Luka 13 - Iaai Bible 1901 (New Caledonia)

¹ HABA keihen gadra hnyi ûen eling ödrin e thumeto e ge at Galilaia, waleji a ûhaniken hnö Pilato drödra me dren anyidra ta je hut.

² Ke e ame thu me ha ködrin, ka habe, Öbun e ûnykûme la, ae beönua monu anyin at Galilaia e hon at Galelaia hia, anyin ame o kodra ta je ûnyi e?

³ Inya oge me ha köbun, e ba: ke ao bi, öbun e ne ca ietra bi ame he ka hiʼ öbun minya helâe.

⁴ Ke hnyat minya a eitin ame kolu takû ödrin tap adre op hnyi Siloam, mʼ adre me mokcu, öbun e ûnykûme la, ae beönua anyidrin monu hon tavat hia adre me laba hnyi Jerusalema?

⁵ Inya oge me ha köbun, e ba; ke öbun e ne ca ietra bi, ame he ka hiʼ öbun hia minya but helâe.

⁶ E ame ba ûhöûcû ang, ka habe, E hu ge ke at imeta a tā hnyi iny hnyei vine; ke e ame he but ka heleû wan hnyin, ke ba wan ame wâ.

⁷ Me haingen ka at ame ânyâwia iny hnyei vine, ka habe, Wâʼ bi, kun dut ta huna oge o hnyin ka heleû wan hnyi imeta eang, ke ba wan oge mē wâ: sö but, hnân eû ame okongoâ kânâ?

⁸ Ke e ame thu kâu, ka habe, Than lö, mē hnen ju hnyi huna bi ang, inye mē seû igigilö thö, me bân kânân:

⁹ ke a ne wa e, e so; ke a ne ba, hwaban dö e, u me he ka sö degecâ.

¹⁰ Ke e ame ûne hnyin ke sunago hnyi sabath.

¹¹ Ke wâ bi wale ke momo, eitin dut hunainy hanu at ame osenyinâ; ke ame nom but momo, ke ca khana bi he ka tot wisa.

¹² Ame wâ e Iesu, me e ame ha kâu, ka hâbe, Momo lö, adre hia but thang ânyâm sënyin.

¹³ Ke e ame ip li hnyamen hon momo: me e ame ie wisa but, me ogânâ Khong.

¹⁴ Ke ame hmonyin at ame muso sunago, anyin a Iesu ame osoâ hnyi bong sabath, me haingen ka tavat ae se hia, ka habe, E hu siks ta bong hnân huliwa hnyin: me so Öbun e he but jem hnyi je bong eling mʼ adre me omeli öbun, ke ca hnyi bong sabath bi.

¹⁵ Haba Than ame thu kâu, ka habe, Hnyat thoi, hawa, öbun e ca ve thang hnyi sabath bolok me asina, me su hnyi köiö ai he ka habelen?

¹⁶ Ke haba momo ang, nöku Aberahama, waleji a ca Satana, wâ bi eitin dut je huna, hawa, e ca ûcû he ka thang hnyi sabath hna ca e?

¹⁷ Kʼ ame tiga ha je hofuc eling, me ame hmehma hia but je iwahnaihmiony mē: ke ame senyin bi tavat ge ta je ûnyi hia ae hmanenang e ame mâdrâ.

¹⁸ Anyin a wale e ame ha, ka habe, E ûcû dokhu dokhon Khong me ieû? ke oge me he ka oûco e me ieû?

¹⁹ E ûcû me wan sinapi ame hom ke at me tā hnyi iny hnyei; me ame kû thö me hlau, me ûö ae gan hmâ but; me ame laba hnyi je anginy ta je meno ame gâ ethö.

²⁰ E ame ha hmetu, ka habe, Oge me he ka oûco dokhu dokhon Khong me ieû?

²¹ E ûcû me leven ame hom momo me ikhâlâ hnyi falawa a kun ta tulutiny, ke ne o but ame tha khibi hia thö.

²² Ke e ame he but me he hnyi wanben je taun me je hnyaba, kʼ ame ûne tot, ame he Jerusalema ai.

²³ Haba ke at ame ha kâu, ka habe, Than lö, hawa, e wakhalet thibi tavat adre me he ka möt? Me haingen kodra, ka habe,

²⁴ Hwege thʼ öbun he ka dit hnyi homagöule ae hnek: anyin a inya oge me ha köbun, ka habe, e se hia tavat adre me elâm he ka didro hnyin, kʼ ame ca he ka khanʼ ödra.

²⁵ E ka hia but tot tuhan uma, me hlöng hwanuma, ke öbun e hwân he ka tot eû me seseto hwanuma, me ha, ka habe, Than lö, khong ut kohmun: ke e ame he ka thu me ha köbun, ka habe, E ca khanö nya öbun, öbun hoûat ua;

²⁶ me öbun e he ka hwân he ka ha, ka habe, Ohmun e hia but han me ic hnyi hnyimâkâm, ke u je ûne hnyi dehmun je gethen;

²⁷ ke e ame he ka ha, ka habe, Inya oge me ha köbun, e ca khanö nya öbun, öbun hoûat ua; ûsâkâûö but mönya öbun hia thithö tavat öbun e mâdrâ hulö.

²⁸ Adre me he ka tenge eling, me ûgiö ganyudra, wale öbun ka he ka ö Aberahama, me Isaaka, me Jekob, me ta je perofeta hia thithö hnyi dokhu dokhon Khong, ke adre me he bi ka obʼ öbun.

²⁹ Ke adre me he ka o ûhedra jimeyö me jimeû, ke ûhedra hnyi hwadro me hwaiöu, he ka laba hnyi dokhu dokhon Khong.

³⁰ Ke wâ bi, e hu tavat a bilidra, ame he ka bödra, ke hu tavat a hodra, ame he ka bilidra but.

³¹ Ke ame he but keihen ta je Faresaio hnyi awa eling, me ha kâu, ka habe, He thö, ke hna but dok ang, anyin a Heroda ame behe ka hlingö u.

³² Ke e ame ha ködrin, ka habe, He thʼ öbun ka ha ka alope e, ka habe, Wâ bi, inya oge me obâ ta je demoni, me omelö ta je mok hnyi bong ang me nyi, ke hnyi bong we oge me he ka oumo.

³³ Ke so bi, hamök he ka he hnyi bong ang, me nyi, me hnyi bong we: anyin ae ca khana bi ke perofeta ka mok hnyi hoton Jerusalema.

³⁴ Jerusalema, Jerusalema lö, at ame hlingâ ta je perofeta, me lû ödrin adre kunʼ ödrin kâu! e se hia wek he ka ûkhacaköuâ lakom, helâ me hinyen denakhoto ame tube lakon ge li labenyin, mʼ öbun höcö bi öbun!

³⁵ Wâ bi, adre hia but hna degecâ umöbun uma: ke inya oge me ha köbun, Öbun e ca he hmetu ka ō nya, ke ne o but öbun e he ka ha, ka habe, Hnen hnahic at ame o but hnyi ien Than.