Luka 17 - Iaai Bible 1901 (New Caledonia)

¹ E AME ha ka laten, ka habe, E ca khana he ka ca o ta je ûjejöng: ke ekölö ge at ame bi deny ûnyi eling!

² E hâhâ kâu he ka vekiny hnyi hwagenyin veto hnân oamamâ, me he ka öûâ but e eû hnyi köiö, ke e hmak kâu ame ne he ka bi joniny ke at ae ûhnyûkong eang.

³ Wâ eâu öbun: A ne monu but kem, nâ thö; ke a ne ietra but, hna degecâ anyin monu.

⁴ Ke ame ne he ka oseven monu köu hnyi bong a khaca, kʼ ame oseven hwio köu me ha, ka habe, Oge me ietra; me u me he ka hna degecâ anyin monu.

⁵ Haba je aposetolo ödrin e ha ka Than, ka habe, Bi hanen ju anyihmun labageju.

⁶ Haba Than ame ha, ka habe, A ne hu gabun labageju helâ me wan sinapi, öbun e he ka ha ka ûö sukamine eang, ka habe, Ok dö me iwân, me konim u but eû hnyi köiö; me ame he ka ling öbun.

⁷ Ke ia gabun ae hu athnyabainy ame trohnen, ame ne tuö mamoe, ke e ame o but ûheny hnyi utkânâ, me ame he ka ha kâu, ka habe, Ie aiö u, mʼ u me han;

⁸ ke ame ca bân he ka ha kâu, ka habe, Penapena thö hnok hna he ka han, ke hûkâlâ ju wen hnyekom, me huliwa könya ke ne o but oge hia but han me ic; ke hwaban e, u me he ka han me ic?

⁹ Hawa, e ame ole ka athnyaba, anyin a e ame ânyâ ta je ûnyi adre hûna?

¹⁰ Helâe minya öbun, öbun ka hia but mâdrâ ta je ûnyi adre hûna köbun, ha thʼ öbun, ka habe, Öhmun ang je athnyaba ae ba troban; öhmun e hia but mâdrâ thibi hanymöhmun he ka mâdrâ.

¹¹ Ke e ame he hnyi wanben Samaria, me Galilaia, ame he Jerusalema ai.

¹² Ke e ame tiga dit ka hnyi ke taun, me ame ûkhanö me je lepera a ten, ödrin a tot sâkâû:

¹³ ke ödrin e fuc hwege, ka habe, Iesu a Than lö, betenge ju gahmun.

¹⁴ Ke e ame wâ, me e ame ha ködrin, ka habe, He thʼ öbun ka omanenʼ öbun ka tavat bi hut. Ke ödrin e tiga he, me ödrin e so but.

¹⁵ Ke a wâ but hnen ke at gadrin a ga so but, e ame hmetu ju me haisoâ Khong ge ifucin ae gan;

¹⁶ me ta ju hnyikânâi hnyi hmelen li can, me ole kâu: haba at Samaria e.

¹⁷ Ke haba Iesu ame thu, ka habe, Hawa, ödrin ca ten adre osoâ? ewa biju nain?

¹⁸ E ba ju ke at adre wâ ame hmetu he ka haisoâ Khong, ke hake wale thibi ang atkanyua?

¹⁹ Me e ame ha kâu, ka habe, Todrö, he thö, u je mödrut hnen ânyâm labageju.

²⁰ Ke a hia but ta je Faresaio hnö e ge ûen ame he ka o hnyin dokhu dokhon Khong, me e ame thu ködrin, ka habe, A ca e bi dokhu dokhon Khong me hnân wâ:

²¹ ke haba khaca, adre me ca he ka ha, ka habe, Wâ bi ang! ke wâ bi e! anyin a wâ bi, e hnyi wanböbun dokhu dokhon Khong.

²² Ke e ame ha ka laten, ka habe, Ame he ka o ûen, öbun e he ka weny he ka wâ ke bonginy Nokon at, ke öbun e ca he ka wâ.

²³ Ke adre me he ka ha köbun, ka habe, Wâ bi e! Wâ bi ang! ca he ka hnyin me hnu hoton:

²⁴ anyin a haba hucuce, ame hiâ hnyi ke keihen drany, me umumelam ka hnyi ke keihen drany; ame he ka helâe Nokon at hnyi anyin bong.

²⁵ Ke hamen he ka mē vec ge ta je ûnyi ae se hia, me hota degecâ hnen dö ang.

²⁶ Ame he ka ûcû ûen Nokon at me je bong eji bongu Noa.

²⁷ Adre me han, adre me ic, adre me faipoipo, ke ûham ta momo, ke ne o but hnyi bong ame dit Noa ka hnyi hu, me ame o but uoû me ohiʼ ödra hia.

²⁸ Helâc minya hnyi je bong bongu Lota; adre me han, adre me ic, adre me ûcû, adre me belök, adre me bi uma;

²⁹ ke haba hnyi bong ame kec Lota ûheny Sodoma, me ame ta meic me teio ûnyi hnyi drany, me ohiʼ ödra hia:

³⁰ ke ame he ka helâe minya hnyi bong ame he ka manen hnyin Nokon at.

³¹ Haba at hnyi hon uma hnyi bong eling, ke eiö anyin ta je ûnyi hnyin uma, me so e ame ca ut bi he ka hom: haba at hnyi hna belök, me so e ame ca hmetu bi.

³² Ûnykûme ju öiö Lota.

³³ Haba at ame he ka elâm he ka tuö anyin möt, me ame he ka ohia e: ke haba at ame he ka hna anyin möt, me ame he ka tuö e.

³⁴ Oge me ha köbun, a gʼ ame he ka mokut lo li at hnyi lit eling hon hnamokut a khaca; adre me he ka hom khaca, kʼ ame hnen biju khaca.

³⁵ Ame he li momo ka tha oamamâ, adre me he ka hom khaca, kʼ ame hnen biju khaca.

³⁷ Ke ödrin e thu me ha kâu, ka habe, Than lö, ewa? Haingen ködrin, ka habe, Haba hnen komok, me wale hnen je aeto hna ûkhacaköu kâu.