Luka 2 - Iaai Bible 1901 (New Caledonia)

¹ HABA hnyi je bong e, ame he but hnanyibu ûnyi ga Kaisara Auguso he ka sihnalimen aten hmeledrany hia.

² Wale hna sihnalimen a bân hnyi ûen Kurenio ame musi hnyi Suria.

³ Me adre me he hia but he ka sihnalimidru adre ve he ka idrin bi je taun.

⁴ Me ame he minya but Josefa ûheny hnyi taun Nazareta hnyi Galilaia, ame he Juda ai, ka hnyi taun anyi Davita, Betheleema ien, anyin a e hanen lap me mâtrâni Davita;

⁵ me me sihnalimen e me Maria, wale a ûköcö mē, kʼ ame erkin dut.

⁶ Ke tiga ödru ling, me ame o but bong ame he ka hnokoâ hnyin.

⁷ Me e ame hnokoâ nokon da a atö; ke e ame wâdrâ e ge mano, me omokulec ju hnyi taben jeû an meno, anyin ae ba hnödrin hna mokut hnyi uma umen je atkanyaua.

⁸ E hu tavat tuö mamoe hnyi hnyei eling, ödrin e hmâkâ hnyi hnyinghet haledrin ta je mamoe.

⁹ Ke ame tot unyidrin angela anyin Than, me ame umumelam igigili ödrin melaminy Than, me ödrin e ot gan hmâ.

¹⁰ Ke haba angela ame ha ködrin, ka habe, Ca ot bi; anyin a wâ bi, inya oge me ha köbun ûthumetu ae so hnân senyin gan hmâ hobi kâu tavat hia thithö:

¹¹ anyin adre hnokoâ hobi köbun hnyi bong ang hnyi taun anyi Davita, At ûhomeli, wale Keriso a Than.

¹² Ke walang haten köbun; Öbun e he ka wâ mendreng adre wâdrâ ge mano, ame mokut hnyi taben jeû an meno.

¹³ Me ame ie tha e me angela tavat ae se hia ûnyi hnyi drany, adre me ogânâ Khong me ha, ka habe,

¹⁴ Ogânâ thö Khong ae nua ethö görany; Ke haba hnyi hmeledrany hnahic unyin tavat wale e ame betenge gadra.

¹⁵ Ke ame he but gadrin je angela hnyi dranyai, me ame ûhaköuâ hnyat tuö mamoe, ka habe, otin a he walang ang Bethleema ai, me wâ ûnyi eang adre ânyâ, wale ame omanenâ köta hnen Than.

¹⁶ Me ödrin e he logot me ō Maria me Josefa, me inma minya ame mokut hnyi taben jeû an meno.

¹⁷ Ke ödrin e wâ but, me ödrin e omanenâ hna thumetu ödrin ge wanakat e.

¹⁸ Ke haba tavat hia adre me long me adre me lâiâ ta je hofuc ame ha kodra hnen hnyat tuö mamoe.

¹⁹ Ke haba Maria ame ip hmâ ta je hofuc eling hia, me ûnykûme eû hnyi hnyekon.

²⁰ Me ame hmetu but hnyat tuö mamoe, ödrin e ole me ogânâ Khong ge ta je ûnyi hia ödrin e long me wâ, helâji me hna ha ködrin.

²¹ Ke ame o but bong a eitiny hnân peritomonâ wanakat, me ame hwenyi ien me, Iesu, wale a ha angela ke tiga ca erkin bi hinyen.

²² Ke ame um dö je bonginy obosoi ödru helâ me hnanyibu anyi Mose, me adre me hom but e Jerusalema ai, he ka ip e hnyi hnyimakan Than,

²³ (helâji me hna sihnalimen hnyi hnanyibu anyin Than, ka habe, Adre me he ka ha me kap ka Than ta je atö baga hia),

²⁴ me ham ke hut helâ me hna ha hnyi hnanyibu anyin Than, ka habe, Lo li biny, ame ne li lakon meköta.

²⁵ Ke wâ bi, wale ke at hnyi Jerusalema Simeona ien; e at ae wisa hwakecin me outen Khong, ame halubahingen hna otubwelâ at Isaraela: ke e Hanu Kap hnyi hon.

²⁶ Ke adre hia but omanenâ kâu a deny Hanu Kap, a gʼ ame ca he ka wâ mok, kʼ ame he ka mē wâ thö Keriso anyin Than.

²⁷ Ke e ame didro ka hnyi uma kap hnen. Hanu: haba kamen me hinyen ödru me hom wanakat a Iesu he ka mâdrâ kâu hoton hnanyibu,

²⁸ ke e ame kap e hnyi li benyen, me ogânâ Khong, me ha, ka habe,

²⁹ Than lö, u ma hna but walang ang athnyabaem he ka he hnyi hnahic, Helâji me hwâm hofuc;

³⁰ Anyin oge me wâ ge li emakök ûhomeli ûnyi gam,

³¹ Wale u je penapena hnyi hnyimakan tavat hia thithö;

³² Wale melam hnân omelamâ Aten ta je hnyei, Ke hnân hmanenanginy lakem a Isaraela.

³³ Ke haba kamen me hinyen, me ödru me lâiâ ta je ûnyi adre me ha gan;

³⁴ ke haba Simeona ame hahnahici ödru, me ha kö Maria a hinyen, ka habe, Wâ bi, adre me ip wanakat ang hnân okolo me otilâ tavat ae se hia hnyi Isaraela; ke hnân haten minya adre me he ka haikongoâ;

³⁵ eke adre me he ka dâoâ minya hnyekom ge hele vat; me me manen dut je ûnykûmen hnyok ae se hia.

³⁶ Ke wale ko perofeta momo jia Ana, nöku Fanuela, hanen tribu Asera (ae se hia hmonyin je hunainy, kʼ ame tha laba me âiân ehac hnyi ta je huna a seven hwân ke tiga hlu,

³⁷ ke e safac hnyi ta je huna a eite foa), e ame ca hnyi bia hnyin uma kap, kʼ ame bi athnyaba hnyi lit me lany, me ânyâ ca han, me labö khöû.

³⁸ Ke e ame o thö hnyi awa eling, ame hnyi ole ka Khong, me e ame hâiâ e kodra hia hnyat adre me halubahingen hwaban möt hnyi Jerusalema.

³⁹ Ke ödru me umo ta je ûnyi hia hoton hnanyibu anyin Than, me ödrin e hmetu Galilaia ai ka hnyi anyidrin taun wale Nazareta.

⁴⁰ Ke ame gan dut wanakat, me ame hwege me metâ tot: ke e unyin ibetengiö anyin Khong.

⁴¹ Ame labö he kamen me hinyen Jerusalema ai hnyi je huna ka hnyi bijeû paseka.

⁴² Ke twelv but ta je hunainy ödrin e he Jerusalema ai helâ me hwakecin bijeû;

⁴³ ke a um dö je bongudrin, me ödru me he hmetu, ke ame laba biju wanakat a Iesu hnyi Jerusalema; ke ca khana kamen me hinyen;

⁴⁴ ke ödru me ûnykûme a e eû hnyi wanben bunyen, ke ödru me he khaca bong; me ödru me elâm e unyin je liamekeiny mödru me lahanödru:

⁴⁵ ke ödru me ca wâ bala, me ödru me hmetu but Jerusalema ai he ka elâm.

⁴⁶ Ke hwaban kun ta bong ödru me wâ e hnyi uma kap, ame laba hnyi wanben tavat ûne, ame ling ödrin me hnei ödrin:

⁴⁷ haba tavat hia adre me long, me adre me lâiâ gan hmâ anyin metâ me hnen hna thu.

⁴⁸ Ke Ödru me wâ e, me ödru me lâiâ: ke haba hinyen ame ha kâu, ka habe, Nokuk lö, ieû gam u je helâe köhmu? wâ bi, inya me kâmâm ohmu me elöm u, kʼ ohmu tenge.

⁴⁹ E ame ha ködru, ka habe, Ieû gabu öbu me elöm nya, e ca khanʼ öbu a hamök he ka vheno ta je ûnyi anyi cica?

⁵⁰ Ke ödru me ca wâ ûnykûme hnen hna ha ködru.

⁵¹ Ke e ame tha he mödru, me o hnyi Nazareta; ke e ame long hotudru: haba hinyen ame ip hmâ hnyi hnyekon ta je ûnyi hia thithö eling.

⁵² Haba Iesu ame kû tot hnyi metâ me je huna, ke ame betenge gan Khong me at.