Luka 15 - Iaai Bible 1901 (New Caledonia)

¹ AME hakekeny dö kâu ta je telona me tavat hia ae monu, he ka long kâu.

² Ke haba ta je Faresaio me tavat sihnalimen adre me ulidro, ka habe, Ame kap tavat ae kong hnen at ang, kʼ ame tha han mödra.

³ Me e ame ha ûhöûcû ang kodra, ka habe,

⁴ Ia gabun ae tren mamoe a wan haded, kʼ ame hia khaca gadra, hawa, ame ca he ka hna but nainte nain hnyi hnyebuba, me elâm at a hia ke ne o but e ame wâ ju e?

⁵ Ke ame wâ ju, me e ame ip hon abenyin, kʼ ame senyin bi.

⁶ Ke e ka o ka hnyi umen uma, me e ame hawâ ûkhacaköuâ je lahanen, me tavat adre me laba hakekenyâ, me ha ködrin, ka habe, Tha senyin dö mönya, anyin oge me wâ ju halek mamoe a hia.

⁷ Inya oge me ha köbun, Adre me he ka senyin helâe hnyi drany ge ietra hnen at a khaca ae kong, hon hnödra hna senyinâ tavat ae wisa a nainte nain, waleji a ca hu gadra hnân ietra.

⁸ Ke ewa momo ae hu gan je mone a ten, ke a ne hia but khaca, ame ca he ka vâc lamepa, me aba uma, me elâm wia ke ne o but ame wâ ju e?

⁹ Ke e ka wâ, me e ame hawâ ûkhacaköuâ lahanen, me tavat adre me laba hakekenyâ, me ha, ka habe, Tha senyin dö mönya anyin oge me wâ ju anyik mone a hia.

¹⁰ Inya oge me ha köbun, a gʼ ame he ka hu senyin helâe hnyi hnyimakan ta je angela anyin Khong can ietra hnen at ae kong a khaca.

¹¹ Ke e ame ha, ka habe, Wale at ae hn lakon li baga:

¹² ke haingen wakeiat ka kamen, ka habe, Cicö lö, ham dö könya jekhöûk. Me e ame khenâ ködru anyin ta je ûnyi.

¹³ Ke tiga ca se hia bong hwaban e, haba wakeiat ame ûkhacaköuâ anyin ta je ûnyi hia, me he ka hnyi ke hnyei ae sâkâû; me e ame dedegec eling tang omjehen ge hwakecin ae khâlâdren.

¹⁴ Ke a hia but khâlâdrenâ anyin ta je ûnyi hia, me ame o but hmiâ ae gan hmâ ka hnyi hnyei eling, me ame hwân he ka theduoc.

¹⁵ Me e ame he me laba unyin ke at aten hnyei eling, ke e ame kunâ e ka hnyi iny ta hnyei he ka han je buaka.

¹⁶ Ke ame kû thö weny he ka an ta je unen a an buaka: ke ba at ame han e.

¹⁷ Ke ame metu hmetu thö hnyekon, me haingen, ka habe, Ve ta hlu anyi cica ae ti hu jeû me kolon bi gadrin, ke haba inya oge me he but ang ka mok ge mekihnânem!

¹⁸ Oge ma tot me he kö cica, me ha kâu, ka habe, Cica lö, oge hia but monu ka hnyi drany me hnyimâkâm:

¹⁹ ke ca ûcû hmetu he ka hawo nya me nokom: ha thö inye he ka helâ me ânyâm ke hlu.

²⁰ Me e ame tot, me he ka kamen. Ke kamen ame wâ, ke tiga sâkâû, me e ame betenge gan, me wadring, me ta ju hon nyin, me ûcimhnyimak mē.

²¹ Haba nokon ame ha kâu, ka habe, Cica lö, oge hia but monu ka hnyi drany me hnyimâkâm, ke ca ûcû hmetu ka hawo nya me nokom.

²² Ke haba kamen ame ha ka lathnyabainy, ka habe, Ie hom but jem ûkhaû ae ti so, ke okhavâ ju kâu; ke inâ thö wen hnyam kâu, ke hûkâlâju tangen li hnyeûca:

²³ ke hom but jem nokon kau ae pipikhenya, me hlingâ but mate me han me senyin:

²⁴ anyin a walang nokuk ûheny hnyi hna mok, ka möt hmetu thö; ke a hia, ke wale hmetu thö ang. Me ödrin e hwân he ka senyin.

²⁵ Ke e hnyi hnyaba nokon a atö: ke e ame o me hakekeny ka hnyi uma, me ame long khumöng me biâ.

²⁶ Me e ame hawâ ke athnyaba me hnö, ka habe, Ieû thö?

²⁷ Me e ame thu kâu, ka habe, A o thö kem; ke a hia but kâmâm hlingâ nokon kau ae pipikhenya, anyin a e ame kap ke tiga möt.

²⁸ Me e ame ka hmonyin me höcö he ka dit: ke ame didrut kamen me ûjengö e.

²⁹ Ke e ame thu me ha ka kamen, ka habe, Wâ bi, e se hia ta ge huna oge bi athnyabaem hnyin, ke ba ânyâm ke hnanyibu a khaca oge hanyâûâ: ke so bi u je ca ham balua nokon got könya, mʼ inye he ka tha senyin me lahanök:

³⁰ ke ame hap o ju nokom eang, at ame ohia ânyâm ta je ûnyi ka omomo hnyi gethen, me u je hia but hlingâ hobi kâu nokon kau ae pipikhenya.

³¹ Me e ame ha kâu, ka habe, Nokuk lö, u bala unyik, ke ânyâm bi anyik ta je ûnyi hia.

³² E ka ûcû kötin he ka senyin me hobâ: anyin a walang kem ûheny hnyi hna mok, ke a möt hmetu thö; ke hia, ke wale hmetu thö ang.