Levitiko 15 - Iaai Bible 1901 (New Caledonia)

¹ KE Iehova ame ha kö Mose me Arona, ka habe,

² Fuc dö ka lakon Isaraela, me ha ködra, ka habe, E ka hingölö dân unyin ke at, e ame he ka bo kong ge hna hingölö unyi gan.

³ Ke walang bongon bo kong a e ge hna hingölö ûnyi gan: ame ne tiga hingölö dân unyin, ke ame ne um dö hingölö dân unyin, wale obokonginy.

⁴ E bo kong ut je hna mokut hia a mokulec hnen at ame hingölö, kʼ ame bo kong je ûnyi hia e ame labâ.

⁵ Ke haba at ame kâlâ hnen hna mokut, hamen he ka hneû anyin je ûkhaû, me soû hnyi köiö, me bo kong ke ne o but sahac.

⁶ Ke haba at ame hnyi labâ ke ûnyi a labâ hnen at ame hingölö, e ame he ka hneû anyin je ûkhaû, me soû hnyi köiö, me bo kong ke ne o but sahac.

⁷ Ke haba at ame he ka kâlâ unyin at ame hingölö, e ame he ka hneû anyin je ûkhaû, me soû hnyi köiö, me bo kong ke ne o but sahac.

⁸ Ke ame ne he at ame hingölö ka hangöjâ at ae bo so, e ame he ka hneû anyin je ûkhaû, me soû hnyi köiö, me bo kong ke ne o but sahac.

⁹ Ke haba je tap hnân tabâ meno, ame tabâ hnen at ame hingölö, ame he ka bo kong.

¹⁰ Ke haba at ame kâlâ ke ûnyi a mokut hmelen at eling, e ame he ka bo kong ke ne o but sahac: ke haba at ame vadren je ûnyi eling, e ame he ka hneû anyin je ûkhaû, me soû hnyi köiö, me bo kong ke ne o but sahac.

¹¹ Ke haba at ame kâlâ hnen at ame hingölö, kʼ ame ca hinyem hnyi köiö, e ame he ka hneû anyin je ûkhaû, me soû hnyi köiö, me bo kong ke ne o but sahac.

¹² Ke haba kaia kânâ ame kâlâ hnen at ame hingölö, adre me he ka thö degecâ: ke haba je kaia uto hia, adre me he ka hneû hnyi köiö.

¹³ Ke ödra ka he ka obosoâ at ame hingölö, ûnyi hnyi hna hingölö ûnyi gan; me hamen he ka aû hobi kâu e bi je bong a seven he ka obosoâ e, me hneû anyin je ûkhaû, me sûâ unyin hnyi köiö ame hingölö, ke ame he ka bo so.

¹⁴ Ke haba hnyi bong a eitiny e ame he ka hom li biny, ame ne li nokon meköta, me hom ka hnyi hwanumen uma ûkhacaköu, hnyi hnyimakö Iehova, me ham ödru ka at bihut:

¹⁵ ke ame he at bihut ka hudi ödru, haba khaca hnân hudiny hulö, ke khaca hnân hudiny leû; kʼ ame he at bihut ka bi hwaban anyin möt hnyi hnyimakö Iehova, can hna hingölö ûnyi gan.

¹⁶ Ke ame ne hingölö sin unyin ke at, e ame he ka tha sûâ hia unyin hnyi köiö, me bo kong ke ne o but sahac.

¹⁷ Ke haba je ûkhaû hia, me je unen meno hia ae hu sin unyin hnyin, adre me he ka hneû hia hnyi köiö, me bo kong ke ne o but sahac.

¹⁸ Ke haba momo ame tha mokut mē hnyi sin, me hamödru he ka soû hia hnyi köiö, me bo kong ke ne o but sahac.

¹⁹ Ke ame ne ke momo ame hingölö, ke dra ame hingölö ûnyi gan, adre me he ka hake ip e hnyi je bong a seven: ke haba at ame kâlâ, ame he ka bo kong ke ne o but sahac.

²⁰ Ke haba je ûnyi hia e ame mokulec, hnyi hna hake ip e, ame he ka bo kong: kʼ ame he ka bo kong minya ta je ûnyi e ame labâ.

²¹ Ke haba at ame he ka kâlâ hnen hna mokut, e ame he ka hneû anyin je ûkhaû, me soû hnyi köiö, me bo kong ke ne o but sahac.

²² Ke haba at ame he ka kâlâ ke ûnyi e ame labâ, e ame he ka hneû anyin je ûkhaû, me soû hnyi köiö me bo kong ke ne o but sahac.

²³ Kʼ ame ne hon hna mokut, ame ne hon ke ûnyi bi e ame labâ, ame ne kâlâ hnen ke at, me e ame be ka bo kong ke ne o but sahac.

²⁴ Ke ame ne ke baga ame tha mokut mē, ke e thö bongon omomo unyin, e ame he ka bo kong hnyi je bong a seven; kʼ ame he ka bo kong je hna mokut hia e ame mokulec.

²⁵ Ke ame ne hingölö dra ge ke momo hnyi je bong ae se, ke tiga ca ûen bongon omomo, kʼ ame ne tiga hingölö hwaban ûen bongon omomo; me ame he ka tha ûcû je bongon bo kong a e me je bongon adre hake ip hnyin: e ame he ka bo kong.

²⁶ Ke haba je hna mokut hia e ame mokulec hnyi je bong hia e ame hingölö, ame he ka tha ûcû me je hna mokut hnyi hna hake ip: ke haba je ûnyi hia e ame labâ, ame he ka bo kong helâ me ûbokonginy hna hake ip.

²⁷ Ke haba at ame he ka kâlâ je ûnyi eling, e ame he ka bo kong, me hneû anyin je ûkhaû, me soû hnyi köiö, me bo kong ke ne o but sahac.

²⁸ Ke ame ne bo so ûnyi hnyi hna hingölö ûnyi gan, e ame he ka aû hobi kau e bi seven ta bong, ke hwaban e, e ame he ka bo so.

²⁹ Ke haba hnyi bong a eitiny e ame he ka hom li biny hobi kâu, ame ne li nokon meköta, me hum ödru ka at bihut hnyi hwanumen uma ûkhacaköu.

³⁰ Ke ame he at bihut ka hudo khaca hnân hudiny hulö, me khaca hnân hudiny leû; ke hamen at bihut ka bi hwaban anyin möt hnyi hnyimakö Iehova can hna hingölö ûnyi gan ae bo Kong.

³¹ Helâe öbu me he ka hake ip lakon Isaraela ûnyi hnyi anyidra bo kong; wâ ödra nye mokcu hnyi bokongidra; ödra ka he ka obokongoâ umök uma mano a e hnyi wanbödra.

³² Wale hnanyibuiny at ame hingölö, me at ame hingölö sin, me ame bo kong hnyin:

³³ me ke at ae hu bongon omomo, me at ame hingölö, baga me momo me at ame tha mokut me momo ae bo kong.