Kolose 1 - Iaai Bible 1901 (New Caledonia)

¹ INYA Paulo aposetolo anyin Keriso Iesu ûnyi ge weny Khong, me Timoteo ke liamekeiny mʼ öta,

² ohmu me set ka wakap me je hnyat me lakeiny adre me labageju unyin Keriso hnyi Kolose: E so e unyibun ibetengiö baû, me ûsoköu ûnyi ge Khong a Kamöta.

³ Öhmu me ole ka Khong a Kamen Tuhöta Iesu Keriso, me labö hic bala hobi köbun,

⁴ anyin a öhmu me long anyibun labageju ka Keriso Iesu, me anyibun ibetengiö ka wakap hia,

⁵ ûnyi hnyi gejon adre ip ethö hnyi drany hobi köbun, waleji öbun e long ehac hnyi hofuc ae hnathu hnyi ûthumetu ae so,

⁶ wale a o köbun; helâ minya ka hmeledrany hia thithö, kʼ ame wa wan me kû tot, helâe minya unyibun, hwân hnyi bong öbun e long me wâhmakhmeto ibetengiö baû anyin Khong hnyi hnathu;

⁷ helâ minya me hna nʼ öbun hnö Epafera at ame tha bi athnyaba mʼ öhmun a oûnykûmihmu, at ame huliwa hnathu ka Keriso hobi köhmu,

⁸ ke e ame omanenâ köhmu anyibun ibetengiö hnyi Hanu.

⁹ Anyin a wale öhmu me ca menâ hic, me sumat hobi köbun hwân hnyi bong öhme long hnyin, mʼ adre me he ka unöngöt ge hna wâhmakhmetoâ weny, hnyi metâ me wâ ûnykûme hia hnyi Hanu,

¹⁰ mʼ öbun e he bala ka ûcû ka Than, he ka osenyinâ bala e, me wa hnyi ta je huliwa ae so hia, me kû tot hnyi metâ anyin Khong;

¹¹ kʼ adre me ohwegi öbun ge hwege hia, hoton man maniny anyin hmanenang, he ka tha hnyok me hokhnyok beû hmâ, me senyin;

¹² ate me ole ka Kamen, waleji at a oûcû öta he ka hnyi hu jekhoû unyin wakap hnyi melam:

¹³ waleji at ame hûgûnʼ öta ûnyi hnyi maniny menekholom, me wiʼ öta ka hnyi dokhu dokhon Nokon a oûnykûminy;

¹⁴ ûnyi gan bi e hu hwaban anyita möt, wale he ka hna degecâ ta je hulo:

¹⁵ e thibi a we Khong ae ca manen bi, atöiny ta je ûnyi hia adre op;

¹⁶ anyin adre op ta je ûnyi hia thithö ûnyi gan, ta je ûnyi ethö hnyi drany me eang hmeledrany, ta je ûnyi ae manen, me ta je ûnyi ae ca manen, me ta je theron, me ta je dokhu, me ta je musi, me ta je man; adre hia but op ta je ûnyi hia thithö ûnyi gan, me hobi kâu;

¹⁷ ke e a bân ke biliny bi ta je ûnyi hia thithö, ke ame tethmâ ta je ûnyi hia thithö ûnyi gan.

¹⁸ Ke e thibi ban unyin, wale ekalesia: e thibi can, atöiny tavat ûhedra hnyi hna mok; me me he ka beönua hon ta je ûnyi hia thithö.

¹⁹ Anyin ae weny Kamen he ka hnen eû hnyi hnyin unöngöt hia thithö;

²⁰ me he ka öûsoköuâ ta je ûnyi hia thithö a deny e, e ka hia but öûsoköuâ ge dren anyin satauro; wale a deny thibi e, ame ne ta je ûnyi eang hmeledrany me ethö hnyi drany.

²¹ Ke öbun ta je atkanyua ehac me iwahnaihmiony hnyi hnyekubun hnyi anyibun ta je huliwa ae kong, ke e ame hia but öûsoköuâ walang ang

²² hnyi unyin wale viny ûnyi ge mok, me me he ka omanenʼ öbun hnyi hnyimakan, a tavat ae kap, me ba okongon, me ba hnân haikongoâ:

²³ öbun e ne tethmâ hnyi labageju, adre bi taben, me ohmʼ öbun, ke ca bwebwet ûnyi hnyi gejon ûthumetu ae so öbun e löng, waleji adre khetâ ka tavat hia thithö eang hmeledrany; ke inya Paulo adre wiö nya me me at huliwan.

²⁴ Ke walang ang inya oge me senyinâ anyik je vec hobi köbun, ke oge me obekhötâ hnyi unyik hounyin je vec anyin Keriso hobi kâu unyin e, wale a ekalesia;

²⁵ ke adre wiö nya he ka huliwan ka hnyi hoton hna penapena hnen Khong, wale adre ham nya hobi köbun, he ka ohwâdâ hofuc hwan Khong,

²⁶ wale ûnyi ae iyong adre ikhâlâ ehac hnyi ta je ûen adrem, me ta je dö hia thithö; ke walang ang, adre hia but omanenâ e ka anyin wakap,

²⁷ ke e weny Khong he ka omanenâ kodra ûganiny hmanenanginy ûnyi eling ae iyong unyin Aten ke je hnyei, wale Keriso eû hnyi je hnyekubun, a gejuiny hnahic:

²⁸ wale at öhmun e khetâ, me sihwegiâ ka tavat hia thithö, me nʼ odra hia hnyi metâ hia, mʼ öhmun e he ka omanenâ tavat hia thithö ae bekhöt soidra unyin Keriso;

²⁹ ke wale hnok minya hna huliwa ka hnyin, kʼ oge me ûjöng hmonyin hoton anyin huliwa, wale ame hwege huliwa eû hnyi hnyik.