Levitiko 25 - Iaai Bible 1901 (New Caledonia)

¹ KE Iehova ame ha kö Mose hon bucen Sinai, ka habe,

² Ha thö ka lakon Isaraela, me ha ködra, ka habe, Öbun ka o ka hnyi hnyei oge me he ka ham köbun, me ame he kânâ ka tuö sabath kö Iehova.

³ Siks ta huna u ma he ka belökâ em hnyei, ke siks ta huna u me he ka ânyâwia halem je vine, me ip je wan:

⁴ ke hnyi huna a seveniny ame he ka sabath ae ûnyi hnathu hnân menâ, hobi kâu kânâ, a sabath kö Iehova: me u me ca he ka belökâ em hnyei, me ânyâwia halem je vine.

⁵ Haba ûnyi ame kû hwege hnyi ûen menu a u, me u me ca he ka meno, me ca ip wan halem je vine adre ca ânyâwia: waleling me me hunainy menâ ae ûnyi hnathu hobi kâu kânâ.

⁶ Ke haba jeûiny sabathiny kânâ, ame he ka hnân ö ʼbun; hnân hobi köu, me athnyabaem baga, me momo, me athnyabaem adre hawâ, me atkanyua at ame tha laba mou;

⁷ me hobi kâu halem je bolok, me je menoiny em hnyei, ame he ka hnân han je jeûiny hia.

⁸ Ke u me he ka aû hobi köu seven ta sabath a je huna; wale seven je seven je huna, ke haba kahmen seven je sabath a je huna, me, fâte nain je huna.

⁹ Ke u me he ka tûö trutru ae gan hwan hnyi bong a libenyitainy tehi a seveniny: öbun e he ka tûö trutru hnyi ibun hnyei hnyi bong hnân bi hwaban möt.

¹⁰ Ke öbun e he ka okabâ huna a fifteiny, me haimemenâ he ka thang aten hnyei a tavat adre me labâ e: ame he ka jubeli hobi köbun; ke öbun e he ka ve hmetu ka hnyi je ibun, me ve hmetu ka anyibun je lap.

¹¹ Ame he ka jubeli hobi köbun huna eling a fifteiny: öbun e ca he ka belök, me meno ûnyi ame kû hwege hnyin, me ip wan halem je vine adre ca ânyâwia.

¹² Anyin a wale jubeli; ame he ka kap köbun: öbun e he ka han jeûiny unyi hnyi hnyei.

¹³ Hnyi huna jubeli eling öbun e he ka ve hmetu ka hnyi je ibun.

¹⁴ Ke u je ne ûûcûköu me at ame laba hakekenyi u, me ca he öbun ka ûkongunyköu:

¹⁵ u me he ka ûco me at ame laba hakekenyi u hoton numerainy je huna hwaban jubeli, ke e ame he ka ûco mou hoton numerainy je hunainy belök.

¹⁶ U me he ka osehia hwaban hoton ûsehiainy je huna, ke u me he ka oûhnyûkongo hwaban hoton ûwakhaletiny je huna; anyin a e ame he ka ûco mou hoton numerainy je ûen wa.

¹⁷ Ca he öbun ka ûkongunyköu; ke so bi u me he ka outen Khongom: anyin a inya Iehova Khongubun.

¹⁸ Anyin a wale hamöbun he ka ânyâ anyik je hnanyibu, me tuö hnok je hna owisa me ânyâ: mʼ öbun e he ka laba hnahic hnyi hnyei.

¹⁹ Ke ame he kânâ ka ham jeûiny, ke öbun e he ka han me sekon, me laba hnahic hnyin.

²⁰ Ke öbun e ne he ka ha, ka habe; Ötin e he ka han ieû hnyi huna a seveniny? wâ bi ötin e ca he ka belök, me ip jeû:

²¹ hawe, oge me he ka hûna anyik hnahic köbun hnyi huna a seveniny, ke e ame he ka okûâ jeû hobi kâu je huna a kun.

²² Ke öbun e he ka belök hnyi huna a eitiny, me ban jeû ehac; ke ne o but huna a naininy, ke ne o but ame o thö jeûiny, öbun e he ha han jeû ûnyi ehac.

²³ Ke adre me ca he ka ûco degecâ kânâ me me hia balua; anyin a ik kânâ: anyin a öbun je atkanyua, me tavat adre me laba ka bi athnyisi unyik.

²⁴ Ke hnyi hnyei hia öbun e labâ me öbun e he ka hna kânâ, mʼ adre me he ka ûco hmeto.

²⁵ A ne ba but ta ûnyi anyin liamekeiny mou, me ame ûco ke keihen iny, me hamen ke hing liamekeiny mē he ka o but me ûco hmetu unyi a ûco hnen liamekeiny mē.

²⁶ Ke ame ne ba at he ka ûco hmetu, ke e ame hwân ka tren ta ûnyi hmetu me khana he ka ûco hmetu;

²⁷ awe, e ame he ka aû je hunainy hna ûco e, me ham kolon ka at e ame ûco mē; ke e ame he ka he hmetu ka hnyi gan.

²⁸ Ke ame ne ca khana he ka hom hmetu e hobi kâu e bi, awe, ame he ka hnen bi ju ûnyi adre ûco unyin at ame ûco ke ne o but hnyi huna jubeli: ke adre me he ka hna e hnyi jubeli, ke e ame he ka hmetu ka hnyi gan.

²⁹ Ke ame ne he ke at ka ûco uma hnyi taun adre op haginy, me e khana he ka ûco hmetu e hnyi obiny huna e ame ûco hnyin: wale ûen ae ûcû he ka ûco hmetu hnyin.

³⁰ Ke adre me ne ca ûco hmetu e, e ka tiga ca bekhöt huna, awe, adre me he ka ohmâ balua bi uma eling, hnyi taun adre op haginy, ka at ame ûco e, hnyi anyin je dö: adre me ca he ka hna e hnyi jubeli.

³¹ Ke haba je uma hnyi je hnyaba, adre ca op haginy igigilö, me adre me he ka ûnykûme helâ me je utkânâ hnyi ta hnyei: e khanʼ ödra he ka ûco hmetu, kʼ adre me he ka hna hmetu hnyi jubeli.

³² Ke so bi haba je taun anyin at Levi, wale je uma hnyi anyidrin je taun, me e khana at Levi ka ûco hmetu hnyi je ûen bala.

³³ Ke e ka he ke at Levi ka ûco hmetu, me adre me he ka hna uma adre ûco me hnyabainy hnyi jubeli: anyin a haba je uma hnyi je hnyaban at Levi, me wale je idrin unyin lakon Isaraela.

³⁴ Ke adre me ca he ka ûco je utkânâ igigilö je hnyabadrin; anyin a idrin eling nyiele balua.

³⁵ Ke ame ne ba ta ûnyi anyin liamekeiny mou, ke mat bi hnyamen unyâm; hâmâm he ka hom hadruâ: kʼ ame he ka tha laba mou helâ me atkanyua me aten ke hnyei bi.

³⁶ U me ca he ka kap hwaban me troban ûnyi gan; ke u ma outen Khongom; me me tha laba mou liamekeiny mou.

³⁷ U me ca he ka ham kâu ânyâm mone ge hwaban, me ham kâu âm ge troban.

³⁸ Inya Iehova Khongubun, at ame hum öbun ûnyi hnyi hnyei Aigupito, me me ham köbun hnyei Kanana, me me Khongubun.

³⁹ Ke ame ne ba ta ûnyi anyin liamekeiny mou unyâm, me ûco e bi köu; me u ma ca he ka kunâ ka bi athnyaba köu helâ me at adre ûco:

⁴⁰ ke e ame he ka tha e mou helâ me athnyaba adre hawâ, me at ame bi athnyisi; ke e ame he ka bi athnyabaem ke ne o but hnyi huna jubeli:

⁴¹ me e ame he ka hmetu but ûheny unyâm, e me lakon, me me hmetu ka anyin lap, me hmetu ka hnyi hnyaban lakamen.

⁴² Anyin a lathnyabaik odrin, waleji oge hum odrin ûnyi hnyi hnyei Aigupito: adre me ca he ka ûcû odrin helâ me hna ûco athnyaba.

⁴³ U me ca he ka musi odrin hwege; ke u me he ka outen Khongom.

⁴⁴ U ma he ka hom lathnyabaem obaga me omomo ûnyi ge aten ke je hnyei igigili öbun, öbun e he ka ûcû odrin me me lathnyaba obaga me omomo.

⁴⁵ Ke habe khaca, öbun e he ka ûco ûnyi ge lakon je atkanyua adre me tha laba möbun, me anyidrin je lap unyibun, waleji adre hia but hnokoâ hnyi ibun hnyei: kʼ odrin e he ka anyibun.

⁴⁶ Ke öbun e he ka hnʼ odrin hna hwajekhon lakubun hwaböbun, me me anyidra: öbun e he ka hom je lathnyaba ûnyi gadra nyiele balua; ke haba je liamekeiny möbun a lakon Isaraela, ca he ka musö hwegiâ ke at hnen ke at.

⁴⁷ Ke ame ne tren omjeû aten ke hnyei bi, ame ne at bi athnyisi unyâm, ke ba ta ûnyi anyin liamekeiny mou unyin, kʼ ame ûco e bi ka aten ke hnyei, ame ne at bi athnyisi unyâm, ame ne hanen ke lap anyin aten ke hnyei bi:

⁴⁸ awe, e khanʼ ödra he ka ûco hmetu at eling hwaban hna ûco; e khana ke liamekeiny mē he ka ûco hmetu e:

⁴⁹ e khana he ka ûco e hmetu hnen ke kamen, ame ne nokon ke kamen, ame ne ke at bi a hanen anyin lap: ke ame ne tren hmetu ta ûnyi me e khana he ka ûco e bi hmetu.

⁵⁰ Ke e ame he ka aû ka at ame ûco e, hwân hnyi huna hna ûco e hnyin ke ne o but hnyi huna jubeli: ke haba mone a hwaban me ame he ka ûcû me numerainy je huna; e ame he ka tha laba me helâ me ûen athnyaba adre hawâ.

⁵¹ Ame ne tiga se hia je huna, me e ame he ka ham hmetu hwaban hnân ûco e hmetu, hoton je huna, ûnyi hnyi mone adre bi hwaban kâu.

⁵² Ke ame ne wakhalet bi ju je huna ke ne o but huna jubeli, me e ame he ka aû wia mē, me e ame he ka ham hmetu hwaban hna ûco e, hoton je huna.

⁵³ E ame he ka tha e me helâ me athnyaba adre hawâ hnyi ke huna me ke huna: e ame ca he ka musö hwegiâ e hnyi hnyimâkâm.

⁵⁴ Ke adre me ne ca ûco e hmetu hnyi je deny eling, me e ame he ka he but hnyi huna jubeli, e me lakon.

⁵⁵ Anyin a je lathnyabaik lakon Isaraela; lathnyabaik ödra, waleji oge hom ûnyi hnyi hnyei Aigupito: Inya Iehova Khongubun.