Kolose 4 - Iaai Bible 1901 (New Caledonia)

¹ JE than lö, ham dö ka je athnyabaibun ûnyi ae wisa me ûcû; anyin ae khanʼ öbun ae hu Tuhöbun ethö hnyi drany.

² E so öbun e hic ûjöng, me hmâkâ e, me ole;

³ ke hic minya hobi kohmun me me he Khong ka khong kohmun deny hwan hofuc, he ka ha ûnyi ae iyong anyin Keriso, wale adre cö nya can;

⁴ mʼ oge me he ka omanenâ e, hnyi denyʼ ae ûcû.

⁵ E so öbun e he hnyi metâ unyidra eû hnyou, me oûnyihnathoâ ta je ûen,

⁶ E bo öbun e he bala ka fuc me ibetengiö, ame osoâ ge sâlt, me me khanʼ öbun dö hwakecin he ka thu ka tavat.

⁷ Ame he Tukiko ka omanenâ köbun ta je bonguk hia, e liamekeiny a oûnykûmik, me at huliwa hnathu, a tha huliwa mönya ka Than:

⁸ oge hia but kunâ e köbun hobi kâu ûnyi eang, me me khanʼ öbun dö bonguhmun, me me he ka okahwa je hnyekubun;

⁹ tha e me Onesimo, ke liamekeiny ae hnathu a oûnykûmik, a hanöbun. Ödru me he ka omanenâ köbun ta je ûnyi hia thithö adre ânyâ eang.

¹⁰ Ame italofa mʼ öbun Aritako at adre tha ca mönya, me Mareko liamekeiny me Banaba (oge me hûna köbun gan, e ka o köbun mʼ öbun kap ju),

¹¹ me Jesu, ke ien minya Juseto, ûnyi hnyi peritom: hake ödrin thibi ödrin e tha huliwa mönya hnyi dokhu dokhon Khong, hnyat ödrin e hia but okahwö nya.

¹² Ame italofa mʼ öbun Epafera a hanöbun athnyabainy Keriso Iesu, at ae hwege hic hobi köbun, mʼ öbun e he ka tot wisa, me kap wia hia weny Khong.

¹³ Anyin a inya oge ohnathoâ e ae gan anyin huliwa köbun, mʼ ödra minya hnyi Laodikea, me tavat hnyi Hierapoli.

¹⁴ Ame italofa mʼ öbun Luka, at tren bubuny a oûnykûmik, me Dema minya.

¹⁵ Italofa me hnyat me lakeiny hnyi Laodikea, me Numefa, me ekalesia hnyi je hnyabadrin.

¹⁶ Ke öbun ka hia but aû tusi ang, me ûkhûnöng dö he ka aû ka ekalesia anyin at Laodikea; ke he thʼ öbun minya ka aû tusi ûheny Laodikea.

¹⁷ Ke ha thö kö Arekipa, ka habe, Wâ eâu hanymâm u je kap ûnyi ge Than, mʼ u me he ka umo thö.

¹⁸ Anyik italofa hnen hing hnyamok. Ûnykûme ju hnödra hna cö nya. E so e unyibun ibetengiö baû.