Levitiko 13 - Iaai Bible 1901 (New Caledonia)

¹ KE haba Iehova ame fuc kö Mose me Arona, ka habe,

² Ame ne e hnyi unen unyin at ke dok ae khibi, ame ne dok ae han, ame ne dok ae hadröngöc, kʼ ame ne e hnyi unen unyin me me mok lepera bi, me adre me he ka hom e kö Arona at bihut, kʼ ame ne ke nokon at bihut.

³ Ke hamen at bihut he ka wâ mok hnyi unen unyin: ke ame ne hûen dut je leûnen hnyi mok, ke a ne manen a ga dit mok eû hmelen unen unyin, me wale mok lepera: kʼ ame he at bihut ka wâ, me hai bokongoâ.

⁴ Ke ame ne hau but dok ae hadröngöc hnyi unen unyin, ke ca manen bi eû hmelen unen, ke ca hûen bi je leûnen, me ame he at bihut ka hlöng hwanumen at ae mok hnyi je bong a seven:

⁵ ke hnyi bong a seveniny hamen at bihut he ka wâ: ke wâ bi, a ne e bala bi mok adre me wâ, kʼ ame ca hûhûö bi mok hnyi unyin, me ame he at bihut ka hlöng hwanumen hnyi je bong a seven hmetu:

⁶ ke hnyi bong a seveniny hmetu, hamen at bihut he ka wâ; ke wâ bi, ame ne hlit ut mok, kʼ ame ca hûhûö hmetu mok hnyi unen, me ame he at bihut ka hai bosoâ; a han e; ke e ame he ka hneû anyin je ûkhaû, me me bo so but.

⁷ Ke ame ne hûhûö hwege dok ae han hnyi unen, hwaban hna wâ hnen at bihut, me me obosoâ, me hamen at bihut he ka wâ hmetu:

⁸ ke hamen at bihut he ka wâ, ke wâ bi, ame ne hûhûö dok ae han hnyi unen, me hamen at bihut he ka hai bokongoâ: lepera eling.

⁹ Ame ne takoû ke at hnen mok lepera, me adre me he ka hom e ka at bihut:

¹⁰ ke hamen at bihut he ka wâ, ke wâ bi, a ne hau dok ae khibi hnyi unen, ke hûen dut je leûnen, ke ame ne hu utiö ae hât hnyi dok ae khibi,

¹¹ wale lepera ae kueny hnyi unen unyin, ke hamen at bihut he ka hai bokongoâ: ke adre me ca he ka hlöng hwanumen, anyin ae bo kong ut.

¹² Ke ame ne kû lepera hnyi unen, kʼ ame ne okhötâ hia ge lepera unen at ame takoû ge mok, hwân hnyi ban ke ne o but hnyi li can, wale a wâ hnen at bihut;

¹³ me ame he at bihut ka wâ: ke wâ bi, a ne khot hia but unyin ge lepera, me e ame he ka hai bosoâ at ae mok: ke hau hia but: ke bo so but e.

¹⁴ Ke a ne manen gan utiö ae hât, e ame he ka bo kong.

¹⁵ Kʼ ume he at bihut ka wâ utiöiny ae hât, me hai bokongoâ: ame bo kong utiö ae hât: wale lepera.

¹⁶ Ke a ne wia hmetu utiö ae hât me me hau, me e ame he ka he ka at bihut,

¹⁷ kʼ ame he at bihut ka wâ; ke wâ bi, ame ne wia mok me me hau, me ame he at bihut ka hai bosoâ: e bo so but.

¹⁸ Ke a ne hu ke okuc hnyi unen utioiny, ke e metu but,

¹⁹ ke ame ne hwaban ohuc dok ae khibi, me hau, kʼ ame ne dok ae ha-dröngöc, ke hngihngidra, me adre me he ka omanenâ e ka at bihut;

²⁰ kʼ ame he at bihut ka wâ, ke wâ bi, ame ne manen kâu a ga dit ut hnyi unen, ke hûen dut je leûnen, me ame he at bihut ka hai bokongoâ: wale mok lepera, ame kû ûnyi hnyi ohuc.

²¹ Ke ame ne wâ hnen at bihut, ke wâ bi, e ba leûnen ae hûen hnyin, ke a ca dit hnyi unen, ke hlit ut, me hamen at bihut he ka hlöng hwanumen e hnyi je bong a seven:

²² kʼ ame ne hûhûö hwege hnyi unen, me ame he at bihut ka hai bokongoâ: wale ke mok.

²³ Ke ame ne e bala bi dok ae hadröngöc hnyi hnen, kʼ ame ca hûhûö bi, me wale shala hnen okuc; kʼ ame he at bihut ka hai bosoâ.

²⁴ Ke a ne hu dok a hiâ ge meic hnyi unen utiö, ke e bi hnyi utiö ae hât hnyi hna hia dok ae hadröngöc, ame ne hngihngidra, ame ne hau;

²⁵ me hamen at bi hut he ka wâ: ke wâ bi, ame ne hûen dut je leûnen hnyi dok ae hadröngöc, kʼ ame ne manen eû hmelen unen; me wale lepera ame kû ûnyi hnyi dok ae hiâ: kʼ ame he at bihut ka hai bokongoâ: wale thibi mok lepera.

²⁶ Ke ame ne wâ e hnen at bihut, ke wâ bi, e ba je leûnen ae hûen hnyi dok ae hadröngöc, kʼ ame ca dit hnyi unen, ke hlit thibi; me hamen at bihut he ka hlöng hwanumen hnyi je bong a seven:

²⁷ kʼame he at bihut ka wâ hnyi bong a seveniny; kʼ ame ne hûhûö hwege hnyi unen, me ame he at bihut ka hai bokongoâ: wale thibi mok lepera.

²⁸ Ke ame ne e bala bi dok ae hadröngöc hnyi hnen, kʼ ame ca hûhûö bi hnyi unen, ke hlit thibi; me wale dok ae khibi ûnyi hnyi dok ae hiâ, me ame he at bihut ka hai bosoâ: anyin a wale shalainy hiâ.

²⁹ Ame ne hu ge baga ame ne momo ke mok hnyi ban, ame ne wainy,

³⁰ hamen at bihut ka wâ mok, ke wâ bi, ame ne manen dut dok ae dit hnyi unen, kʼ ame ne hu hnyin je leûnen ae mat me taû, ame he at bihut ka hai bokongoâ: wale ke wathu, a lepera hnyi ban, ame ne wainy.

³¹ Ke ame ne he at bihut ka wâ mok a wathu, ke wâ bi, ame ne ca manen bi dok ae dit hnyin unen, ke ba leûnen ae hlit hnyin, hamen at bihut he ka hlöng hwanumen at amo moko wathu hnyi seven ta bong:

³² ke hnyi bong a seveniny ame he at bihut ka wâ mok, ke wâ bi, ame ne ca hûhûö wathu, ke ba leûnen ae mat hnyin, ke manen bi a ga ca dit wathu hnyin unen,

³³ me adre me he ka giâ, kʼ ame ca he ka giâ wathu, kʼ ame he at bihut ka hlöng hwanumen at ame moko wathu hnyi je bong hmetu a seven:

³⁴ ke haba hnyi bong a seveniny ame he at bihut ka wâ wathu: ke wâ bi, ame ne ca hûhûö wathu hnyi unen, ke manen dut a ga ca dit hnyin unen; me ame he at bihut ka hai bosoâ; kʼ ame he at ka hneû anyin je ûkhaû me me bo so.

³⁵ Ke ame ne hwege hûhûö wathu hnyi unen hwaban hna obosoâ;

³⁶ me ame he at bihut ka wâ: ke wâ bi, ame ne hûhûö but wathu hnyi unen, me ame ca he at bihut ka elâm leûnen ae mat; e bo kong ut.

³⁷ Ke ame ne manen kâu a e bala bi wathu, kʼ ame ne kû hnyin je leunen ae hlit; a metu but wathu, ke bo so but: me ame he at bihut ka hai bosoâ.

³⁸ Ke ame ne hu hnyi unen utiöiny ke baga ame ne momo je ong dok ae hadröngöc, wale je ong dok ae hadröngöc me hau;

³⁹ me ame he at bihut ka wâ: ke wâ bi, ame ne löhau je ong dok ae hadröngöc hnyi unen unyidrin; wale thibi okhicö ame kû hnyi unen: e ame bo so.

⁴⁰ Ke a ne kolu but leûnen ban ke at, kʼ ame hadreû ban; e bo so but.

⁴¹ Ke a ne kolu but leûnen ûnyi hnyi hon bariny, ame hadreû bariny; e bo so but.

⁴² Ke ame ne hu hnyi ban ae hadreû, ame ne hon bariny ae hadreû, ke mok ae hau me dra; me wale lepera ame kû hnyi ban ae hadreû, ame ne hon bariny ae hadreû.

⁴³ Me ame he at bihut ka wâ: ke wâ bi, ame ne hau me dra ûkhibiny mok hnyi ban ae hadreû, ame ne bariny ae hadreû, helâ me imaneniny lepera hnyi unen utiöiny;

⁴⁴ haba at e me lepera, kʼ ame bo kong ut; hamen at bihut he ka hai bokongoâ; haba anyin mok me wale hnyi ban.

⁴⁵ Ke haba at ae tren lepera, wale a takoû ge mok, adre me he ka kia anyin je ûkhaû, ke ame he ka ûöhe leûnen ban, me tube esongodiny ethö, me hongot, ka habe, Iny bo kong ut, iny bo kong ut.

⁴⁶ E ame he ka bo kong hnyi je bong hia ae hu gan mok; e bo kong ut: e ame he ka hake laba; haba hnyaban, me, wale hoton je hnyaba.

⁴⁷ Ke haba ûkhaû ae hu mok lepera hnyin, ame ne ûkhaû leûnen mamoe, ame ne ûkhaû lino;

⁴⁸ ame ne hnyi toiny adre otilâ, ame ne hnyi toiny adre omokulec, ame ne lino, ame ne leûnen mamoe; ame ne unen meno, ame ne ke ûnyi adre tibet ûnyi ge unen meno;

⁴⁹ ke ame ne udrudrâ löhau, ame ne dra mok hnyi ûkhaû, ame ne unen meno, ame ne toiny adre otilâ, ame ne toiny adre omokulec, ame ne ke ûnyi bi a unen meno; wale mok lepera, kʼ adre me he ka omanenâ ka at bihut:

⁵⁰ ke ame he at bihut ka wâ mok, me hlöng hwanumen ûnyi ae hu mok hnyin, hnyi je bong a seven:

⁵¹ ke e ame he ka wâ mok hnyi bong a seveniny: ke ame ne ca hûhûö mok hnyi ûkhaû, ame ne hnyi tö adre otilâ, ame ne hnyi tö adre omokulec, ame ne unen meno, ame ne ke ûnyi bi adre tibet ûnyi ge unen meno; wale ke mok lepera ae han; ame bo kong ut.

⁵² Ke e ame he ka thong ûkhaû, ame ne tö adre otilâ, ame ne tö adre omokulec, ame ne leûnen mamoe, ame ne lino, ame ne ke ûnyi bi a unen meno ae hu mok hnyin: anyin a wale ke lepera ae han; kʼ adre me he ka thong degecâ ge meic.

⁵³ Ke ame ne he ka wâ e hnen at bihut, ke wâ bi ame ca hûhûö mok hnyi ûkhaû, ame ne tö adre otilâ, ame ne tö adre omokulec, ame ne ke ûnyi bi a unen meno;

⁵⁴ me ame he at bihut ka kunʼ ödra he ka hneû ûnyi ae hu mok hnyin, ke e ame be ka hlöng hwanumen e hnyi je bong hmetu a seven:

⁵⁵ ke ame he at bihut ka wâ ûnyi ae hu mok j hnyin, hwaban hnödra hna hneû e; ke wâ bi, ame ne ca wia makan mok eling, ke ame ca hûhûö mok, me, bo kong ut e; mʼ u ma he ka thong degecâ ge meic: ame han eû hnyin, ame ne hadreû hnyin ame ne hoton.

⁵⁶ Ke ame ne he ka wâ e hnen at bihut, ke wâ bi ame ne hia tot ut mok hwaban l hnödra hna hneû, me e ame he ka kia degecâ e ûnyi hnyi ûkhaû, ame ne unen meno, ame ne tö adre otilâ, ame ne tö adre omokulec:

⁵⁷ ke ame ne manen bala bi e hnyi ûkhaû, ame ne to adre otilâ, ame ne tö adre omokulec, ame ne ke ûnyi bi a unen meno; me wale ke mok ame hûhûö: mʼ u ma he ka thong degecâ ge meic ûnyi ae hu mok hnyin.

⁵⁸ Ke haba ûkhaû, ame ne tö adre otilâ, ame ne tö adre omokulec, ame ne ke ûnyi bi a unen meno, wale u me he ka hneû, kʼ ame ne hia but mok hnyin, me u ma he ka hneû hmetu, me ame he ka bo so but.

⁵⁹ Wale hnanyibuiny mok lepera hnyi ûkhaû, ame ne leûnen mamoe, ame ne lino, ame ne tö adre otilâ, ame ne tö adre omokulec, ame ne ke ûnyi bi a unen meno, mʼ adre me he ka hai bosoâ, mʼ adre me ne he ka hai bokongoâ.