Kolose 3 - Iaai Bible 1901 (New Caledonia)

¹ ANYIN a wale, adre ne hia but tha omeli öbun hmetu me Keriso, elâm dʼ öbun ta je ûnyi ethö, wale dok ame laba hnyin Keriso hnyi ke keihen a metân Khong.

² Hnyok dʼ öbun ka ta je ûnyi ethö, ke ca ka ta je ûnyi eang hmeledrany.

³ Anyin a öbun e mokcu, ke adre tha ikhâlâ anyibun möt me Keriso unyin Khong.

⁴ E ka he ka manen dut Keriso a melita, mʼ ate me he ka tha manan mē hnyi hmanenang.

⁵ Anyin a wale hlingâ ju öbun je ong outhunyibun eang hmeledrany; wale a bi ûnyi monu, me hwakecin ae ikiki, me hnyok wagelue, me weny ae kong, me behnyekon, a wale hmi ka hnatheat;

⁶ can ta je ûnyi e ame o but tang hmonyin anyin Khong ka tavat adre me ca ûling;

⁷ kʼ öbun minya öbun e vheno ehac, waleji kʼ öbun e tiga laba hnyin.

⁸ Ke walang ang degec ut gabun ta je ûnyi eang, wale hmonyin, me wathethot, me hnyok ae kong, me û, me hofuc ûjao ûnyi hnyi je hnyimöbun;

⁹ ca uthoiköu bi, anyin a öbun e hia but uny degecâ at adrem me ta je hwakecin,

¹⁰ me khaû öbun ge at ae teb ûnyi, adre me labö ohâtâ hnyi metâ hoton we at a op e:

¹¹ ke ba bi unyin at Heleni me at Juda, me tavat adre me peritomonâ me ca peritomonâ, me aten je hnyei, me at Sekuthia, me athnyaba, me at he baû: ke haba Keriso, me ta je ûnyi hia, ke unyin hia.

¹² Anyin a wale, haba öbun je hna ûca hnen Khong, a wakap me laoûnykûminy, me so öbun e khavâ ibetengiö vec, me hwakecin ae so, me hnyok ae hnyikânâ, me hwakecin ae menyik, me hokhnyok beû hmâ;

¹³ ûhokhnyokâköuâ, me ûhnaköuâ a ne hu veciny ke at ge ke at; haba Keriso ame hnʼ öbun, me so öbun ânyâ helâe:

¹⁴ ke haba ûnyi ae nua hon ta je ûnyi e, me ibetengiö, wale weny ae ti so.

¹⁵ Ke so ame he ûsoköu anyin Keriso ka muso je hnyekubun, waleji adre hawʼ öbun ka hnyin hnyi unyin a khaca: ke oleâ bala ju öbun.

¹⁶ E so e he hofuc hwan Keriso ka laba hmâ hnyi je hnyekubun me metâ hia; ûnöbunköu öbun ju ge ta je salamo, me ta je khumöng, me ta je fehuâ ûnyi hnyi hanu, khumöng dö ka Than me ibetengiö eû hnyi je hnyekubun.

¹⁷ Ke haba ta je ûnyi hia öbun e ânyâ hnyi hofuc me huliwa, me ânyâ hia thö hnyi ien Than Iesu, ke oleâ ka Khong a Kamen deny e.

¹⁸ Omomo lö, ve long ju hoton laöiöbun, helâ me ûcû ka Than.

¹⁹ Obaga lö, ve betenge ju ge laöiöbun, ke ca oveci ödra.

²⁰ Je wanakat lö, ve long ju hoton je lakamöbun me lahinyöbun hnyi ta je ûnyi hia, anyin a wale hnân osenyinâ Than.

²¹ Lakamen lö, ca ohmönyinâ je lakubun, wâ adre nye hmak.

²² Lathnyaba lö, löng ju hoton tavat a je latuhöbun hnyi unyin; ca huliwa bi wânen at, helâ me tavat adre me osenyinâ at, ke so bi hnyi hnyok ae hnathu, me outen Than:

²³ ke haba ta je ûnyi öbun e ânyâ, mâdrâ hnyokâ ju helâ me ka Than, ke ca ka at bi:

²⁴ anyin ae khanʼ öbun a öbun e he ka hu hwaban ûnyi ge Than, wale jekhöû: ke öbun e bi athnyabainy Than Keriso.

²⁵ Anyin a haba at ae ca wisa, ame he ka hu hwaban hwakecin ae ca wisa: ke ba hna wâhmakhmetoâ bi tavat.