Levitiko 18 - Iaai Bible 1901 (New Caledonia)

¹ KE Iehova ame ha kö Mose, ka habe,

² Ha thö ka lakon Isaraela, me ha, ka habe, Inya Iehova Khongubun.

³ Ca he öbun ka ânyâ hoton hwakecin hnyei Aigupito waleji öbun e laba hnyin; ke ca he öbun ka ânyâ hoton hwakecin hnyei Kanana, wale oge me hum öbun ka hnyin: ke ca he öbun ka hnu hoton anyidra je hnanyibu.

⁴ Ke hamöbun he ka ânyâ hnok je hna owisa, me tuö anyik je hnanyibu, me he hnyin: inya Iehova Khongubun.

⁵ Anyin a wale hamöbun he ka tuö anyik je hnanyibu, me hnok je hna owisa: anyin a haba at ame he ka ânyâ e, me ame he ka möt hnyin: Inya Iehova.

⁶ Ca he ke at gabun ka hakekenyâ ke liamekeiny mē, he ka hai hnamejin: Inya Iehova.

⁷ U me ca he ka hai hnamejin kâmâm, ma hnamejin hinyâm: e hinyâm; u me ca he ka hai hnamejin.

⁸ U me ca he ka hai hnamejin âiân kâmâm: anyin a wale hnamejin kâmâm.

⁹ U me ca he ka hai hnamejin mânyâm, nokon kâmâm a hlu, ame nokon hinyâm adre hnokoâ hnyi hnyaba, kʼ adre me ne hnokoâ hnyi ke hnyaba.

¹⁰ U me ca he ka hai hnamejin nokon hlu anyin nokom baga, ame ne nokon hlu anyin nokom momo; anyin a haba bnamejidru a hnamejâm bi.

¹¹ U me ca he ka hai hnamejin nokon âiân kâmâm a hlu, a hnokoâ hnen kâmâm, hânâm e.

¹² U me ca he ka hai hnamejin tehem a haniny kâmâm: haba e me hing liamekeiny me kâmâm.

¹³ U me ca he ka hai hnamejin liamekeiny me hinyâm: anyin a hing liamekeiny me hinyâm.

¹⁴ U me ca he ka hai hnamejin liamekeiny me kâmâm, ke u me ca he ka hakekenyâ âiân: ke hinyâm e.

¹⁵ U me ca he ka hai hnamejin âiân nokom baga; ûngom momo e; u me ca he ka hai hnamejin.

¹⁶ U me ca he ka hai hnamejin âiân liamekeiny mou: wale hnamejin liamekeiny mou.

¹⁷ U me ca he ka hai hnamejin momo me nokon a hlu; ke u me ca he ka hok nokon hlu a nokon nokon baga, ame ne nokon hlu a nokon nokon momo, he ka hai hnamejin: odrin je hing liamekeiny: hulö eling.

¹⁸ Ke u me ca he ka hok momo a liamekeiny me âiâm, he ka ovecâ, me hai hnamejin ke tiga möt at a bân.

¹⁹ Ke u me ca he ka hakekenyâ momo he ka hai hnamejin, hnyi hna hake ip can bo kong a e.

²⁰ Ke u me ca he ka tha mokut me âiân ke at, he ka okongu u unyin.

²¹ Ke u me ca he ka hna lakom he ka he hnyi wanben meic kö Moleka, ke u me ca he ka okongoâ ien Khongom: Inya Iehova.

²² U me ca he ka tha mokut me ke baga, helâ me hwakecin tha mokut me momo: wale thibi ikiki.

²³ Ke u me ca he ka tha mokut me ke meno he ka okongu u mē: kʼ ame ca he momo ka tot hnyi hnyimakan ke meno me me tha mokut mē: wale hulö ae gan.

²⁴ Ca he ka okongu öbun bi hnyi ta je ûnyi eling; anyin a ta je ûnyi hia e ame okongoâ je hnyei wala oge me he ka obâ hnyi hnyimaköbun:

²⁵ kʼ ame kong ut hnyei; anyin a wale oge me he ka bi hwaban hulöiny, kʼ ame he hnyei ka hmita degecâ aten.

²⁶ Anyin a wale hamöbun he ka tuö anyik je hnanyibu, me hnok je hna owisa, ke ca he öbun ka ânyâ ke ûnyi hnyi ta je ûnyi eling ae ikiki, wale aten ibun hnyei, me aten ke je hnyei adre me laba kanyua unyibun:

²⁷ (anyin a wale ta je ûnyi hia ae ikiki eling a ânyâ hnen aten hnyei a bân, me me kong ut hnyei;)

²⁸ me me ca he ka hmita degeci öbun minya hnen hnyei öbun ka he ka okongoâ, helâ me hna hmita degecâ je hnyei a bân.

²⁹ Anyin a haba at ame ânyâ ke ûnyi eling ae ikiki, me adre me he ka subâ degecâ tavat adre me ânyâ e ûnyi hnyi idrin hnyei.

³⁰ Awe, öbun e he ka tuö hnok je hna hûna, me mo ca ânyâ bi ke hwakecin ae ikiki waleji adre ânyâ ke tiga hiʼ öbun, me me ca he ka okongu öbun hnyin: Inya Iehova Khongubun.