Luka 10 - Iaai Bible 1901 (New Caledonia)

¹ HWABAN ta je ûnyi eling, haba Than ame ûca keihen tavat a sevente, me kunʼ ödrin, a ödrin ûcû lo he ka bödra ka hnyi ta je taun, me ta je dok e ame he ka he hnyin.

² E ame ha ködrin, ka habe, E gan hmâ widrany ke wakhalet thibi tavat adre me huliwan: anyin a wale hic ju öbun ka Thaniny widrany, me me he ka kunâ tavat he ka huliwan anyin widrany.

³ He thʼ öbun: wâ bi, inya oge me kunʼ öbun helâ me lakon mamoe hnyi wanben ta je luko.

⁴ Ca hom bi tang mone, me tang, me taben hnyeûca, ke ca italofa bi me ke at eû hnyi gethen.

⁵ Ke haba uma öbun e he ka dit ka hnyin, mē ha thö, ka habe, E so e hnahic ut uma ang.

⁶ Ke a ne e bi ling at ame he ka hnahic, me ame he ka o kâu hnahic ûnyi gabun: ke a ne ba, me ame he ka hmetu köbun.

⁷ Laba ju hnyi uma eling, ke han me ijem ta je ûnyi ödrin e ham: anyin a haba at huliwa me ûcû me hwaban. Ca dit ûnyi hnyi ke uma me dit ka hnyi ke uma.

⁸ Ke haba taun öbun e he ka o ka hnyin, ke at ka kop öbun, me an ju ta je ûnyi adre me ip hnyi hnyimaköbun:

⁹ ke omelö tavat eling ae hu mok gadra, ke ha kodra, ka habe, E hakekeny jut köbun dokhu dokhon Khong.

¹⁰ Ke haba taun öbun e he ka o ka hnyin, ke adre me ca köp öbun, me he thʼ öbun ka hnyi getheniny me ha, ka habe,

¹¹ Haba kânâiny anyibun taun wale ame kece ka hnyi je hnyeûcahmun, me ohmun e kot ut köbun: ke so bi, khanʼ öbun dö ûnyi ang, ae hakekeny jut dokhu dokhon Khong.

¹² Inya oge me ha köbun, a gʼ ame he ka hâhâ ka Sodoma hnyi bong eling hon taun e.

¹³ Ekölö gam Korazin! ekölö gam Bethesaida! anyin adre ne ânyâ hnyi Turo me Sidona ta je huliwa ae man adre ânyâ eang unyibun, adre me ne hia but ietra me laba me ecmano ae gan nân me hnabadröu.

¹⁴ Ke so bi ame he ka hâhâ ka Turo me Sidona hnyi hna owisa, hubun.

¹⁵ Ke haba u Kaperenauma, hawa, adre me he ka ogoranyi u ka hnyi drany? adre me he ka ohnyikânâi u ka hnyi Hedis.

¹⁶ Haba at ama ling öbun e ame ling nya; ke haba at ama hûköti öbun, e ame hûkötiö nya; ke haba at ama hûkötiö nya, e ame hûkötiâ at a kunö nya.

¹⁷ Ke ame o hmetu but tavat a sevente me senyin, me ha, ka habe, Than lö, ame ling ohmun ta je demoni hnen iâm.

¹⁸ E ame ha ködrin, ka habe, Oge me ö Satana ame utut ûheny hnyi drany helâ me hucuce.

¹⁹ Wâ bi, oge hia but ham köbun man he ka uto ta je on me ta je sekopio, me maniny hia thithö iwahnaihmiony: ke ba ke ûnyi ame he ka okongu öbun.

²⁰ Ke ca senyin bi ge hna ling öbun hnen ta je hanu; ke senyin dö ge hna sihnalimen je iöbun ethö hnyi drany.

²¹ Haba hnyi ûen eling e ame senyin hnyi Hanu Kap me ha, ka habe, Inya oge me ole köu Cica, Tuhan drany me hmeledrany, anyin a u je ikhâlâ ta je ûnyi eang ge tavat ae metâ ke tavat wâ bongon, me adre omanenâ ka ta je mendreng: eke, Cica, anyin a wale wem.

²² A ham könya ta je ûnyi hia thithö hnö Cica: ke ba at ame wâhmakhmetoâ Nokon, ke Kamen thibi; ke ba at ame wâhmakhmetoâ Kamen, ke Nokon thibi, me at minya hnen Nokon hna weny he ka omanenâ kâu.

²³ Ke e ame hwio ka laten me ba duöngâ, ka habe. Hnahic hnen ta je ecmak adre me wâ ûnyi öbun e wâ:

²⁴ anyin a inya oge me ha köbun e se hia ta je perofeta me ta je than adre me bewâ ta je ûnyi öbun e wâ, kʼ adre me ca wâ bi; me belöng ta je ûnyi öbun e long, kʼ adre me ca long bi.

²⁵ Ke wâ bi ame todrö ke at ûnö hnanyibu, me cubec e, ka habe, At Ûne lö, ieû hanymök oge me he ka ânyâ e me hu the könya möt ame ca ba balua?

²⁶ Ke o ame ha kâu, ka habe, Ieû hna sihnalimen hnyi hnanyibu? hawa ge hnâm hna aû!

²⁷ Ke e ame thu, ka habe, U me he ka hnyok ka Than a Khongom ge hnyekom ae bekhöt, me hanom ae bekhöt, me tang hwegiâm ae bekhöt, me oûnykûmâm ae bekhöt; ke u me he ka betenge ge at ae hakekeny köu helâ me u bi.

²⁸ Ke e ame ha kâu, ka habe, E wisa hnâm hna thu, mâdrâ thö e, ke u me he ka möt.

²⁹ Ke e ame weny he ka hai wisa e bi, me e ame ha kö Iesu, ka habe, Ie at ae hakekeny könya?

³⁰ Haba Iesu ame thu, ka habe, Ame he ke at Jeriko ai ûheny Jerusalema; me ame ûkhane me tavat venöu, ke adre me uny jut anyin je ûkhaû, me kot e, me hna ju e, a gʼ ame he but ka mok.

³¹ Me ame he hnyi gethen eling ke at bihut: ke e ame wâ e, me e ame saû thö ka he hnyi ke baten gethen.

³² Ke helâe minya ke at Levi, e ame o but kâ e me wâ, me e ame he minya hnyi baten gethen.

³³ Me ame he but minya ke at Samaria, me o kâu: ke e ame wâ e, me e ame betenge gan,

³⁴ me hakekeny kâu, me lan hnân je aat, me hû ge wakaco me waina; ke e ame ip e hon haleny meno, me hom e ka hnyi omtabaga, me ûâ e.

³⁵ Ke haba bong nyi, e ame hom li denari, me ham ka at ae tren uma me ha ka habe, U ma tuö e; ke haba hnâm hna he ka ûcû hanen hon e, oge me he ka bi hwaban köu, iny ka o hmetu thö.

³⁶ Ûnykûme ju, ia gadrin hnyat a kun ame hakekeny ka at eji a ûkhane me tavat venöu?

³⁷ Ke e ame ha, ka habe, Wale at ame betenge gan. Haba Iesu ame ha kâu, ka habe, He thö ka mâdrâ helâe.

³⁸ Ke ödrin e he but, me e ame dit ka hnyi ke taun: ke wale ke momo Maretha ien, ame kap e ka hnyi umen uma.

³⁹ E hu keiny jia Maria, ke e ame laba hnyi hmele li ca Iesu me long hwan hofuc.

⁴⁰ Ke haba Maretha ame hmak hnyekon ge ta je huliwainy uma; me e ame he kâu me ha, ka habe, Than lö, u me ca ûhykûme bi a ga hia but keik hnö nya he ka hake huliwa? ha thö kâu me me he ka hadruo nya.

⁴¹ Ke haba Than ame thu kâu, ka habe, Maretha, Maretha lö, u me kong hnyekom me hmak ge ta je ûnyi ae se hia:

⁴² khaca thibi ûnyi ae ûnyi hnathu: ke haba Maria ame hia but ûca ke keihen ae so, wale a gʼ adre me ca he ka hom hmetu gan.