Levitiko 9 - Iaai Bible 1901 (New Caledonia)

¹ KE haba hnyi bong a eitiny, Mose ame hao Arona, me lakon, me wahingatiny at Isaraela;

² ke haingen kö Arona, ka habe, Hom dö ke nak bolok hnân hudiny hulö, me mamoe baga ae ba hnyikongon, hnân hudiny leû, me hudo li meno e hnyi hnyimakö Iehova.

³ Ke u ma he ka ha ka lakon Isaraela, ka habe, Hom dʼ öbun got baga me me hudiny hulö; me nokon kau, me nokon mamoe a khaca hunainy ae ba hnyikongon, me me hudiny leû;

⁴ me bolok, me mamoe baga hnân hudiny ole, he ka hudo hnyi hnyimakö Iehova; me hudiny jeu adre me ûthueniken me wakaco, anyin a haba hnyi bong ang Iehova ame manen köbun.

⁵ Ke odrin e hom ûnyi a ha Mose ka hnyi uma ûkhacaköu: ke haba ûkhacaköu hia adre me hakekeny, me ûtililen hnyi hnyimakö Iehova.

⁶ Ke haingö Mose, ka habe, Walang ûnyi a hûna Iehova köbun he ka ânyâ, kʼ ame he ka manen köbun hmanenangi Iehova.

⁷ Ke haingö Mose kö Arona, ka habe, He thö ka hnyi taben hut, me hudo thö hudiny ânyâm hulö, me ânyâm hut adre le, me bi hwaban ânyâm möt, me melen tavat: ke hudo hut anyin tavat, me bi hwaban anyidra möt, helâ me hna hûna hnö Iehova.

⁸ Me haba Arona ame he ka hnyi taben hut, me hlingâ nokon kau hnân hudiny hulö, wale hobi kâu e bi.

⁹ Ke laku Arona odrin e hom dren kâu: ke e ame hneû banyen hnyi dra, me kina hnyi je baitoiny taben hut, me hingâlâ dra hmelen taben hut:

¹⁰ ke haba pipikhenya, me li wagien, me ûnyi ae lau ûnyi hnyi hon akiny, a hudiny hulö, e ame le hon taben hut; helâ me hna hûna hnö Iehova kö Mose.

¹¹ Ke e ame le utiöiny me unen ge meic hoton hnyaba.

¹² Ke e ame hlingâ hudiny leû, ke haba laku Arona odrin e ham kâu dren, me e ame dukâiâ igigilö hon taben hut.

¹³ Ke odrin e ham kâu hudiny leû, wale je ec keihen, me ban: me e ame le hon taben hut.

¹⁴ Ke e ame hneû tang tiny, me je can, me le hon hudiny leû hon taben hut.

¹⁵ Ke e ame hudo hudiny tavat, me hom got baga a hudiny hulö anyin tavat, me adre me hlingâ, me hudo e hnân hudiny hulö helâ me a bân.

¹⁶ Ke e ame hom hudiny leû, me hudo hoton hnanyibu.

¹⁷ Ke e ame hom hudiny han, me okhaca aoc ge hnyamen, me le hon taben hut, ka ke hut bi hudiny han hnyi hnyomakatu.

¹⁸ Ke e ame hlingâ bolok me mamoe baga hnân hudiny ole hobi kâu tavat: ke laku Arona odrin e ham kâu dren, me e ame dukâiâ e igigilö hon taben hut,

¹⁹ me pipikhenyainy bolok, me mamoe baga, me obiny, me hlanyin tang tiny, me li wagien, me ûnyi ae lau ethö hon akiny:

²⁰ ke odrin e ip pipikhenya hon ûlainy, ke e ame le pipikhenya hon taben hut:

²¹ ke haba ûlainy me jevan a metâ, me Arona ame hajijingâ hnân hudiny hajijing hnyi hnyimakö Iehova, helâ me hna hûna hnö Mose.

²² Ke haba Arona ame hai li hnyamen hon tavat, me hahnahici ödra; me e ame utut ûheny hnyi hna hudo hudiny hulö, me hudiny leû, me je hudiny ole.

²³ Ke Mose me Arona ödru me tha didro ka hnyi uma ûkhacaköu, me dit hmetu but, me hahnahicâ tavat: me ame manen ka tavat hia hmanenangi Iehova.

²⁴ Ke ame he but meic ûheny ûnyi Iehova me le avâ hudiny leû, me pipikhenya hon taben hut; ke a wâ but e ge tavat hia, me adre me hongot, me ta ju hnyikânâi.