Luka 18 - Iaai Bible 1901 (New Caledonia)

¹ E AME ha ûhöûcû ködrin, me me he tavat ka labö hic bala, ke adre me ca he ka sënyin;

² haingen, ka habe, Wale at owisa hnyi ke taun, at ame ca outen Khong, kʼ ame ca ogânâ at:

³ ke wale ke safac hnyi taun eling; ke e ame ibi ose o but kâu me ha, ka habe, Owisa thö könya me iwahnaihmiony mönya.

⁴ Ke e ame höcö hnyi ûen eling: ke hwaban dö e, e ame ha eû hnyi hnyekon, ka habe, Eja ke ne oge ne ca outen Khong, ke oge me ca ogânâ at;

⁵ ke oge me he bi nya ka owisa ka safac ang, can a gʼ ame labö lili nya, wâ oge nye mokhon dut gan ame labö he jem könya.

⁶ Haba Than ame ha, ka habe, Long ju öbun hna ha hnen at owisa ae hwali hwakecin.

⁷ Ke hawa, ame ca he Khong ka owisa ka tavat e ame ûca, a tavât adre me hongot kâu hnyi lany me lit, ke e ame hok hnyoki ödra beû hmâ ju?

⁸ Inya oge me ha köbun, e ame he ka ie owisa ködra. Ke e ka o Nokon at, hawa e ame he ka wâ labageju eang hmeledrany?

⁹ Ke e ame ha ûhöûcû eang ka keihen adre me ka labageju kodra bi, a ödra wisa, ke adre me oûnyibâûâ keihen:

¹⁰ Haba lo li at ödru me he ka hnyi uma kap he ka hic, Faresaio ke at, ke telona ke at.

¹¹ Haba Faresaio ame tot me hijö e bi helâng, ka habe, Khong lö, inya oge me ole köu, anyin a iny ca ûcû bi me keihen, a tavat venöu, me hwali hwakecidra, me tavat bi ûnyi monu, kʼ iny ca ûcû minya bi me telona ang.

¹² Inya oge me olo ânyâ ca han hnyi je wik, ke oge me ham ke keihen a libenyitainy anyik ta je ûnyi hia thithö.

¹³ Ke haba telona ame tot sâkâû, e ame ca mē bwele bi hnyi drany ai, ke e ame khaû ûlainy me ha, ka habe, Khong lö, betenge ju gak at ae monu,

¹⁴ Inya oge me ha köbun ame he but at ang ka hnyi umen uma, ke adre haiwisa e hon at eji: anyin adre me he ka oûhnyûkongo at ame ogânâ e; ke adre me he ka ogânâ at ame Öûhnyûkongoâ e.

¹⁵ Ke adre me hom but minya kâu, ta je mendreng me me he ka kâlʼ ödra: ke ame wâ e laten, me ödrin e thawʼ ödra bi.

¹⁶ Ke haba Iesu ame hawʼ ödra kâu, me ha, ka habe, Hna but ta je wanakat ka he jem könya, ke ca thawʼ ödra bi: anyin a ödra ûcû me dokhu dokhon Khong.

¹⁷ E hnathu, inya oge me ha köbun: haba at ame ca he ka kap dokhu dokhon Khong helâ me wanakat, me e ame ca he balua ka didro ka hnyin.

¹⁸ Me ame hnö e hnen ke taben, ka habe, At ûne ae so lö ieû hanymök oge me he ka mâdrâ e me hu thö könya möt ame ca ba balua?

¹⁹ Ke haba Iesu ame ha kâu, ka habe, Ieû e gam u me ha mʼ iny so? e ba ke at ae so, ke khaca thibi a Khong.

²⁰ E khanö u ta je hnanyibu, ka habe, U ca he ka bi ûnyi monu, U ca he ka ûhlingö, U ca he ka venöu, U ca he ka bi fuco thoiâ, Ogânâ ju kâmâm me hinyâm.

²¹ Ke e ame ha, ka habe, Oge hia but vheno ta je ûnyi e kʼ iny tiga wanakat.

²² Ke a long ut Iesu ûnyi e, me e ame ha kâu, ka habe, Khaca biju ûnyi ae hia gam: ûco thö ânyâm ta je ûnyi hia, me khenâ ka ta je theduoc, ke u me he ka hu tang omjeû hnyi drany: ke aiö u bi, me he hotuk.

²³ E ame long je hofuc e, me ame hmak ut hnyekon, anyin a e tren omjeû ae gan hmâ.

²⁴ Ke ame wâ e Iesu, me haingen, ka habe, Huliwa but at ae tren omjeû he ka didro ka hnyi dokhu dokhon Khong!

²⁵ Anyin ae hâhâ ka kamela he ka didro ka hnyi hwanumen jebû, ke hnek bi he ka didro ka hnyi dokhu dokhon Khong ka at ae tren omjeû.

²⁶ Haingen tavat adre me long e, ka habe, Ia la ae khana he ka möt?

²⁷ Ke e ame ha, ka habe, Haba ta je ûnyi hia thithö ae ca khana at, me khana bi Khong.

²⁸ Haba Peteru ame ha, ka habe, Wâ bi, ohmun e hia but hna degecâ ta je hnyabahmun, me he hotom.

²⁹ Haingen ame ha ködrin, ka habe, E hnathu inya oge me ha köbun; a haba at ame hna but uma, me âiân, me je liamekeiny mē, me kamen, me hinyen, me lakon hobi kâu dokhu dokhon Kkong,

³⁰ me e ame he ka kap ta je ûnyi ae se hia hnyi ûen ang, ke hnyi ûen ame he ka o möt ae ca ba balua.

³¹ E ame hom kâu hnyat a twelv me ha ködrin, ka habe, Wâ bi, otin e he ka he Jerusalema ai, ke ame he ka hwâdâ ka Nokon at ta je ûnyi hia a sihnalimen ta je perofeta.

³² Anyin adre me he ka hna e ka aten ta je hnyei, ke adre me he ka hluma e, me okongoâ, me hangöjâ:

³³ ke adre me he ka osoâ, me hlingâ e: ke e ame he ka möt hmetu thö hnyi bong a kuniny. I

³⁴ Ke ödrin e ca wâ ûnykûme bi ta je ûnyi eling; e iyong ködrin hofuc e, kʼ ödrin e ca wâhmakhmeto bi ta je ûnyi e ame ha.

³⁵ E ame hakekenyâ Jeriko, ke haba ke wadröu ame laba eû hnyi baten gethen, kʼ ame sumâtâ ta ûnyi:

³⁶ ke e ame long hwan bunyen ae gan, me e ame hnei, ka habe, Ieû ang?

³⁷ Ke adre me thumeto e a gʼ ame he thö Iesu at Nazareta.

³⁸ Me e ame hongot, ka habe, Iesu lö, nöku Davita, betenge ju gak.

³⁹ Ke haba tavat a bodrin ödrin e thawâ e, me me laba hnyibû ju: ke e ame hongot hwege tot, ka habe, Nöku Davita lö, ö u betenge gak.

⁴⁰ Haba Iesu ame todru, me ûkhûnöng he ka hawâ e kâu: me e ame o but, ke e ame hnö e, ka habe,

⁴¹ Ieû ae wem oge me he ka ânyâ köu? Ke e ame ha, ka habe, Than lö, mʼ inye bwela but.

⁴² Ke haba Iesu ame ha kâu, ka habe, U je bwela but: u je mödrut hnen ânyâm labageju.

⁴³ Me e ame ie bwela but, me he hoton, me haisoâ Khong: ke a wâ but e hnen tavat hia, me adre me olungâ Khong.