Levitiko 27 - Iaai Bible 1901 (New Caledonia)

¹ KE haba Iehova ame ha kö Mose, ka habe,

² Ha thö ka lakon Isaraela, me ba ködra, ka habe, E ka he ke at ka bi khöbi ae ûnyi hnathu, ame he ka hobi kö Iehova je hnyat hoton ûnyi ae ûcû köu.

³ Ke haba hnâm hna tuluto kâu, wale hobi kâu baga hwân hnyi twente ta je hunainy ke ne o but hnyi sikste, me fifte sekel sileva hoton sekeliny dok ae kap, wale ûnyi ae ûcû köu.

⁴ Ke ame ne momo, me thöte je sekel ûnyi ae ûcû köu.

⁵ Ke ame ne hwân hnyi thabûng hunainy ke ne o but hnyi twente hunainy, me twente sekel sileva hobi kâu baga, ke ten sekel hobi kâu momo, wale ae ûcû köu.

⁶ Ke ame ne hwân hnyi khaca tehi ke ne o but thabûng ta hunainy, me thabûng ta sekel sileva hobi kâu baga, ke kun ta sekel sileva hobi kâu hlu, wale ae ûcû köu.

⁷ Ke ame ne hwnâ hnyi sikste je hunainy, me gan hon e, ame ne baga, me fiftin je sekel, ke ame ne momo, me ten je sekel, wale ae ûcû köu.

⁸ Ke ame ne ba anyin ûnyi ae ûcû köu, me adre me he ka hom e ka hnyi hnyimakan at bihut, ke ame he at bihut ka ha ûnyi ae ûcû kâu, kʼ ame he at bihut he ka tuluto e hoton hna khana hnen at bi khöbi.

⁹ Ke ame ne meno adre me hudo kö Iehova, me e kap ûnyi eling hia adre ham kö Iehova.

¹⁰ Ke e ame ca he ka wia e, me bi hnen, wale ûnyi ae so hnen ûnyi ae kong, ame ne ûnyi ae kong hnen ûnyi ae so: ke so bi adre me ne bi hnen e, a ke meno hnen ke meno, awe, ödru me he ka tha kap.

¹¹ Ke ame ne ke meno ae bo kong, ke ca hnân hudo kö Iehova, me e ame he ka ip meno hnyi hnyimakan at bihut:

¹² ke hamen at bihut he ka ha ûnyi ae ûcû, ame ne so ame ne kong: helâ mou a at bihut ame tuluto, me ame he ka helâe.

¹³ Ke ame ne he ka ûco hmetu e, me hamen he ka bi hanen ke keihen a thabûnginy ka hnyi ûnyi ae ûcû köu.

¹⁴ Ke ame ne he ke at ka okabâ umen uma, me me kap kö Iehova, me hamen at bihut he ka ha ûnyi ae ûcû, ame ne so, ame ne kong: haba hna ha hnen at bihut ûnyi ae ûcû kâu, me ame he ka helâe.

¹⁵ Ke ame ne he at a okabâ uma ka ûco hmetu e, me hamen he ka bi hanen ke keihen a thabûngin ta mone ae ûcû köu ka hnyin me me anyin dut.

¹⁶ Ke ame ne he ke at ka okabâ kö Iehova ke keihen iny hnyei, me u me he ka tuluto e hoton hatungen: haba hwaban khaca homer bali adre ta, me fifte je sekel sileva.

¹⁷ Ke ame ne he ka okabâ iny hnyei hwân hnyi huna jubeli, me ame he ka helâ me hnâm hna tuluto.

¹⁸ Ke ame ne he ka okabâ iny hnyei hwaban jubeli, me hamen at bihut he ka aû kâu je mone hoton je kolon je huna ke ne o but ka hnyi huna jubeli, ke u me he ka hom ûhnyû-kongoâ hnâm hna tuluto.

¹⁹ Ke ame ne he at ame okabâ iny hnyei ka ûco hmetu e, me hamen he ka bi hanen ke keihen a thabûnginy ka hnyin a mone ae ûcû köu, me me anyin dut.

²⁰ Ke ame ne ca he ka ûco hmetu hnyei, ke ame ne hia but ûco ka ke at, me adre me ca he ka ûco hmetu e:

²¹ ke ödra ka hna hnyei hnyi jubeli, me ame he ka kap kö Iehova, helâ me hnyei adre nyibo; kʼ ame he ka iny at bihut.

²² Ke ame ne he ke at ka okabâ kö Iehova ke hnyei e ame ûco, ke ca hanen iny hnyei;

²³ me hamen at bihut he ka aû kâu hwaban ae ûcû köu ke ne o but ka hnyi huna jubeli: ke hnyi bong eling e ame he ka ham ûnyi ae ûcû köu, a wale ûnyi ae kap kö Iehova.

²⁴ Haba hnyi huna jubeli ame he ka iny hmetu hnyei wale iny at adre ûco gan, at a ka gan ehac.

²⁵ Ke haba hnâm je hna ha hwaban hia, me, ame he ka hnu hoton sekeliny dok ae kap: haba sekel, me twente je gera.

²⁶ Ke haba lakon omeno a bân, wale nokon a bân adre ip hobi kö Iehova, me ca he ke at ka okabâ; ame ne bolok, ame ne mamoe, anyi Iehova bi e.

²⁷ Ke ame ne meno ae bo kong, me e ame he ka bi hnen ûnyi ae ûcû köu, me bi hanen ke keihen a thabûnginy ka hnyin: ke adre me ne ca ûco hmetu, me adre me he ka ûco e hoton ûnyi ae ûcû köu.

²⁸ Ke so bi, haba ûnyi adre nyibo, a nyibo hnen ke at kö Iehova ûnyi hnyi anyin ta je ûnyi, ame ne at, ame ne meno, ame ne hnyei, me adre me ca he ka ûco hmetu me bi hnen: e ti kap kö Iehova je ûnyi hia adre nyibo.

²⁹ E ba ûnyi adre nyibo, a labö nyibo hnen at, adre me he ka ûco hmetu; kʼ adre me he ka hlingâ e.

³⁰ Ke haba ke keihen a libenyitainy troban kânâ, ame ne hatonginy, ame ne wan ûö, me, anyi Iehova e: e kap e kö Iehova.

³¹ Ke ame ne he ke at ka ûco hmetu ûnyi hnyi ke keihen a libenyitainy, me hamen he ka bi hanen ke keihen a libenyitainy ka hnyin.

³² Ke haba ke keihen a libenyitainy omeno, ame ne bolok, ame ne mamoe, a ta je ûnyi hia adre me dit hmelen uci, me e kap kö Iehova ke keihen a libenyitainy.

³³ E ame ca he ka elâm, ame ne so, ame ne kong, kʼ ame ca he ka bi hnen e: ke so bi, ame ne he ka bi hnen e, awe, ame he ka tha kap ûnyi e me ûnyi a bi hnen e; kʼ adre me ca he ka ûco hmetu.

³⁴ Wale ta je hnanyibu a hûna Iehova kö Mose hobi kâu lakon Isaraela hnyi bucen Sinai.