Levitiko 8 - Iaai Bible 1901 (New Caledonia)

¹ KE haba Iehova ame ha kö Mose, ka habe,

² Hum Arona thö tha e me lakon, me je ûkhaû, me wakaco hnân hû, me bolok hnân hudiny hulö, me li mamoe baga, me tangen areto adre ca levenâ bi;

³ ke hawâ ûkhacaköuâ thö tavat hia ka hnyi hwanumen uma ûkhacaköu.

⁴ Ke haba Mose ame ânyâ helâ me hna hûna hnö Iehova kâu; ke adre hawâ ûkhacaköuâ tavat ka hnyi hwanumen uma ûkhacaköu.

⁵ Ke haingö Mose ka ûkhacaköu, ka habe, Walang ûnyi a ha Iehova he ka ânyâ.

⁶ Ke haba Mose ame hum Arona me lakon me osûʼ odrin ge köiö.

⁷ Ke e ame okhâûâ e ge ûkhaû, me oweikâ e ge wen hnyekon, me okhâûâ e ge ûkhaû ae beû me iefoda, me oweikâ e ge wen iefoda adre hwâwâ metâ, me hûkâlâ e hnyi fetriny ûnyi gan.

⁸ Ke e ame ovekinyâ e ge tubwiny ûlainy: ke e ame ip hnyi tubwiny ûlainy Urim me Thummim.

⁹ Ke e ame obicâ e ge hnabinybak, me ip hnyi hnyimakan hnabinybak wahano gol, korona ae kap: helâ me hna hûna hnö Iehova kö Mose.

¹⁰ Haba Mose ame hom wakaco hnân hû me hû uma mano me ta je ûnyi hia eû hnyin, me okabâ ta je ûnyi e.

¹¹ Ke e ame oseven dukâiâ hnen e taben hut, me hû taben hut, me je omjehen hia, me taben soû me can e, me me kap ta je ûnyi e.

¹² Ke e ame hingâlâ wakaco hnân hû hon bö Arona, me hû e, me me okabâ.

¹³ Ke Mose ame hom laku Arona, me okhaûʼ odrin ge je ûkhaû, me oweikâ je hnyekudrin, me obicʼ odrin ge je hnabinybak; helâ me hna hûna hnö Iehova kö Mose.

¹⁴ Ke e ame hom bolok hnân hudiny hulö: ke Arona me lakon odrin e ip je hnyamödrin hon ban bolok a hudiny hulö.

¹⁵ Ke e ame hlingâ; ke Mose ame hom dra me kina e hon je baitoiny taben hut igigilö ge banyen, me ânyâ wia taben hut, me hingâlâ dra hmelen taben hut, me okabâ, me me bi hwaban möt.

¹⁶ Ke e ame hom pipikhenya hia hon tang tiny, me ûnyi ae lau ethö hon akiny, me li wagien, me pipikhenyainy, ke Mose ame le je ûnyi e hon taben hut.

¹⁷ Ke haba bolok, me unen, me utiöiny, me ta tetiny, e ame thong ge meic hnyi hoton hnyaba; helâ me Iehova ame hûna kö Mose.

¹⁸ Ke e ame hom mamoe baga a hudiny leû: ke Arona me lakon odrin e ip je hnyamödrin hon ban mamoe baga.

¹⁹ Ke e ame hlingâ: ke Mose ame dukâiâ dren igigilö hon taben hut.

²⁰ Ke e ame susubâ mamoe baga; ke Mose ame le ban, me je ong hanen, me pipikhenya.

²¹ Ke e ame hneû tang tiny ge köiö, me je can; ke Mose ame tha le hia mamoe baga hon taben hut, wale hut adre le hnân bo so, me hut a an hnen meic kö Iehova: helâ me Iehova ame hûna kö Mose.

²² Ke e ame hom ke mamoe baga, wale mamoe baga hnân otilâ: ke Arona me lakon odrin e ip hnyamödrin hon ban mamoe baga.

²³ Ke e ame hlingâ; ke Mose ame hom dren, me kina e hnyi boûlölöven metân hnyikönyö Arona, me hnyi bahnyökvetoiny a metân, me bacan a metân.

²⁴ Ke e ame hom laku Arona, ke Mose ame kina dra hnyi boûlölöven metân je hnyikönyödrin, me je bahnyö-kvetoidrin a metâ, me je bacadrin a metâ:: ke Mose ame dukâiâ dra igigilö hon taben hut.

²⁵ Ke e ame hom pipikhenya, me obiny, me pipikhenya hia hon tang tiny, me ûnyi ae lau ethö hon akiny, me li wagien, me pipikhenyainy, me jevan a metâ:

²⁶ ke e ame hom ûnyi hnyi tang areto adre ca levenâ bi a e hnyi hnyimakö Iehova, khaca ong areto adre bi wakacoiny, me khaca ong areto ae halelöû, me ip hon pipikhenya, me jevan a metâ;

²⁷ kʼ ame ip ta je ûnyi hia e hon hnyamö Arona, me je hnyamen lakon, ke e ame hajijingâ me me hudiny hajijing hnyi hnyimakö Iehova.

²⁸ Ke Mose ame kap je ûnyi e ûnyi hnyi je hnyamödrin me le hon taben hut hon hudiny leû: wale hudiny otilâ a hnân bo so: wale hut a an ge meic kö Iehova.

²⁹ Ke Mose ame hom ûlainy, me hajijingâ me me hudiny hajijing hnyi hnyimakö Iehova: wale ö Mose ûnyi hnyi mamoe baga a hudiny otilâ: helâ me Iehova ame hûna kö Mose.

³⁰ Ke Mose ame hom wakaco hnân hû, me dra a e hon taben hut, me duköiö Arona me anyin je ûkhaû, me lakon, me je ûkhaû anyin lakon; me okabi Arona, me je ûkhaûen, me lakon, me je ûkhaûen lakon unyin.

³¹ Ke haingö Mose kö Arona me lakon, ka habe, Ölâ ju utiö hnyi hwanumen uma ûkhacaköu; ke tha an ju e me areto ûnyi hnyi tang hnân otilâ, helâ me hnok hna hûna, ka habe, Ame he Arona me lakon ka an e.

³² Ke haba kolon utiö me areto, hamöbun he ka thong hnyi meic.

³³ Ke ca he öbun ka he ûhebun hnyi hwanumen uma ûkhacaköu hnyi je bong a seven, ke ne o but ame um do je bonginy hna otilʼ öbun: anyin ame he ka seven je bonginy hna otilʼ öbun.

³⁴ Helâ me hna ânyâ hnyi bong ang, helâe Iehova ame hia but hûna he ka ânyâ, ka bi hwaban anyibun möt.

³⁵ Hamöbun he ka laba hnyi hwanumen uma ûkhacaköu seven ta bong hnyi lany me lit, me tuö hna hûna hnö Iehova wâ öbun nye mokcu: anyin adre hûna helâe könya.

³⁶ Haba Arona me lakon odrin e hnyi ânyâ ta je ûnyi hia hnö Iehova hna hûna a deny Mose.