Luka 20 - Iaai Bible 1901 (New Caledonia)

¹ HABA hnyi ke bong, e ame tiga nâ tavat hnyi uma kap, kʼ ame khetâ ûthumetu ae so, me ame o but kâu je taben tavat bihut me tavat sihnalimen, me wahingat;

² me haingödra kâu, ka habe, Ha thö kohmun: Ûnyi ga ia musi u me ânyâ kâu ta je ûnyi e? Ke ia ham köu musi e?

³ Me e ame thu ködra, ka habe, Oge me he bi nya ka hnei öbun ke ûnyi, ke thu thö könya:

⁴ Haba bapataiso anyi Ioane, hawa ûnyi hnyi drany, hawa ûnyi ge at?

⁵ Me adre me ûhnenamö, ka habe, Ate ne ha, ûnyi hnyi drany, me e ame he ka ha, ka habe, Ieû e gabun öbun e ca kap e?

⁶ Ke ate ne ha, ka habe, Ûnyi ge at; me ame he tavat hia thithö ka lûʼ öta ge veto: anyin ae manen ködra a perofeta Ioane.

⁷ Me ödrin e thu, ka habe, E ca khanʼ öhmun dok a ûnyi hnyin.

⁸ Haba Iesu ame ha ködrin, ka habe, Oge me ca he minya inya ka ha köbun musi oge me ânyâ kâu ta je ûnyi e.

⁹ E ame hwân he ka ha ka tavat ûhöûcû ang, ka habe, Ame tā hnyei vine hnen ke at, kʼ ame hna ka tavat ödrin e belökâ hnyei, me he but ka hnyi hnyei ae sâkâu he ka laba beû hmâ eling.

¹⁰ Ke haba hnyi huna e ame kunâ athnyabainy ka tavat belök, mʼ ödrin e he ka ham kâu je wan vine ke haba tavat belok, me ödrin e kot e me obâ ke ba ûnyi a hom.

¹¹ Me ame kunâ ke athnyaba bi: ke odrin e kot minya e, me okongoâ, me obâ ke ba ûnyi a hom.

¹² Ke e ame kunâ hmetu a kuniny: ke ödrin e kot minya e, me obâ kâû.

¹³ Me ame ha tuhan hnyei vine, ka habe, Ieû oge me he ka ânyâ? Oge me he ka kunâ nokuk a oûnykûmik, ödrin e he la ka ogânâ e.

¹⁴ Ke a wâ but e hnen tavat belök, me ödrin e ûsabö, ka habe, Wale but ang mâtrân: otin e he ka hlingâ e me me tang omjehetin biju anyin ta je ûnyi.

¹⁵ Me ödrin e obâ but e kâû ka hnyi hoton hnyei vine me hlingâ. Anyin a wale, ieû ame he ka ânyâ tuhan hnyei vine ködrin?

¹⁶ E ame he ka o me ohia tavat belok, me ham hnyei vine ka keihen. Ke adre me long ut, me haingödra, ka habe, Ekölö, e so e me ca helâe.

¹⁷ Me e ame ö ʼdrin me ha, ka habe, Ieû hna sihnalimen, ka habe, Haba veto ame degec hnen tavat hötilö uma, Adre hia but ânyâ hnân ban hon bahebet?

¹⁸ Haba at ame he ka kolu takoû veto ang ame he ka amam, ke e ka kolu ka hnyi hon at, me ame he ka thu omomono e.

¹⁹ Ke haba tavat sihnalimen, me ta je taben tavat bihut adre me elâm hnyi awa eling he ka kât e; ke ödra outen tavat: anyin ae khanʼ ödrin dut a e ame ha ûhöûcû eling gadra.

²⁰ Ke adre me tuö e, me kunâ keihen he ka ecmâkâ, me iyawâ hwakecin ae wisa, kʼ ödrin thoi bi, mʼ adre me he ka kât e ge ta je ifucin, mʼ adre me he ka hna but e ka tavat owisa, me musi anyin gavena.

²¹ Ke adre me hnö e, ka habe, At ûne lö, e khanʼ öhmun dut a u me ha me ûnö wisa, ke u je ca wâhmakhmeto at, ke u me nâ hnatho gethen deny Khong:

²² E ûcû kohmun he ka fat kö Kaisara, hawa, degec ut?

²³ Ke e ame wâ but je hnyekudrin, me e ame ha ködrin, ka habe,

²⁴ omanenâ thö könya denari. Hnyimakö ia ang, me hna sihnalimen? Ke ödrin e thu, ka habe, Kaisara.

²⁵ Me e ame ha ködrin, ka habe, Awe, ham but kö Kaisara ta je ûnyi anyi Kaisara, ke ka Khong ta je ûnyi anyin Khong.

²⁶ Ke ca khanʼ ödrin he ka kât e ge ifucin hnyi hnyimakan tavat: ke adre me lâiâ hnen hna thu, me laba hnyibû.

²⁷ Me ame o but kâu keihen ta je Sadukaio, tavat adre me ha, ka habe, e ba möt hmetu thö; ke adre me hnö e,

²⁸ me ha, ka habe, At ûne lö, haba Mose ame sihnalimen kohmun, ka habe, E ka mokcu at ae hu âiân a liamekeiny me ke at, ke e ka mokcu e ke ba nokon, me hamen liamekeiny mē he ka hom momo e, me bi mâtrân liamekeiny mē.

²⁹ Ke wale je liamekeiny a seven: ame faipoipo thö atö, me ame mokcu ke ba mâtrân;

³⁰ ke ame hom dö e at a loiny; me at a kuniny;

³¹ ke helâe gadrin hia hnyat a seven, ödrin e mokcu ke ba mâtrânidrin.

³² Ke hwabodrin dö ame mok minya ju momo.

³³ Ame he ka öiö ia e gadrin hnyi möt hmetu? anyin a ödrin seven ödrin e hom e.

³⁴ Ke haba Iesu ame thu ködrin, ka habe, Haba tavat eang hmelen, me adre me faipoipo, me ûham ta momo:

³⁵ ke haba tavat a ödra ûcû he ka he ka hnyi möt eling, ke he ka möt hmetu ûhedra hnyi hna mok, me adre me ca he bi ka faipoipo me ûham ta momo:

³⁶ ke ca khanʼ ödra bi he ka mok hmetu: anyin a ödra ûcû me ta je angela; ödra lakon Khong, a lakon möt hmetu ûnyi hnyi hna mok.

³⁷ Ke so bi, a hia but omanenâ ga Mose, hnyi dok eji a uhnyot, a gʼ ame he ka möt hmetu tavat ûhedra hnyi hna mok, waleji hnyi hnen hna hawâ Than a Khongu Aberahama, me Khongu Isaaka, me Khongu Jekob.

³⁸ Haba Khong, me ca Khongon tavat adre me mok, ke so bi tavat ae möt: anyin adre me möt hia kâu.

³⁹ Me ame thu hnen keihen tavat sihnalimen, ka habe, At ûne lö, e so hnâm hna ha.

⁴⁰ Ke hwaban e me ba hmetu at ae hwege hnyekon he ka hnö gan ke ûnyi.

⁴¹ E ame ha kodra, ka habe, Adre me kâmâu hna ha, ka habe, Haba Keriso me nöku Davita?

⁴² Anyin a haingö Davita hnyi tusi Salamo, ka habe, Ame ha Than ka Tuhok, ka habe, Laba ju hnyi ke keihök a metök,

⁴³ Ke ne o but oge me he ka wia je iwahnaihmiony möu me hnân taben li cam.

⁴⁴ Anyin a wale, a ne ha Davita, ka habe, Than, me ame he ka kâmâu ka nokon bi?

⁴⁵ Ke e ame ha ka laten hnyi hnyimakan tavat ae se hia, ka habe,

⁴⁶ O ʼbun âu ge tavat sihnalimen, hnyat a wedra he ka he me ta je ûkhaû ae beû, me he ka nom kodra tavat hnyi ta je hna ûcû, me je hing taben lap hnyi je sunago, me je hna laba ae beönua hnyi je bijeû;

⁴⁷ ödra adre me walâkâ je uma umen je safac, me hic beû hmâ hnân tube hwakecidra: adre me he ka hu hnaûhango ae gan hmâ.