Kolose 2 - Iaai Bible 1901 (New Caledonia)

¹ ANYIN ae wek e me khanʼ öbun ûganiny hnok hna ûjöng hwege hobi köbun, mʼ ödra minya hnyi Laodikea, mʼ ödra hia adre me ca hnyi wâ hnyimakök hnyi unyin;

² mʼ adre me he ka okahwa je hnyekudra, kʼ adre ûhûjâköuâ hnyi betenge, ke hnyi tang omjeû hia wale hna tha kap me wâ ûnykûme, mʼ adre me he ka wâhmakhmeto ûnyi ae iyong anyin Khong, wale Keriso,

³ at adre ikhâlâ unyin ta je omjeûiny hia metâ me wâ ûnykûme.

⁴ Wale thibi hnok hna ha, wâ e nye he ke at ka iyâûʼ öbun ge je hofuc ûhahnyok.

⁵ Eja ke ne a ne hiö nya hnyi unyin, inya unyibun hnyi hanu, kʼ oge me senyinâ me wâ hna laba wia a öbun, me ihwegien anyibun labageju ka Keriso.

⁶ Anyin a wale, he bala ju öbun unyin Keriso Iesu a Than, helâ me hnobun hna kap e,

⁷ ke bi wân dut me up öbun goranyai unyin, ke ohmâ ju anyibun labaʼ geju, helâ me hna nʼ öbun, ke ti ole gan hmâ.

⁸ Wâ eâu, wâ e nye he ke at ka sei öbun hnen anyin bemetâ, me tang iyawo hnân omono, hoton hofuc vejec anyin at, me je hna ûne anyin hmeledrany a bân, ke ca hoton bi Keriso:

⁹ kʼ ame laba eû hnyin at eling onyen Khong hia thithö hnyi unyin,

¹⁰ kʼ adre me ounöngöti öbun ûnyi gan, kʼ ame ban at eling hon ta je musi me ta je man hia thithö;

¹¹ wale at adre me peritomoni öbun unyin, hnen peritom adre me ca ânyâ ge hnyam, wale he ka uny degecâ onyen unyin, hnen peritom ûnyi ge Keriso;

¹² ke adre me tha konâm më hnyi hna bapataiso, wale adre tha omeli öbun hmetu më ge labageju ka hnyi huliwa anyin Khong, waleji at ame omelö hmetu e ûnyi hnyi hna mok.

¹³ Ke haba öbun waleji öbun e mok hnyi hwakecin ae kong, me ca peritomonâ je unyibun, e ame omeli öbun tha öbun më, ke e ame ohia anyita ta je hulo hia;

¹⁴ ke e ame kot degecâ hna sihnalimen ta je hna hûna ae iwahnaihmiony mʼ öta, me ûcû öta, ke e ame hia but hom degecâ e ûnyi hnyi wanben, kʼ ame thu faoiny hnyi anyin satauro;

¹⁵ ke e ame ka uny degecâ ta je musi me ta je man, e ame omanenʼ ödra bi hnyi dok ae manen, ke ame dokhu hudrin hnyin e.

¹⁶ Anyin a wale, ca he ke at ka ûnykûmi öbun can ta je jeû, me hnân ic, me bonginy bijeû, me tehi ae teb ûnyi, me bong sabath:

¹⁷ wale hmenon ta je ûnyi ame he ka o; ke haba onyen, me, wale Keriso.

¹⁸ Ca he ke at ka ovhelâ hwaböbunhnen beöûhnyûkongi öbun, me hic ka ta je angela, ame nâ ta je hna omanenâ kâu bi, ame ohobâ bâûâ hnen ûnykûmenen unyin,

¹⁹ kʼ ame ca kât hmâ bi Ban, wale at a ûnyi gan unyin hia thithö, adre ûhûjâköuâ hnen ta je outhunyin me toiny, ame hûhûö, a öhûhûö hnen Khong.

²⁰ Öbun e ne tha mokcu me Keriso ûnyi hnyi hna ûne a bân anyin hmeledrany, anyin a ieû, öbun e long hmetu hoton je hna hûna, helâke öbun e möt ka hnyi hmeledrany, ka habe,

²¹ Ca mâdrâ bi, ca drem bi, ca kâlâ bi,

²² (ame he ka hia ta je ûnyi e, at ka mâdrâ), helâ me je hna hûna me je hna ûnö hnen at?

²³ Haba ta je ûnyi e, ame beometâ thoiâ hnyi hmi baû, me he ka hnyikânâ, me ovecâ unyin bi; ke ca ûnyi hnathu bi hnân hom ûhnyûkongoâ unyin.