Levitiko 4 - Iaai Bible 1901 (New Caledonia)

¹ KE haba Iehova ame ha kö Mose, ka habe,

² Ha thö ka lakon Isaraela, ka habe, A ne ke at ame hanyâûâ ke hnanyibu anyi Iehova, ke ca khana, waleji hnyi je ûnyi a hûna Iehova a gʼ adre me ca he ka ânyâ, ke ame ne he ka ânyâ ke ûnyi eling:

³ ame ne he at bihut adre hû ka hanyâûâ, me hom hulö hon tavat; me e ame he ka hudo, can monu e ame ânyâ, ke nak bolok ae ba hnyikongon, kö Iehova, hnân hudiny hulö.

⁴ Ke ame he ka hom bolok ka hnyi hwanumen uma ûkhacaköu hnyi hnyimakö Iehova; kʼ ame he ka ip hnyamen hon ban bolok, me hlingâ bolok hnyi hnyimakö Iehova.

⁵ Kʼ ame he at bihut adre hû ka hom ûnyi hnyi dren bolok, me hom ka hnyi uma ûkhacaköu:

⁶ kʼ ame he at bihut ka hneû banyen hnyi dra, me oseven dukâiâ dren hnyi hnyimakö Iehova, cicö singiny dok ae kap.

⁷ Ke ame he at bihut ka kina dra eling hon je baitoiny taben leû ûnyi ae bo so hnyi hnyimakö Iehova, a e hnyin uma hnân ûkhacaköu: ke e ame he ka hingâlâ hia dren bolok eû hmelen taben leû hut, wale hnyi hwanumen uma ukhacaköu.

⁸ Ke hamen he ka uja ûnyi hnyin e pipikhenyainy bolok hia hnân hudiny hulö: haba pipikhenya at ame lan tang tiny, me pipikhenya hia hnyi tang tiny,

⁹ me li wagien, me pipikhenyainy cicö li jebalainon, me ûnyi ae lau ethö hon akiny, e ame he ka tha hom me li wagien,

¹⁰ helâ me hna hom ûnyi hnyi bolok hnân hudiny ole: kʼ ame he at bihut ka le ta je ûnyi e hon taben leû hut.

¹¹ Ke haba unen bolok, me utiöiny hia, me ban, me je can, me tang tiny, me ta tet,

¹² wale bolok hia thithö e ame he ka hom hoton hnyaba ka hnyi dok ae so, wale adre labö hingölö dröu hnyin, ke adre me he ka le e ge meic: adre me he ka thong hnyi dok adre me labö hingölö dröu hnyin.

¹³ Ke ame ne hanyâûâ tavat Isaraela hia, ke iyong ûnyi eling ka ûkhacaköu, kʼ adre me ne ânyâ ke ûnyi a ha Iehova a gʼ adre me ca he ka ânyâ, mʼ adre me hulö but;

¹⁴ ke e ka manen hulö adre me ânyâ, me hamen ûkhacaköu he ka hudo nak bolok hudiny hulö, me hom e ka hnyi hnyimakan uma ûkhacaköu.

¹⁵ Ke ame he wahingatiny ûkhacaköu ka ip je hnyamödrin hon ban bolok hnyi hnyimakö Iehova: ke adre me he ka hlingâ bolok hnyi hnyimakö Iehova.

¹⁶ Ke ame he at bihut adre hû he ka hom dren bolok ka hnyi uma ûkhacaköu:

¹⁷ kʼ ame he at bihut ka hneû banyen hnyi dra me oseven dukâiâ e hnyi hnyimakö Iehova, cicö singiny.

¹⁸ Ke e ame he ka kina ke ong dra hnyi je baitoiny taben hut hnyi hnyimakö Iehova, hnyi uma ûkhacaköu, ke e ame he ka hingâlâ dra hia hmelen taben leû hut, wale hnyi hwanumen uma ûkhacaköu.

¹⁹ Ke e ame he ka uja ûnyi hnyin e je pipikhenya hia me le hon taben hut.

²⁰ Helâe e ame he ka ânyâ ka bolok; helâ me hnen hna ânyâ ka bolok hnân hudiny hulö, me e ame he ka ânyâ helâe kâ âng: ke ame he at bihut ka bi hwaban anyidra möt, kʼ adre me he ka linʼ ödra.

²¹ Ke e ame he ka hom bolok ka hnyi hoton hnyaba, me le, helâ me hnen hna le bolok a bân: haba ûnyi e, me hudiny hulö hobi kâu ûkhacaköu.

²² A ne he ke than ka ânyâ hulö, ke ca khana, kʼ ame ne mâdrâ ke ûnyi a ha hnö Iehova Khongon a gʼ adre me ca he ka mâdrâ, kʼ ame ne hulö but;

²³ ke adre me ne omanenâ kâu anyin monu, waleji e ame hulö hnyin, me e ame he ka hom hnân anyin hut got baga ae ba hnyikongon:

²⁴ ke e ame he ka ip hnyamen hon ban got me hlingâ e hnyi dok adre me labö hlingâ hut adre le hnyi hnyimakö Iehova: wale hudiny hulö.

²⁵ Ke hamen at bi hut be ka hom ke ong dra dren hudiny hulö, ge banyen, me kina hnyi je baitoiny taben leû hut, kʼ ame he ka hingâlâ dren hmelen taben leû hut.

²⁶ Ke ame he ka le hia pipikhenyainy hon taben hut, helâ me pipikhenyainy hudiny ole; ke ame he at bihut ka bi hwaban anyin möt anyin a e at hulö, kʼ adre me he ka hna but anyin monu.

²⁷ Ke ame ne monu ke at aten hnyei, ke ca khana, kʼ ame ne ânyâ ke ûnyi a ha hnö Iehova a gʼ adre me ca he ka ânyâ, kʼ ame hulö but;

²⁸ ke adre ne omanenâ kâu anyin monu, me e ame he ka hom hnân anyin hut, ke got momo ae ba hnyikongon, can monu e ame anyâ.

²⁹ Ke e ame he ka ip hnyamen hon ban hudiny hulö, me hlingâ hudiny hulö hnyi dok adre le hnyin hudiny leû.

³⁰ Ke ame he at bihut ka hom ge banyen ke ong dra, me kina hon je baitoiny taben leû but, me hingâlâ dren hia hnyi hmelen taben hut.

³¹ Ke e ame he ka hom pipikhenyainy hia, helâ me hna hom pipikhenyainy hudiny ole; kʼ ame he at bihut ka le e hon taben hut me me bo so kö Iehova; ke ame he at bihut ka bi hwaban anyin möt, kʼ adre me he ka thang degecâ anyin hulö.

³² Ke ame ne hom nokon mamoe hnân anyin hut a hudiny hulö, hamen he ka hom momo ae ba hnyikongon.

³³ Ke e ame he ka ip hnyamen hon ban hudiny hulö, me hlingâ e hnyi dok adre me labö hlingâ hnyin hudiny leû.

³⁴ Ke ame he at bi hut ka hom ge banyen ke ong dra dren hudiny hulö, me kina e hon je baitoiny taben leû hut, me hingâlâ dren hia hmelen taben hut:

³⁵ ke e ame he ka hom hia pipikhenyainy, helâ me hna uja pipikhenyainy nokon mamoe hnân hudiny ole; ke hamen at bihut he ka le ta je ûnyi e hon taben hut, helâ me je hut kö Iehova a an hnen meic; ke ame he at bihut ka bi hwaban möt anyin a e at ae monu, kʼ adre me he ka thang degecâ anyin hulö.