Luka 1 - Iaai Bible 1901 (New Caledonia)

¹ ANYIN a haba tavat ae se adre me hwân he ka sihnalimen gaga me omanenâ ta je ûnyi ame hwâdâ köta,

² helâ me hnödra hna ham köta, waleji ate me wâ, kʼ otin e bi athnyabainy hofuc ûnyi hnyi can,

³ anyin a wale, oge me ûnykûme bi nya he ka sihnalimen gaga köu taböny than Theofila, anyin oge hia but wâ gaga ke wisa ta je ûnyi ûnyi hnyi can;

⁴ mʼ u me he ka wâ thö hnathuiny ta je hofuc adre me nâ köu.

⁵ Haba hnyi je bong bongu Heroda a than Juda, me wale ke at bihut Zakaria ien, ûnyi hnyi dö anyi Abia: haba ien âiân me Elisabeth, a mâtrâni Arona.

⁶ Ke ödru li at ae wisa hnyi hnyimakan Khong, kʼ ödru me vheno ta je hnanyibu ke ta je hna otilâ hnen Than, ke ba monu gadru.

⁷ Ke ba nökudru anyin ae toûnyi Elisabeth, ke ödre li hingat ut.

⁸ Ke e ame tiga vheno hanymen at bihut hnyi hnyimakan Khong hnyi hna khene hanymen kâu,

⁹ me hamen he ka dit ka hnyi Uma kap umen Than he ka le uto ae bo so, hoton hwakecin at bihut.

¹⁰ Ke hnyi awa adre me le uto ae bo so, ame laba eû tavat hia ae se adre me hic.

¹¹ Ke wale ame manen dut kâu angela anyin Than, ame tot hnyi ke keihen a metân taben le uto ae bo so hnyin.

¹² Ke a wâ but Zakaria, me e ame hmak, ke ame o but kâu ot.

¹³ Ke haingen angela ame ha kâu, ka habe, Zakaria lö, ca ot: anyin adre me löng hijâm hic, me ame he âiâm Elisabeth ka hnokoâ nokom, ke u me he ka hwenyi ien Ioane.

¹⁴ Ke u me he ka senyin me hobâ; kʼ ame he tavat ae se hia ka senyin hnyi hna hnokoâ e.

¹⁵ Anyin a e ame he ka gan hnyi hnyimakan Than, e ame ca he ka ijem waina me grâg; ke e ame he ka unöngöt ge Hanu Kap ûnyi hnyi hnyekon hinyen.

¹⁶ Ke se hia lakon Isaraela e ame he ka ohmeto ka Than a Khongudrin.

¹⁷ Ke e ame he ka bân hnyi hnyimakan hnyi hanu me man mani Elia, he ka ohmeto hnyekon ta je kamen ka lakudra, me tavat adre hwen höcö ka hnyi metâ anyin tavat ae wisa; me me he ka ânyâwia tavat adre penapena hobi kâu Than.

¹⁸ Ke haba Zakaria ame ha ka angela, ka habe, Ame he ka kâmâu ka khanö nya e î anyin oge hingat ut ang, ke someca but ang öiök.

¹⁹ Haba angela ame thu kâu, ka habe, Inya ang Gaberiela at ame tot hnyi hnyimakan Khong; a khunö nya he ka ha köu, me omanenâ köu ûthumetu eang ae so.

²⁰ Ke wâ bi, u me he ka hum, ame ca he ka khanö u fuc ke ne o but hnyi bong adre me he ka ânyâ hnyin ta je ûnyi e, anyin a u je ca kap hok hofuc, wale ame he ka hwâdâ hnyi ûen e.

²¹ Ke haba tavat adre me halubahing Zakaria kʼ adre lâiâ anyin ae bec hnyin uma kap.

²² Ke e ame didrut me ca khana but fuc kodra: me adre me wâ ae hu ûnyi a manen kâu hnyin uma kap: ke e ame labö hmâhmâ kodra ke hum bala bi.

²³ Ke ame um dö je bonginy anyin huliwa, me e ame he but ka hnyi hnyaban.

²⁴ Hwaban ta je bong e, ame erkin dut Elisabeth a âiân; me e ame oiyongâ e bi hnyi faiv ta tehi me ha, ka habe,

²⁵ A mâdrâ helâe könya Than hnyi ta je bong e ame ō nya hnyin, he ka degec anyik hmehma hnyi hnyimakan tavat.

²⁶ Ke haba hnyi tehi a siksiny, haba Khong ame kunâ angela Gaberiela ka hnyi taun hnyi Galilaia Nazareta ien,

²⁷ ka ke hing hlu hanen lap anyi Davita, a ûköcö me ke at Josefa ien; haba ien hlu eling me Maria.

²⁸ Haba angela ame didro kâu me ha, ka habe, E, u at adre betenge gan lö, e but unyâm Than.

²⁹ Ke haba hlu ame hmak ge hofuc eling, me ûnykûme ieû bongon iouny eling.

³⁰ Ke haingen angela ame ha kâu, ka habe, Maria lö, ca ot: anyin a Khong ame betenge gam.

³¹ Ke wâ bi, u me he ka erkin, me hnokoâ da, me u me he ka hwenyi ien Iesu.

³² E ame he ka gan, ke adre me he ka hwenyi ien e Nokon At ae Beönua: ke ame he Than a Khong ka ham kâu theron anyi Davita a kamen:

³³ ke e ame he ka muso lap anyi Jekob nyiele balua; ke ame he ka ba obiny dokhon dokhu.

³⁴ Haba Maria ame ha, ka habe, Ame he ka kâmâu ûnyi e, anyin a iny tiga ca wâ bi baga?

³⁵ Ke haba angela ame thu me ha kâu, ka habe, Ame he ka o köu Hanu Kap, me ame he ka tungi u hnen man maniny Beönua: anyin a wale adre me he ka hwenyi ien at adre me he ka hnokoâ, me kap; a Nokon Khong.

³⁶ Ke wâ bi, haba liamekeiny möu a Elisabeth e erkin dut, ka someca but: ke siksiny ju ang je tehiny, waleji adre me ha me toûnyi.

³⁷ Anyin ae ba hofuc ûnyi ge Khong ame he ka ba maniny.

³⁸ Ke haba Maria ame ha, ka habe, Wâ bi, iny hlu a athnyabainy Than; e so e hwâdâ bi könya hoton hnâm hna ha. Haba angela ame hna but e.

³⁹ Hnyi je bong eling Marie ame tot me he mweimwei ka hnyi ke keihen hnyei ae hu bucen, ka hnyi ke taun hnyi Juda;

⁴⁰ me didro ka hnyi uma umo Zakaria, me iouny me Elisabeth.

⁴¹ Ke a long ut Elisabeth ibifuci Maria, me ame uthmâhmâ mendreng eû hnyi hnyekon; ke unöngöt dö Elisabeth ge Hanu Kap;

⁴² me e ame hwân ka fuc hwege, ka habe, Hnâm hnahic hon omomo, ke e hnahic ut wan hnyekom.

⁴³ Ûnyi ua könya ang, a gʼ ame o but könya hinyen Tuhok?

⁴⁴ Anyin a wâ bi, ame tiga o but ka hnyi li hnyikönyök ibifucâm, me ame uthmâhmâ thö mendreng eû hnyi hnyekuk ge senyin.

⁴⁵ Hnahic hnen momo ame labageju; anyin ame he ka hwâdâ ta je ûnyi hia thithö adre ha kâu ûnyi ge Than.

⁴⁶ Ke haingö Maria, ka habe, Haba hnyekuk ame ogânâ Than,

⁴⁷ Kʼ ame hobâ hanuk ka Khong At a omeli nya.

⁴⁸ Anyin a e ame wâ athnyabainy a hlu, walönya at hnyikânâi: Anyin a wâ bi, hwân walang ang ame he ta je dö hia ka hao nya me iny hnahic.

⁴⁹ Anyin a haba at ae man ame hia but ânyâ könya ta je ûnyi ae gan hmâ; Ke e kap ien.

⁵⁰ E ame omanenâ anyin ibetengiö ka ke dö me ke dö, A hnyat adre me outen e.

⁵¹ E ame omanenâ tang hwege ge hnyamen; Kʼ ame oveseâ but tavat hnyi biganiny hnyekudra.

⁵² E ame hagutâ je than ûnyi hnyi hon anyidra ta je theron, Me ogöranyâ tavat a ödra hnyikânâ.

⁵³ E ame osekunâ tavat a ödra mekihnâ nem ge ta je ûnyi ae so, Kʼ ame kunâ wia tavat tren omjeû ke ba ûnyi.

⁵⁴ E ame hom hadruâ athnyabainy a Isaraela, Kʼ ame ûnykûme ibetengiö,

⁵⁵ (Helâji me hnen hna ha ka lakamöta) Kö Aberahama me je mâtrâniny nyiele balua.

⁵⁶ Ke Maria ame tha laba mē ame ne kun ta tehi, me e ame hmetu but ka hnyi hnyaban.

⁵⁷ Ke a hwâdâ ûen ame he Elisabeth ka hnokoâ; ke e ame hnokoâ da.

⁵⁸ Ke a long ut tavat adre me laba hakekenyâ me lap a je liamekeiny mē a gʼ ame betenge gan Than; me adre me tha senyin mē.

⁵⁹ Ame o but bong a eitiny, me adre me he but ka peritomonâ wanakat; ke ödrin e behwenyi ien e me Zakaria hoton ien kamen.

⁶⁰ Ke haba hinyen ame thu, ka habe, Ca e, he so bi Ioane ien.

⁶¹ Me haingödra adre me ha ka momo, ka habe, E ba liamekeiny möu ae hu ien eling.

⁶² Me adre me bi hat ka kamen, ka habe, iö ia e ame weny he ka wenyö?

⁶³ Ke e ame sumâtâ taben sihnalimen, kʼ ame sihnalimen, ka habe, Ien Ioane. Haba ödra hia adre me lâiâ.

⁶⁴ Me ame ie ok ut hnyimen me bohmen, me e ame fuc me ogânâ Khong.

⁶⁵ Me ame o but ot kodra hia tavat adre me laba igigilo: ke ame lung tot ta je ûnyi eling ka hnyi je dok hia ae hu bucen hnyi hnyei Juda.

⁶⁶ Ke haba tavat hia thithö adre me long, me adre me ip hmâ hnyi je hnyekudra, haingödra, ka habe, Ame he ka ieû ge da eang? Anyin a e but unyin hnyamen Than.

⁶⁷ Ke a unöngöt dö Zakaria a kamen ge Hanu Kap, me e ame perofeta, ka habe,

⁶⁸ E so adre me haisoâ Than Khongu Isaraela; Anyin a e ame senâ me bi hwaban möt hobi kâu lakeiny,

⁶⁹ Kʼ ame otilâ thö faoiny ûhomeli hobi köta Hnyi lap anyi Davita a athnyabainy:

⁷⁰ (Helâji me hnen hna ha a deny anyin je perofeta ae kap hwân hnyi can hmeledrany),

⁷¹ Ame he ka omeli ota ûnyi hnyi je iwahnaihmiony möta, ke ûnyi hnyi hnyamödra hia adre me hûköti ota;

⁷² He ka ânyâ betenge ka lakamöta, Me ûnykûme anyin ûhihinyköu ae kap;

⁷³ Waleji hofuc e ame khemanyin kö Aberahama a kamöta,

⁷⁴ A gʼ adre me he ka omeli ota ûnyi hnyi hnyamen ta je iwahnaihmiony möta, Mʼ ate me he ka bi athnyabainy ke ba ot,

⁷⁵ Hnyi hwakecin ae kap me wisa hnyi hnyimakan hnyi bonguta ta je bong bia thithö.

⁷⁶ Eke, ke haba u, da, me adre me he ka haiö u me perofeta anyi Beönua: Anyin a u me he ka bân hnyi hnyimakan Than he ka ânyâwia deny ta je gethen.

⁷⁷ He ka o wâhmakhmetoâ lakeiny ge ûhomeli Wale he ka thang anyidra ta je hulö,

⁷⁸ Ûnyi hnyi ibetengiö ae menyik anyin Khonguta. Anyin a wale ame he haolany ka senʼ ota,

⁷⁹ He ka omelamâ tavat adre me laba hnyi lit me hmenon mok; He ka su ta je cata ka hnyi gethen ae hnahic.

⁸⁰ Kʼ ame gan dut wanakat, me hwege tot hanon, me e ame laba hnyi je dok ae ba aten ke ne o but hnyi bong hnân omanenâ e ka at Isaraela.