Levitiko 26 - Iaai Bible 1901 (New Caledonia)

¹ CA he öbun ka bi idola, ke ca he ka otilâ hobi köbun ke hnatheat, ame ne veto ame tot, kʼ öbun e ca he ka ip hnyi ibun hnyei ke veto adre kave he ka nom kâu; anyin a inya Iehova Khongubun.

² Öbun e he ka tuö anyik je sabath me okabâ dok a kapik: Inya Iehova.

³ Öbun ka he ka vheno hnok je hna otilâ, me tuö anyik je hnanyibu, me ânyâ;

⁴ awe, oge me he bi nya ka ham köbun we hnyi ûen e, kʼ ame he kânâ ka okûâ jeûiny, ke ame he je ûöiny ka wa.

⁵ Öbun e he ka uja hwit ke ne o but ûen he ka ip je wan vine, me ip wan anyibun vine ke ne o but ûen cekön: ke öbun e he ka han sekon me laba hnahic hnyi ibun hnyei.

⁶ Ke oge me he ka ham ûsoköu köbun hnyi hnyei, ke öbun e he ka mokut, ke ba at ame he ka oti öbun: ke oge me he ka, ohia je menoiny hnyot ae kong hnyi hnyei, kʼ ame ca he hele vat ka vheno ibun hnyei.

⁷ Ke öbun e he ka hnu je iwahnaihmiony möbun, kʼ adre me he ka ta hnyi hnyimaköbun ge hele vat.

⁸ Kʼ ame he thabûng gabun ka hnu khaca haded, kʼ ame he haded gabun ka hnu ten thauzan: kʼ ame he ka ta hnyi hnyimaköbun ta je iwahnaihmiony möbun ge hele vat.

⁹ Ke oge me he ka ogânʼ öbun me osiâ me osehiʼ öbun; me ohmâ anyik ûbihinyköu möbun.

¹⁰ Ke öbun e he ka han ûnyi ehac, me hom ûnyi ehac me me bi hnen ûnyi ae teb unyi.

¹¹ Ke oge me he ka ip umök uma mano hnyi wanböbun, ke oge me ca he ka hûköti öbun.

¹² Ke oge me he ka ngenu hnyi wanböbun, ko oge me he ka Khongubun, ke öbun e he ka lakeik.

¹³ Inya Iehova Khongubun, at ame hum öbun ûnyi hnyi hnyei Aigupito, möbun e ca he ka bi athnyaba ködra; ke oge thu hnödra hna hûkölʼ öbun, me wiʼ öbun he ka tot wia.

¹⁴ Ke öbun e ne ca ne ka ling nya, me ânyâ je hnanyibu hia eling;

¹⁵ ke öbun e ne be ka degec hnok je hna hûna, me hûkötiâ hnok je hna owisa, me me ca ânyâ hia anyik je hnanyibu, me hanyâûâ anyik ûbihinyköu möbun;

¹⁶ me oge me he bi nya ka ânyâ köbun eang; oge me he ka kunâ köbun ot, me delâ, me kahwa unyin, me me dit je emaköbun, me aû but unyibun; kʼ ame he ka ûnyi baû hnöbun hna cekön, anyin ame he ka han e hnen je iwahnaihmiony möbun.

¹⁷ Ke oge me he ka wâ hmʼ öbun, kʼ adre me he ka hlingʼ öbun hnyi hnyimakan je iwahnaihmiony möbun: kʼ ame he ka musi öbun tavat adre me hûköti öbun; kʼ öbun e he ka kec ke ba at ame hnu öbun.

¹⁸ Ke öbun e ne ca he bala ka ling nya can ta je ûnyi eling, me oge me be bi nya ka oseven kuc öbun can anyibun je hulö.

¹⁹ Ke oge me he ka thu biganiny manibun man, ke oge me he ka wia anyibun drany me me helâ, me fao, me könöbun kânâ me me helâ me bras:

²⁰ ke ame he ka ba troban hwegiö-bun; anyin ame ca he kânâ ka okûâ jeûiny, kʼ ame ca he ka wa ta je ûöiny hnyei.

²¹ Ke öbun e ne he ka hna degeci nya, me höcö ling nya, me oge me he ka oseven oâ köbun je mok hoton anyibun je hulö.

²² Ke oge me he ka kunâ köbun je menoiny hnyot he ka hûgûnâ lakubun, me ohia halebun je meno, me owakhaleti öbun; kʼ ame he ka ba at eû hnyi debun je gethen.

²³ Ke öbun e ne ca wisa könya ge ta je ûnyi eling, kʼ öbun e he ka digic nya bi;

²⁴ me oge me he bi nya ka digic öbun; ke oge me he ka oseven kuc öbun can anyibun je hulö.

²⁵ Ke oge me he ka oâ hele vat köbun at ame bi hwaban hna okongoâ ʼûbihinyköu: ke öbun e ne he ka ûkhacaköu hnyi anyibun je taun me oge me he ka kunâ mok ae cap hnyi wanböbun; kʼ adre me he ka hnʼ öbun ka hnyi hnyamen ta je iwahnaihmiony.

²⁶ Hnyi ûen oge me thu uciny anyibun jeû, me ame he ten ta momo ka tha inyâ ö ʼbun hnyi wahnainyâ a khaca, kʼ odrin e he ka ham hmetu ö bun hoton tulut: kʼ öbun e he ka han ke ca sekon bi.

²⁷ Ke öbun e ne ca ling nya can ta je ûnyi hia eling, kʼ öbun e he ka hna degeci nya;

²⁸ me oge me he bi nya ka hna degeci öbun hnyi hmönyin: ke oge me he minya ka oseven kuc öbun can anyibun je hulö.

²⁹ Ke öbun e he ka han lakubun je da, kʼ öbun e he ka ban lakubun je waindusem.

³⁰ Ke oge me he ka ohia anyibun je dok ae görany, me subâ degecâ hnöbun hna theati seûnö, me khûâ degecâ je unyibun a mokcu ka hnyi hon anyibun je idola ae mok; ke oge me he ka hûköti öbun.

³¹ Ke oge me be ka obâ aten anyibun je taun, me ohia je dok a kabibun, ke oge me ca he ka hnulâ bunen anyibun je ûnyi ae bo so.

³² Ke oge me he ka obâ aten ibun hnyei: kʼ ame he je iwahnaihmiony möbun tavat adre me laba hnyin he ka uthmâhmâ gan.

³³ Ke oge me he ka ovesei öbun ka hnyi ta je hnyei, me oc hele vat he ka hnu öbun: ke ame he ka ba kolon ibun hnyei, kʼ ame he ka hnyot je hnyababun.

³⁴ Haba hnyi ûen eling ame he kânâ ka senyinâ je sabathiny hnyi je ûen itremacat hia, ke öbun dut hnyi hnyei iny je iwahnaihmiony möbun; wale ame he kânâ ka menâ me senyinâ je sabathiny.

³⁵ Hnyi ûen itremacat e hia e ame he ka menâ; anyin a e ame ca menâ hnyi anyibun je sabath, walʼ öbun e labâ.

³⁶ Ke haba je kolon gabun, me oge me he ka okûâ ot eû hnyi je hnyekudrin hnyi je hnyei iny je iwahnaihmiony mödrin: kʼ ame he hwan lan ûö ka hnu odrin; kʼ odrin e he ka kec helâ me at ame kec ge hele vat; kʼ odrin e he ka ta ke ba at ame hnu.

³⁷ Ke ame he ke at ka ta hon ke at helâ me tavat kec ge hele vat, ke ba at ame hnu: ke ame he ka ba manibun man he ka tot hnyi hnyimakan je iwahnaihmiony möbun.

³⁸ Ke ame he ka hiʼ öbun unyin aten ke je hnyei, kʼ ame he hnyei iny je iwahnaihmiony möbun ka ön öbun.

³⁹ Ke ame he je kolon gabun ka aû hnyi anyidrin hulö hnyi je hnyei iny je iwahnaihmiony möbun, kʼ odrin e he minya ka aû hnen je hulö anyin lakamödrin a tha e mödrin.

⁴⁰ Ke odrin e he ka ha manenâ hwakecidrin ae kong anyin je lakamödrin hnyi anyidrin monu adre monu könya, ke can minya odrin e hna degeci nya,

⁴¹ me inya oge me digic odrin, me hum odrin ka hnyi hnyei iny je iwahnaihmiony mödrin: ke ame ne he ka he je hnyekudrin adre ca peritomonâ ka hnyikânâ, kʼ odrin e kap hwaban hwakecidrin ae kong;

⁴² awe, oge me he ka ûnykûme hnok hna ûhihinyköu me Jekob; me hnok hna ûhihinyköu me Isaaka; ke oge me he ka ûnykûme hnok hna ûhihinyköu me Aberahama; ke oge me he ka ûnykûme ka hnyei.

⁴³ Ke odrin e he ka he but me hnen bi ju hnyei, kʼ ame he ka senyinâ je sabathiny, kʼ ame itremacat ke tiga hiʼ odrin ke odrin e he ka kap hwaban hwakecidrin ae kong: can, anyin a odrin e degec hnok je hna owisa, me hûkötiâ anyik je hnanyibu.

⁴⁴ Ke so bi eja ke ne a ne helâe, ke ka odrin bi hnyi hnyei iny je iwahnaihmiony mödrin, me oge me ca he ka digic odrin me hûköti odrin, me ti ohiʼ odrin, me thu hnok hna ûhihinyköu mödrin: anyin a inya Iehova Khongudrin:

⁴⁵ ke oge me he ka ûnykûme ködrin, cadrin bi, waleji hnok hna ûhihinyköu me lakamödrin, tavat oge me hom ûnyi hnyi hnyei Aigupito hnyi hnyimakan aten ke je hnyei, mʼ inye he ka Khongudrin: Inya Iehova.

⁴⁶ Wale je hna otilâ, me je hna owisa, me je hnanyibu hnö Iehova hna ham hobi kâu lakon Isaraela hon bucen Sinai a deny Mose.