Levitiko 23 - Iaai Bible 1901 (New Caledonia)

¹ HABA Iehova ame ha ko Mose, ka habe,

² Ha thö ka lakon Isaraela me ha ködra, ka habe, Haba je ûen a thu bongon hnö Iehova, wale öbun e he ka haimemenâ me me je ûkhacaköu ae kap, me wale thibi e je ûen oge thu bongon.

³ Siks je bong adre me he ka huliwa, ke haba hnyi bong a seveniny, me wale sabath hnân menâ, me ûkhacaköu ae kap: ca he öbun ka ânyâ ke huliwa: wale sabath anyi Iehova hnyi je hnyababun hia.

⁴ Walang je ûen a thu bongon hnö Iehova, je ûkhacaköu ae kap, wale öbun e he ka omanenâ hnyi je ûen.

⁵ Haba hnyi bong a fortininy tehi a bân, hnyi sahac, me wale paseka anyi Iehova.

⁶ Ke hnyi bong a fiftininy tehi eling, me wale bongon han areto adre ca levenâ kö Iehova: öbun e he ka han areto adre ca levenâ hnyi seven ta bong.

⁷ Hnyi bong a bân öbun e he ka hu ûkhacaköu ae kap: ûbun e ca he ka ânyâ huliwa ae hmak.

⁸ Ke öbun e he ka hudo hut a an ge meic kö Iehova hnyi je bong a seven: ke hnyi bong a seveniny, me ame he ka hu ûkhacaköu ae kap; e ba huliwa ae hmak öbun e be ka ânyâ.

⁹ Ke Iehova ame ha kö Mose, ka habe,

¹⁰ Ha thö ka lakon Isaraela, me ha ködra, ka habe, Öbun ka o ka hnyi hnyei oge me he ka ham köbun, ke öbun ka meno jeûiny, me öbun e he ka hom je thi hwit a bân öbun e meno ka at bihut:

¹¹ ke e ame he ka hajijingâ thi hwit hnyi hnyimakö Iehova, me me kap soi öbun hnyin; haba at bihut ame he ka hajijingâ e bong nyi hwaban sabath.

¹² Ke hnyi bong eling, öbun e hajijingâ thi hwit hnyin, me öbun e he ka hudo mamoe baga a khaca hunainy ae ba hnyikongon hnân hudiny leû kö Iehova.

¹³ Ke haba hudiny han ame he ka lo li omer salawa adre ûthueniken me wakaco hnân hut a an ge meic ae bo so kö Iehova: ke haba hudiny ic, ame be ka tap waina a vakiny hin.

¹⁴ Ke ca he öbun ka han areto, me hwit adre lo, me je ihwit ae but, ke ne o but bong eling, öbun e he ka hom hut ka Khongubun hnyin: wale; hnanyibu nyiele balua, hnyi anyibun ta je dö hnyi je hnyababun.

¹⁵ Ke öbun e be ka aû hobi köbun, hwân bong nyi hwaban sabath, hwân hnyi: bong öbun e hom hnyin thi hwitiny hajijing; ame he ka bekhöt je sabath a seven:

¹⁶ öbun e he ka aû je bong a fifte ke ne o but nyi hwaban sabath a seveniny: ke öbun e he ka hudo hudiny han a teb ûnyi kö Iehova.

¹⁷ Me öbun e he ka hom ûnyi hnyi je hnyababun lo li aretoiny hajijing, ke lo li omer salawa: adre me he ka le ge salawa ae so adre levenâ, wale je wan a bân kö Iehova.

¹⁸ Ke öbun e he ka tha hudo me areto je mamoe a seven ae ba hnyikongon a khaca hunainy, me khaca nak bolok, me lo li mamoe baga, wale hnân hudiny leû kö Iehova, tha e me hudiny han, me hudiny ic, hut a an ge meic, ae bo so kö Iehova.

¹⁹ Ke öbun e he ka hudo ke got baga hnân hudiny hulö, me lo li mamoe baga a khaca hunainy hnân je huding ûsoköu.

²⁰ Ke ame he at bihut ka tha hajijingâ ta je ûnyi e me li areto a bân hnân hudiny hajijing hnyi hnyimakö Iehova, me li mamoe: e kap ta je ûnyi e kö Iehova ke hobi kâu at bihut.

²¹ Ke öbun e he ka haimemenâ hnyi bong eling anyibun ûkhacaköu ae kap: e ba huliwa ae hmak öbun e he ka ânyâ: wale hnanyibu nyiele balua hnyi je hnyababun hia hnyi anyibun ta je dö.

²² Ke öbun ka he ka meno je ibun, me u me ca he ka meno wia hnyi hounyin em, ke u me ca he ka hlo kolon hnâm hna meno: ke u me he ka hna but e hobi kâu at ae ba ta ûnyi me atkanyua: Inya Iehova Khongubun.

²³ Ke Iehova ame ha kö Mose, ka habe,

²⁴ Ha thö ka lakon Isaraela me ha, ka habe, Hnyi tehi a seveniny, hnyi bong a bâniny tehi, ame he ka hu hna menâ hobi köbun, hnân oûnykûmeâ hnen tuö trutru, ûkhacaköu ae kap,

²⁵ E ba huliwa ae hmak öbun e he ka ânyâ: ke öbun e he ka hudo hut a an ge meic kö Iehova.

²⁶ Ke Iehova ame ha kö Mose, ka habe,

²⁷ Haba hnyi bong a libenyitainy tehi eling a seveniny, ame he ka bong hnân bi hwaban möt: ke öbun e he ka hu ûkhacaköu ae kap, kʼ öbun e he ka hom ûhnyûkongoâ je hnyekubun; me hudo hut a an ge meic kö Iehova.

²⁸ Ke ca he öbun ka ânyâ ke huliwa hnyi bong eling; anyin a wale bong hnân bi hwaban möt, mʼ adre me he ka bi hwaban anyibun möt hnyi hnyimakö Iehova Khongubun.

²⁹ Ke haba at ame ca vec hnyekon hnyi bong eling, me adre me he ka subâ degecâ e ûnyi hnyi iny hnyei.

³⁰ Ke haba at ame bi huliwa hnyi bong eling, me oge me he ka ohia hnyi iny hnyei.

³¹ E ba ke huliwa öbun e he ka ânyâ: wale hnanyibu nyiele balua hnyi anyibun ta je dö hnyi je hnyababun.

³² Haba bong e me sabath hnân menâ köbun, kʼ öbun e he ka hom ûhnyûkongoâ je hnyekubun: hnyi bong a naininy tehi, hnyi sahac, hwân hnyi ke sahac ke ne o but hnyi ke sahac öbun e he ka okabâ anyibun sabath.

³³ Haba Iehova ame ha kö Mose, ka habe,

³⁴ Ha thö ka lakon Isaraela, ka habe, hnyi bong a fiftininy tehi eling a seveniny ame he ka bong hnân bi jeûiny je uma hunuma kö Iehova hnyi je bong a seven.

³⁵ Haba hnyi bong a bân ame be ka hu ûkhacaköu ae kap: e ba huliwa ae hmak öbun e he ka ânyâ.

³⁶ Hnyi je bong a seven öbun e he ka hudo je hut a an ge meic kö Iehova: ke hnyi bong a eitiny öbun e he ka hu ûkhacakoû ae kap: ke öbun e he ka hudo hut a an ge meic kö Iehova: wale ûkhacaköu ae ûnyi hnathu; e ba huliwa ae hmak öbun e he ka ânyâ.

³⁷ Wale je ûen anyi Iehova mʼ öbun e he ka haimemenâ a je ûkhacaköu ae kap, he ka hudo hut a an ge meic kö Iehova, hudiny leû, me hudiny han, me hut, me huding ic, a je ûnyi hnyi je ve bong:

³⁸ ke ca ha bi je sabath anyi Iehova, me anyibun je bwihlany, me anyibun je khöbi hia, me anyibun je hut betenge hia, wale öbun e he ka ham kö Iehova.

³⁹ Ke hnyi bong a fiftininy tehi, öbun ka hia but ip je jeûiny hnyei, me öbun e he ka bi jeû kö Iehova hnyi je bong a seven: hnyi bong a bân ame he ka hu hna menâ ae ûnyi hnathu, me hnyi bong a eitiny ame he ka hu hna menâ ae ûnyi hnathu.

⁴⁰ Ke öbun e he ka hom hnyi bong a bân je wan ûö ae so, me je lan pama, me je vheiny ûö ae gan, me je arebeiny wagewe; ke öbun e he ka senyin hnyi hnyimakö Iehova Khongubun hnyi seven ta bong.

⁴¹ Ke öbun e he ka tuö e hnân bi jeû kö Iehova hnyi je bong a seven hnyi huna: wale hnanyibu nyiele balua hnyi anyibun ta je dö: öbun e he ka tuö e hnyi tehi a seveniny.

⁴² Öbun e he ka laba hnyi je uma hunuma hnyi seven ta bong: ame he tavat a hing at Isaraela hia ka laba hnyi je uma hunuma:

⁴³ me me khana hnen anyibun je dö a oge kunâ lakon Isaraela he ka laba hnyi je uma hunuma, hnyi ûen oge me hum ödra ûnyi hnyi hnyei Aigupito: Inya Iehova Khongubun.

⁴⁴ Ke haba Mose ame omanenâ ka lakon Isaraela je ûen a thu hnö Iehova.