Levitiko 24 - Iaai Bible 1901 (New Caledonia)

¹ KE Iehova ame ha kö Mose, ka habe,

² Kunâ thö lakon Isaraela he ka hom köu wakaco elaio ae alai adre kokot hnân umumelam, me me möt bala je lamepa.

³ Hamö Arona he ka tuö e bala hwân sahac ke ne o but hnyomakatu, baten singiny ûnyi hnân ohnatho, hnyi uma hnân ûkhacaköu hnyi hnyimakö Iehova: wale hnanyibu nyiele balua hnyi anyibun ta je dö.

⁴ E ame he bala ka tuö je lamepa hon taben lamepa gol ae so hnyi hnyimakö Iehova.

⁵ Ke u me he ka hok salawa ae so me le je areto a twelv: ame he ka ûsa lo omer areto a khaca.

⁶ Ke u me he ka ip gaga je ûnyi e hon laulau gol ae so hnyi hnyimakö Iehova hnyi lo li gaö, usa siks hnyi li gaö.

⁷ Ke u me he ka ip bon li gaö libanu ae so, me me e bi hon je areto hnân oûnykûmeâ, hnân hut a an ge meic kö Iehova.

⁸ E ame he ka ip gaga bala ûnyi e hnyi je sabath hnyi hnyimakö Iehova; haba e me ûnyi ge lakon Isaraela, a uhihi-nyköu nyiele balua.

⁹ Haba e me ö Arona me lakon; ke odrin e he ka han e hnyi dok ae kap: anyin a ti kap e hobi kân, ûnyi hnyi je hut a an ge meic kö Iehova hoton hnanyibu nyiele balua.

¹⁰ Haba ke baga nokon momo Isaraela, ke at Aigupito kamen, ame he hnyi wanben lakon Isaraela: kʼ ame iwatretra hnyi je hnyaba nokon momo Isaraela, me ke at Isaraela;

¹¹ ke haba nokon momo Isaraela ame haikongoâ ien Khong, me ûhangö: me adre me hom e kö Mose. Haba ien hinyen, me, Selomith, noku Deberi, ûnyi hnyi tribu Dana.

¹² Ke adre me ca at eling, me me he ka manen ködra we Iehova.

¹³ Ke Iehova ame ha kö Mose, ka habe,

¹⁴ Hom but at waleji a ûhangö hoton hnyaba ai; ke hamödrin hnyat odrin e löng he ka ip je hnyamödrin bon ban, kʼ ame he ûkhacaköu hia ka lûâ e ge veto.

¹⁵ Ke u me he ka ba ka lakon Isaraela, me ha, ka habe, haba at ame hangâ Khongon, me ame he ka takoû e ge anyin hulö.

¹⁶ Ke haba at ame hakongoâ iö Iehova, me adre me he ka hlingâ; kʼ ame he ûkhacaköu hia ka lûâ e ge veto; ame ne atkanyua, ame ne aten hnyei, e ka haikongoâ iö Iehova, me adre me he ka hlingâ.

¹⁷ Ke haba at ame kot ke at me me mok, me adre me he ka hlingâ e;

¹⁸ ke haba at ame kot meno me me mok, me e ame he ka bi hnen: ke möt hwaban ke möt.

¹⁹ Ke ame ne he ke at ka okongoâ unyin ke at, me adre me he ka ânyâ kâu helâ me hnen hna ânyâ;

²⁰ aat hwaban aat, ecmak hwaban ecmak, nyu hwaban nyu; adre me he ka ânyâ ka at helâ me hnen hna okongoâ unyin ke at.

²¹ Ke haba at ame hlingâ meno, me e ame he ka bi hwaban e: ke haba at ame hlingâ at, me adre me he ka hlingâ e bi.

²² Ame he ka hu khaca thibi hnanyibu hobi kâu atkanyua me aten hnyei: anyin a inya Iehova Khongubun.

²³ Ke haba Mose ame ha ka lakon Isaraela, mʼ adre me he ka hom hoton hnyaba ai at ûhangö me lûâ e ge veto. Ke haba lakon Isaraela adre me ânyâ hoton hna huna hnö Iehova kö Mose.