

³² E hnathu inya oge me ha köbun, a gʼ ame ca he ka hia dö eang, ke ne o but ame hwâdâ ta je ûnyi hia.

³³ Ame be ka hia drany me hmeledrany: ke ame ca he bi ka hia hok ta je hofuc.

³⁴ O ʼbun âu, wâ e nye hmak je hnyekubun ge hna han gânâ, me hna ijem gânâ, me hna ûnykûme möt ang, me ame he ka o bong eling me outhmoki öbun helâ me hnewe:

³⁵ anyin ame he ka o helâe ka tavat hia adre me labâ hmeledrany.

³⁶ Ke hmâkâ ju öbun hnyi je ûen bia, me labö hic, me me khanʼ Öbun he ka kec ge ta je ûnyi hia eang ame he ka o, me he ka ûtitilen hnyi hnyimakan Nokon at.

³⁷ Ke e ame ûne hnyi uma kap hnyi je lany; ke hnyinghet ut e ame didrut me laba hnyi bucen, Elaio ien.

³⁸ Ke hnyi je hnyomakatu ame he but kâu tavat hia ka hnyi uma kap he ka long kâu.