Levitiko 20 - Iaai Bible 1901 (New Caledonia)

¹ KE Iehova ame ha kö Mose, ka habe,

² U me he ka ha ka lakon Isaraela, ka habe, Haba at Isaraela, ame ne aten ke hnyei ame laba kanyua unyi Isaraela, ame he ka ham nokon kö Moleka, me adre me he ka hlingâ at eling: hamen tavat a aten hnyei he ka lûâ ge veto.

³ Oge me he ka wâ hmâ at eling me subâ degecâ e ûnyi hnyi iny hnyei; anyin a e ame ham nokon kö Moleka, me ame oikikiâ dok a kabik, me okongoâ iök ae kap.

⁴ Ke ame ne he aten hnyei ka omûko ge at ame ham nokon kö Moleka, kʼ ame ca hlingâ bi;

⁵ me oge me he bi nya ka wâ hmâ at eling me anyin lap me subâ degecâ, me tavat hia odrin e bi ûnyi monu hoton, he ka bi ûnyi monu me Moleka, ûnyi hnyi idrin hnyei.

⁶ Ke haba at ame saû ka je hnyat tren hanu me tavat bibihwakeoin, he ka bi ûnyi monu hotudrin, me oge me he ka wâ hmâ at eling me subâ degecâ ûnyi hnyi iny hnyei.

⁷ Okabi öbun ju, mʼ öbun e kap: anyin a inya Iehova Khongubun.

⁸ Ke öbun e he ka tuö anyik je hnanyibu me ânyâ: Inya Iehova at ame okabi öbun.

⁹ Ke haba at ame hangâ kâmen me hinyen, adre me he ka hlingâ e: e hia but hangâ kamen ame ne hinyen; ame he ka takoû e ge dren bi.

¹⁰ Haba at ame bi ûnyi monu me âiân ke at, me adre me he ka tha hlingâ baga me momo, a li at bi ûnyi monu.

¹¹ Ke haba at ame he ka tha mokut me âiân kamen, e ame hai hnamejin kamen: me adre me he ka tha hlingʼ ödru hia; kʼ ame he ka takû ödru ge drödru.

¹² Ke ame ne he ke at ka tha mokut me âiân nokon baga, me adre me he ka tha hlingʼ ödru hia: ödru me ânyâ ûnyi ae ti kong; ame he ka takû ödru ge drödru.

¹³ Ke ame ne he ke baga ka tha mokut me ke baga helâ me hwakecin tha mokut me momo, ödru me ânyâ ûnyi ae ikiki: adre me he ka tha hlingʼ ödru; kʼ ame he ka takû ödru ge drödru.

¹⁴ Ke ame ne he ke at ka tha hok momo me hinyen, wale hulö: kʼ adre me he ka tha thong degeci ödru ge meic, me me ba hulö unyibun.

¹⁵ Ke ame ne he ke baga ka tha mokut me meno, me adre me he ka hlingâ at e: kʼ öbun e he ka hlingâ minya meno.

¹⁶ Ke ame ne he he momo ka hakekenyâ ke meno, me tha mokut mē, me u me he ka tha hlingâ momo me meno: adre me he ka tha hlingʼ ödru hia: ame he ka takû ödru ge drödru.

¹⁷ Ke ame ne he ke baga ka hok haniny, ame ne nokon kamen, ame ne nokon hinyen, me ödru me ûwâköuâ ûhethuidru; me wale ûnyi ae ikiki; ke adre me he ka tha subâ degeci ödru hnyi hnyimakan aten idru hnyei: e a hia but hai hnamejin haniny; ame he ka takoû e hnen anyin hulö.

¹⁸ Ke a ne he ke baga ka tha mokut me momo ae hu bongon omomo, me hai hnamejin; me e ame hia but ohethuâ pupua gan, kʼ ame hia but hai tubwiny pupainy dra gan bi: me adre me be ka tha subâ degeci ödru ûnyi hnyi idru hnyei.

¹⁹ Ke u me ca he ka hai hnamejin liamekeiny me hinyâm, ame ne haniny kamâm; anyin a u me hai hnamejin hing liamekeiny mou: me ame he ka takû odrin hnen anyidrin hulö.

²⁰ Ke ame ne he ke at ka tha mokut me momo âiân liamekeiny me kamen; me e ame hai hnamejin liamekeiny me kamen bi: me ame he ka takû ödru ge anyidru hulö; ödru me he ka mok ke ba mâtrân.

²¹ Ke ame ne he ke at ka hok momo a âiân liamekeiny mē, wale ûnyi ae ikiki: kʼ ame hai hnameyin liamekeiny mē; ame he ka ba mâtrânidru.

²² Anyin a wale öbun e he ka tuö anyik je hnanyibu, me hnok je hna owisa hia, me ânyâ e: me ca he hnyei ka hmita degeci öbun, wale oge me hum öbun ka hnyin he ka labâ.

²³ Ke ca he öbun ka he hoton hwakecin je hnyei oge me he ka obâ hnyi hnyimaköbun: anyin a ödra adre me ânyâ ta je ûnyi hia eling, anyin a wale oge me ikiki ödra.

²⁴ Ke oge hia but ha köbun, ka habe, Ame he ka bu köbun idrin hnyei, ke oge me he ka ham e köbun he ka labâ, wale hnyei ame di hnyin debai me hani: Inya Iehova Khongubun, at ame ucʼ öbun ûnyi hnyi ta je hnyei.

²⁵ Anyin a wale, öbun e be ka ovebongonâ omeno ae bo so, me omeno ae bo kong, me omeno ame gâ ae bo kong, me bo so: ke ca he öbun ka oikiki öbun bi hnen meno, me meno ame gâ; me ta je unyi adre iyâû hon kânâ, waleji oge ve khenâ unyibun ae bo kong.

²⁶ Mʼ öbun e he ka kap bi könya: anyin a inya Iehova ae kap, kʼ oge hia but ucʼ öbun ûnyi hnyi ta je hnyei hnân hobi könya.

²⁷ Haba baga, ame ne momo, at tren hanu me at ame bibihwakeoin, me adre me he ka hlingâ: adre me he ka luʼ odrin ge veto: ame he ka takû odrin ge drödrin.