Levitiko 17 - Iaai Bible 1901 (New Caledonia)

¹ KE Iehova ame ha kö Mose, ka habe,

² Ha thö kö Arona me lakon, me lakon Isaraela hia, me ha ködra ka habe; Walang ûnyi a hûna Iehova, ka habe,

³ Haba at Isaraela hia ame hlingâ bolok, ame ne nokon mamoe, ame ne got, hnyi hnyaba, kʼ ame ne hlingâ hoton hnyaba,

⁴ kʼ ame ca hom e ka hnyi hwanumen uma ûkhacaköu, he ka hudo e kö Iehova hnyi hnyimakan uma mano anyi Iehova: ame he ka joniny at eling dra; kʼ ame hingâlâ dra; kʼ adre me he ka subâ degecâ at eling ûnyi hnyi iny hnyei:

⁵ waleling me me he ka hom hnen lakon Isaraela haledra je meno hnân hudo, wale adre me labö hlingâ hnyi hnyei, ödra ka he ka hum odrin kö Iehova hnyi hwanumen uma ûkhacaköu, ka at bihut, me hlingʼ odrin hnân hudiny ole kö Iehova.

⁶ Ke hamen at bihut he ka dukâiâ, taben hut anyi Iehova ge dren, hnyi hwanumen uma ûkhacaköu, me le pipikhenyainy hnân bo so kö Iehova.

⁷ Ke adre me ca he hmetu ka hudo anyidra je hut ka je khong waleji adre me bi ûnyi monu mē. Wale hnanyibu nyiele balua ködra hnyi anyidra ta je dö.

⁸ Ke u me he ka ha ködra, ka habe, Haba at Isaraela hia, ame ne aten ke je hnyei ame laba kanyua unyibun, at ame hudo hudiny leû, ame ne ke hut,

⁹ kʼ ame ca he ka hnyi hwanumen uma ûkhacaköu he ka hudo e kö Iehova, me adre me he ka subâ degecâ at eling ûnyi hnyi iny hnyei.

¹⁰ Ke haba at Isaraela hia, ame ne aten ke hnyei ame laba kanyua unyibun, ame he ka han dra; me oge me he ka wâ hmâ at eling ame han dra, me subâ degecâ e ûnyi hnyi iny hnyei.

¹¹ Anyin a e hnyi dra melen unyin: ke oge hia but ham e köbun hon taben hut, me me bi hwaban anyibun möt: anyin a haba dra, me, wale at ame bi hwaban möt, anyin ae hu möt hnyin.

¹² Anyin a wale oge me ha ka lakon Isaraela, ka habe, E ba at unyibun ame he ka han dra, ke ca he ke at e aten ke hnyei ame laba kanyua unyibun he ka han dra.

¹³ Ke haba at Isaraela, ame ne aten ke hnyei ame laba kanyua unyibun, at ame hnu me kât menoiny hnyot, ame ne meno ame gâ, hnân ban; me hamen he ka hingâlâ dren, me konâm ge kânâ.

¹⁴ Anyin a wale melen je ûnyi hia; haba dren me wale möt: ke waleling me oge me ha ka lakon Isaraela, ka habe, Ca he öbun ka han dren omeno hia: anyin a haba dra, me, wale melen ta je ûnyi hia, ke haba at ame he ka an e, adre me he ka subâ degecâ.

¹⁵ Ke haba at ame he ka han meno a mok hwege, ame ne kiâ ge ke meno, a aten hnyei, me atkanyua, me, hamen he ka hneû anyin je ûkhaû, me soû hnyi köiö, me bo kong ke ne o but sahac, me me bo so but.

¹⁶ Ke ame ne ca he ka hneû anyin je ûkhaû, me sûâ unyin, me ame he ka takoû e anyin hulö.