Levitiko 10 - Iaai Bible 1901 (New Caledonia)

¹ KE haba Nadaba me Abiu, li laku Arona, ödru me ve hom anyidru li taben meic, me hû meic hnyin, me ip ûnyi ae bo so hon, me hudo meic ae ke bongon bi hnyi hnyimakö Iehova, waleji e ame ca hûna ködrin.

² Ke ame o but meic ûheny unyi Iehova me li ödru, me ödru me mokcu hnyi hnyimakö Iehova.

³ Ke haingö Mose kö Arona, ka habe, haba ûnyi ang waleji ame ha Iehova, ka habe, Ame he ka okabi nya ge tavat adre me hakekeny könya, kʼ adre me he ka oganö nya hnyi hnyimakan tavat hia. Ke haba Arona ame ca fuc.

⁴ Ke haba Mose ame hao Misaela me Elizafana li laku Uziela a ke kamö Arona, me ha ködru, ka habe, Hok cu jem, me hom dö liamekeiny mʼ öbu ûhedrin hnyi hnyimakan dok ae kap ka hnyi hoton hnyaba.

⁵ Ke ödru me he me hum odrin hnyi je khaûidru ka hnyi hoton hnyaba; helâ me hna ha hnö Mose.

⁶ Ke haingö Mose kö Arona, me Eleazara, me Ithamara, a li lakon, ka habe, Ca he ka ûöhe je böbun, me khekhe anyibun je ûkhaû, wâ öbun nye mokcu, ke wâ e nye hmönyin ka tavat hia: ke ame he je liamekeiny mʼ öbun, a lap Isaraela hia he ka tengiâ a gʼ adre thong ûnyi ga Iehova.

⁷ Ke ca he öbun ka he ûhebun hnyi hwanumen uma ûkhacaköu, wâ öbun nye mokcu: anyin ae but hubun wakaco hnân hû anyi Iehova Ke odrin e ânyâ helâ me hofuc ho Mose.

⁸ Ke Iehova ame ha kö Arona, ka habe,

⁹ U me ca he ka ic waina me grâg, a u me je lakom unyâm, öbun ka didro ka hnyi uma ûkhacaköu, wâ öbun nye mokcu: wale hnanyibu nyiele balua, hnyi anyibun ta je dö:

¹⁰ mʼ öbun e he ka ovebongonâ ûnyi ae kap me ûnyi ae ca kap, a bo kong, me bo so;

¹¹ mʼ öbun e be ka nâ je lakon Isaraela ge je hnanyibu hia a ha Iehova ködra a deny Mose.

¹² Ke Mose ame ha kö Arona, me Eleazara, me Ithamara, a li lakon, wale lo li kolon, ka habe, Hom dö hudiny han, kolon je hut a an ge meic kö Iehova, me an ju ke ba leven hnyi baten taben hut: anyin ae ti kap e:

¹³ ke hamöbun he ka han e hnyi ke dok ae kap, anyin a wale âm, me an li lakom, ûnyi hnyi je hut a an ge meic kö Iehova: anyin adre hûna helâe könya.

¹⁴ Ke haba ûlainy adre hajijingâ, me jevan adre kap goranyai, öbun e he ka han hnyi ke dok ae so; a u me lakom obaga me wahlu a tha odrin mou: anyin adre ham e hnân âm, me an lakom, adre ham ûnyi hnyi hudiny ole ûnyi ge lakon Isaraela.

¹⁵ Hamödra he ka hom jevan adre ogöranyâ, me ûlainy adre hajijingâ tha e me pipikhenya wale hut a an hnen meic, he ka hajijingâ hnân hudiny hajijing hnyi hnyimakö Iehova: a âm, me an li lakom a tha ödru mou, me wale hnanyibu nyiele balua; helâ me hna hûna hnö Iehova.

¹⁶ Ke Mose ame hwege elâm got hudiny hulö, ke wâ bi, adre hia but le; me e ame hmönyin kö Eleazara, me Ithamara li laku Arona, a li kolon, me ha, ka habe,

¹⁷ Ieû öbun e ca an gan hudiny hulö hnyi dok ae kap, anyin ae ti kap e, ke e ame hia but ham köbun he ka hom hulö anyin ûkhacaköu, me hnân bi hwaban anyidra möt hnyi hnyimakö Iehova?

¹⁸ Wâ bi, adre ca hom dren ka hnyi dok ae kap: e ti ûcû köbun he ka han e hnyi dok ae kap, helâ me hnok hna hûna.

¹⁹ Ke haingö Arona kö Mose, ka habe, Wâ bi, hnyi bong ang ödre hudo hudiny anyidru hulö, me anyidru hut adre le hnyi hnyimakö Iehova; ke a o könya je ûnyi eang; ke hawa, oge ne hia but han hudiny hulö hnyi bong ang, ame ne he ka kap soâ hnyi hnyimakö Iehova?

²⁰ Ke haba Mose ame löng, me e ame kap soâ.